(ភ្នំពេញ)៖ បន្ទាប់ពីការចេញដំណើរជាផ្លូវការដោយការបើកកិច្ចប្រជុំគណៈរដ្ឋមន្ត្រីដំបូងកាលពីថ្ងៃទី២៤ ខែសីហា កាលពីសប្តាហ៍មុនហើយនោះ នៅថ្ងៃចន្ទ ទី២៨ ខែសីហា នេះ ប្រមុខរាជរដ្ឋាភិបាលថ្មីរបស់កម្ពុជា ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ក៏បានចាប់ផ្តើមរបៀបវារៈការងាររបស់ខ្លួន។
របៀបវារៈការងារថ្ងៃដំបូងរបស់ឯកឧត្តមកិត្តិទេសាភិបាលបណ្ឌិត មានរហូតដល់ទៅ៥កម្មវិធី រវល់តាំងពីព្រលឹម ទល់ព្រលប់តែម្តង។ កម្មវិធីទី១សម្រាប់ថ្ងៃនេះ ឯកឧត្តមកិត្តិទេសាភិបាលបណ្ឌិត រួមនិងឧត្តមភរិយា បានអញ្ជើញថ្វាយព្រះរាជដំណើរព្រះមហាក្សត្រ និងព្រះមហាក្សត្រី យាងទៅពិនិត្យព្រះរាជសុខភាពនាទីក្រុងបេកាំង ប្រទេសចិន។
បន្ទាប់ពីថ្វាយព្រះរាជដំណើរព្រះមហាក្សត្រ និងព្រះមហាក្សត្រីនៅឯព្រលានយន្តហោះអន្តរជាតិភ្នំពេញហើយនោះ ឯកឧត្តមបណ្ឌិតប្រមុខរាជរដ្ឋាភិបាលកម្ពុជា ក៏បានធ្វើដំណើរឆ្ពោះមកកាន់វិមានសន្តិភាព ដើម្បីជួបភ្ញៀវបរទេស។ ថ្ងៃនេះឯកឧត្តមកិត្តិទេសាភិបាលបណ្ឌិត បានជួបភ្ញៀវបរទេសជា បន្តបន្ទាប់រហូតដល់ទៅ៤ភ្ញៀវ។
ភ្ញៀវបរទេសដែលទទួលបានការស្វាគមន៍ជាលើកដំបូងពីប្រមុខរាជរដ្ឋាភិបាលថ្មីរបស់កម្ពុជា រួមមាន៖ ១) លោកស្រី ម៉ារីយា ដែល ខាមេន ម៉ូរេណូ ឯកអគ្គរដ្ឋទូតសហភាពអឺរ៉ុប ប្រចាំកម្ពុជា ដែលចប់អាណត្តិ, ២) លោក ឆុង វ៉ាងគឺន រដ្ឋមន្ត្រីក្រសួងកសិកម្ម ស្បៀង និងកិច្ចការជនបទរបស់កូរ៉េខាងត្បូង, ៣) លោក ហ្វ្រាន់ស៊ីសស្កូ កាប៊ុលឌី ឡៃ ឧបនាយករដ្ឋមន្ត្រី រដ្ឋមន្ត្រីសម្របសម្រួលកិច្ចការសេដ្ឋកិច្ច និងជារដ្ឋមន្ត្រីក្រសួងទេសចរណ៍ និងបរិស្ថានរបស់ទីម័រខាងកើត និង៤) គណៈប្រតិភូមន្ត្រីព្រឹទ្ធសភាអាមេរិក ដឹកនាំដោយលោក អាឡិច ខាន ក្រឡាបញ្ជីនៃក្រុមភាគច្រើនរបស់អនុគណ:កម្មាធិការស្តីពីប្រតិបត្តិការរបស់រដ្ឋ និងបរទេស និងកម្មវិធីពាក់ព័ន្ធនានា របស់គណ: កម្មាធិការគ្រប់គ្រង និងបែងចែកថវិកាជាតិរបស់ព្រឹទ្ធសភាអាមេរិក។
ក្នុងជំនួបទាំង៤នេះ ភ្ញៀវបរទេសទាំងអស់សុទ្ធតែបានបង្ហាញការសាទរជូនចំពោះឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ដែលទទួលបានការគាំទ្រជានាយករដ្ឋមន្ត្រីកម្ពុជា។ ភ្ញៀវបរទេសជាមិត្ត ក៏បានបង្ហាញជំនឿចិត្តរបស់ពួកគេផងដែរថា ក្រោមការដឹកនាំរបស់ឯកឧត្តមបណ្ឌិត ហ៊ុន ម៉ាណែត នឹងធ្វើឱ្យកម្ពុជាអភិវឌ្ឍន៍ រីកចម្រើនលូតលាស់កាន់តែខ្លាំងបន្ថែមទៀត។
ក្រៅតែពីបានបង្ហាញការសាទរចំពោះឯកឧត្តមបណ្ឌិត ហ៊ុន ម៉ាណែត ហើយនោះ ក្នុងជំនួបទាំង៤នេះ ឯកឧត្តមបណ្ឌិត ហ៊ុន ម៉ាណែត និងភ្ញៀវជាមិត្ត ក៏បានបង្ហាញជំហពង្រឹងកិច្ចសហប្រតិបត្តិការលើវិស័យនានាឱ្យកាន់តែល្អប្រសើរផងដែរ។
ខាងក្រោមនេះ ជាខ្លឹមសារលំអិតនៃជំនួបនីមួយៗ៖
១៖ ឯកឧត្តមកិត្តិទេសាភិបាលបណ្ឌិត ហ៊ុន
ម៉ាណែត និងសហភាពអឺរ៉ុប ប្តេជ្ញាបន្តជំរុញ និងលើក កម្ពស់កិច្ចសហប្រតិបត្តិការ
កម្ពុជានិងសហភាពអឺរ៉ុប ឱ្យកាន់ជិតស្និទ្ធ
http://fna.asia/a7f8dac
២៖ មន្ត្រីជាន់ខ្ពស់របស់កូរ៉េខាងត្បូង ជឿថាកម្ពុជាកាន់តែរីកចម្រើន ក្រោមការដឹកនាំរបស់ឯកឧត្តម បណ្ឌិត ហ៊ុន ម៉ាណែត
http://fna.asia/d213b10
៣៖ មន្ត្រីជាន់ខ្ពស់ទីម័រខាងកើត
ជឿជាក់ថាការដឹកនាំរបស់ឯកឧត្តមបណ្ឌិត ហ៊ុន ម៉ាណែត នឹងធ្វើ ឱ្យកម្ពុជាកាន់តែរីកចម្រើន
http://fna.asia/e2abf7a
៤៖ នាយករដ្ឋមន្ត្រីកម្ពុជា ទទួលជួបគណៈប្រតិភូព្រឹទ្ធសភាអាមេរិក
http://fna.asia/e508ee9
