ក្រសួងអប់រំ រៀបចំសិក្ខាសាលាផ្សព្វផ្សាយពីការផ្ដល់ថវិកាគាំទ្រដល់គម្រោងស្រាវជ្រាវ វិទ្យាសាស្ត្រ សម្រាប់ឆ្នាំ២០២៣

 (ភ្នំពេញ)៖ ក្រសួងអប់រំ យុវជន និងកីឡា នាព្រឹកថ្ងៃទី១១ ខែសីហា ឆ្នាំ២០២៣ បានរៀបចំ សិក្ខាសាលាស្តីពីការផ្សព្វផ្សាយនៃការផ្ដល់ថរិកាគាំទ្រដល់គម្រោងស្រាវជ្រាវ វិទ្យាសាស្ត្រ សម្រាប់ ឆ្នាំ២០២៣ ដែលបានធ្វើឡើងក្រោមអធិបតីភាពលោកបណ្ឌិត សាន វឌ្ឍនា អនុរដ្ឋលេខាធិការ ក្រសួងអប់រំ យុវជន និងកីឡា នៅសាកលវិទ្យាល័យភូមិន្ទភ្នំពេញ សាលប្រជុំ CKCC។

សិក្ខាសាលាស្តីពីការផ្សព្វផ្សាយនៃការផ្ដល់ថរិកាគាំទ្រដល់គម្រោងស្រាវជ្រាវ វិទ្យាសាស្ត្រ សម្រាប់ ឆ្នាំ២០២៣នេះ ក៏មានការចូលរួមពីគ្រឹះស្ថានឧត្តមសិក្សាសាធារណៈ និងឯកជនទូទាំងប្រទេស រួមទាំងមានលោកគ្រូ អ្នកគ្រូ ចូលរួមជាច្រើននាក់ផងដែរ។

សូមបញ្ជាក់ដែរថា មូលនិធិស្រាវជ្រាវ គំនិតច្នៃប្រឌិត និងនវានុវត្តន៍ (Research Creativity and Innovation Fund) ឬមូលនិធិ ស.គ.ន. ជាគំនិតផ្តួចផ្តើមដែលមានការគាំទ្រពីក្រសួងសេដ្ឋកិច្ច និងហិរញ្ញវត្ថុ និងក្រសួងអប់រំ យុវជន និង កីឡា ក្នុងគោលដៅរួមចំណែកលើកកម្ពស់វប្បធម៌នៃការ ស្រាវជ្រាវ បំផុសគំនិតច្នៃប្រឌិត និងជំរុញនវានុវត្តន៍ ឆ្លើយតបទៅនឹង ទីផ្សារពលកម្ម និងសកល ភាវូបនីយកម្ម។ មូលនិធិស្រាវជ្រាវ គំនិតច្នៃប្រឌិត និងនវានុវត្តន៍ នឹងបន្តគាំទ្រដល់គម្រោងស្រាវ ជ្រាវវិទ្យាសាស្ត្រ ដែលផ្តោតលើ អាទិភាពដូចជា៖ វិស័យកសិកម្មអនុវត្ត, ការលើកកម្ពស់ភាពជាមជ្ឈ មណ្ឌលឧត្តមានុវត្តរបស់ស្ថាប័ន, បច្ចេកវិទ្យាឌីជីថល ផ្ដោតលើមេកាត្រូនិច បច្ចេកវិទ្យា AI ឬបច្ចេក ទេស AR- VR- XR, វិទ្យាសាស្រ្តរូបធាតុ និងការអភិរក្សកសិកម្ម ដើម្បីលើកកម្ពស់គុណភាពដី តុល្យភាពរវាង Fauna និង Flora និងការទប់ស្កាត់ការហូរច្រោះ និងការសឹករិចរិលនៃដីកសិកម្ម។

នីតិវិធី និងលក្ខខណ្ឌនៃការផ្ដល់ការគាំទ្រដល់គម្រោងស្រាវជ្រាវនេះមានដូចជា ៖

១៖ ទំហំថវិកាគាំទ្រការស្រាវជ្រាវអាចស្នើសុំក្នុងចន្លោះ ៤០ ០០០ ០០០ រៀល ដល់ ១២០ ០០០ ០០០រៀល ដោយផ្អែកលើប្រធានបទស្រាវជ្រាវ

២៖ រយៈពេលនៃដំណើការស្រាវជ្រាវមានរយៈពេល១ឆ្នាំ ឬច្រើនជាងនេះ គិតចាប់ពីកាលបរិច្ឆេទចុះ កិច្ចព្រមព្រៀង

៣៖ ការអនុវត្តថវិកាមូលនិធិ ស.គ.ន. លើគម្រោងស្រាវជ្រាវ ត្រូវអនុលោមតាមលក្ខខណ្ឌលម្អិត ដែលបានកំណត់

៤៖ ការរៀបចំនិងការបំពេញសំណុំពាក្យស្នើសុំគាំទ្រគម្រោងស្រាវជ្រាវ រួមមាន៖ ១. លិខិតស្នើ សុំចូលរួមប្រកួតប្រជែង ថវិកាមូលនិធិ (Cover Letter) ២.ប្រវត្តិរូបសង្ខេបនៃអ្នកស្នើសុំ (CV of Applicants /Researchers) ៣. ការសង្ខេបព័ត៌មានស្តីពីស្ថាប័ន ឬក្រុមហ៊ុន(Profile of the Company/Organization) និង ៤. គម្រោង សំណើស្រាវជ្រាវ (៣-៥ទំព័រ)

៥៖ សំណុំពាក្យស្នើសុំ ព្រមទាំងឯកសារពាក់ព័ន្ធទាំងអស់ ត្រូវរៀបចំជាទម្រង់ PDF តែមួយ (1File)

៦៖ កាលបរិច្ឆេទនៃការឈប់ទទួលសំណុំពាក្យស្នើសុំ មិនត្រូវបានកំណត់ឡើយ ប៉ុន្តែការពិនិត្យ ជ្រើសរើសគម្រោងស្រាវជ្រាវ នឹងត្រូវធ្វើឡើងរៀងរាល់ ១ត្រីមាសម្តង។ ដោយឡែកការជ្រើសរើសគម្រោងស្រាវជ្រាវសម្រាប់ ត្រីមាសទី៣ ឆ្នាំ២០២៣ នឹងកំណត់ត្រឹម ថ្ងៃទី២០ ខែសីហា ឆ្នាំ២០២៣៕