(ភ្នំពេញ)៖ ព្រឹត្តិការណ៍កីឡាចម្រុះប្រចាំតំបន់អាស៊ីអាគ្នេយ៍ (ស៊ីហ្គេម) លើកទី៣២ ឆ្នាំ២០២៣ នៅកម្ពុជា បានបញ្ចប់ហើយ ខណៈក្នុងនាមម្ចាស់ផ្ទះរៀបចំការប្រកួតលើកដំបូងនេះ គឺទទួលបាន លទ្ធផលមេដាយលើសពីការរំពឹងទុក ដោយដណ្តើមបានមេដាយសរុបចំនួន ២៨១គ្រឿង ក្នុងនោះ មាន មាស ៨១, ប្រាក់ ៧៤ និងសំរឹទ្ធ ១២៦គ្រឿង។តាមរយៈលទ្ធផលនេះ ឃើញថាម្ចាស់ផ្ទះកម្ពុជា អាចយកបានមេដាយយ៉ាងច្រើនក្នុងប្រវត្តិសាស្ត្រនៃការប្រកួតកីឡាប្រចាំតំបន់ដែលមានរយៈពេល ២ឆ្នាំម្តង ក្នុងពេលវេលាដែលរង់ចាំអស់ ៦៤ឆ្នាំមកនេះ។
ក្រោយឆ្លងកាត់ការប្រកួតប្រជែងក្នុងចំណោម ១១ប្រទេសទៅលើ ៣៧ប្រភេទកីឡា ដែលមាន ៥៨៤វិញ្ញាសា សរុបនោះ ក្រុមអត្តពលិកវៀតណាម រកបានមេដាយមាស១៣៦ ប្រាក់១០៥ និង សំរឹទ្ធ ១១៤គ្រឿង សរុបមាន ៣៥៥គ្រឿងច្រើនជាងគេ ហើយក្រុមថៃ ឈរលេខរៀងទី២ រកបាន ឈ្នះមេដាយមាស១០៨ ប្រាក់៩៦ និងសំរឹទ្ធ ១០៨គ្រឿង សរុប ៣១២គ្រឿង។
ចំណែកឯប្រទេសហ្វីលីពីនវិញ ឈរលេខរៀងទី៥ រកបានមេដាយមាស ៥៨គ្រឿង, ប្រាក់ ៨៦, និងសំរឹទ្ធ១១៦គ្រឿង សរុប ២៦០មេដាយ និងលេខរៀងទី៦ ប្រទេសសិង្ហបុរី រកបានមេដាយមាស ៥១គ្រឿង, ប្រាក់ ៤៣ និងសំរឹទ្ធ ៦៤គ្រឿង ដោយសរុប ១៥៨មេដាយ។
ប្រទេសម៉ាឡេស៊ី ឈរលេខ៧ រកបានមេដាយសរុប ១៧៦គ្រឿង ក្នុងនោះមានមេដាយមាស ៣៤ គ្រឿង, ប្រាក់ ៤៥ និងសំរឹទ្ធ ៩៧គ្រឿង។ ប្រទេសមីយ៉ាន់ម៉ា រកបានសរុប ១១៤គ្រឿង, មេដាយ មាស ២១គ្រឿង, ប្រាក់ ២៥, សំរឹទ្ធ៦៨, ប្រទេសឡាវ ឈរលេខ៩ រកបានមេដាយមាស ៦គ្រឿង, ប្រាក់ ២២, សំរឹទ្ធ៦០ សរុប ៨៨មេដាយ, ប្រទេសព្រុយណេ ឈរលេខ១០ រកបានមេដាយមាស ២គ្រឿង, ប្រាក់ ១, សំរឹទ្ធ៦ សរុបមាន ៩មេដាយ ដ្បិតក្រុមទីម័រខាងកើត រកបានត្រឹមមេដាយសំរឹទ្ធ ៨គ្រឿងប៉ុណ្ណោះ។
ខាងក្រោមនេះ ជាតារាងមេដាយតាមប្រភេទកីឡា ដែលម្ចាស់ផ្ទះកម្ពុជា ទទួលបាននៅក្នុងព្រឹត្តិការណ៍ ស៉ីហ្គេម លើកទី៣២ ឆ្នាំ២០២៣៖
