(អាថែន)៖ យោងតាមការដកស្រង់ផ្សាយចេញពីទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី៩ ខែមីនា ឆ្នាំ២០២៣ អោយដឹងថា រដ្ឋមន្ត្រីក្រសួងដឹកជញ្ជូន លោក ចច ជឺរ៉ាផេទ្រីទីស (George Gerapetritis) កាលពីថ្ងៃពុធសប្តាហ៍នេះបាននិយាយថា ប្រទេសក្រិកអាចបន្តការដឹកជញ្ជូនអ្នក ដំណើរតាមផ្លូវដែកឡើងវិញនៅចុងខែមីនាខាងមុខនេះ នៅពេលដែលប្រព័ន្ធគ្រប់គ្រងសុវត្ថិភាពត្រូវ បានដំឡើងរួចរាល់ បន្ទាប់ពីផ្អាកបណ្តាញផ្លូវរថភ្លើងដោយសារតែគ្រោះថ្នាក់សម្លាប់មនុស្សចំនួន ៥៧នាក់។
ក្នុងសន្និសីទសារព័ត៌មានមួយ លោក ជឺរ៉ាផេទ្រីទីស បានធ្វើការសុំការអភ័យទោសចំពោះហេតុ ការណ៍សោដនាកម្មរថភ្លើងបុកគ្នាធ្លាក់ចេញពីផ្លូវ ដែលត្រូវបានចាត់ទុកថាជាករណ៍ដ៏សាហាវ បំផុតក្នុងកំណត់ត្រារបស់ក្រិក ដោយគូសបញ្ជាក់ថា «គ្មានរថភ្លើងណាចេញដំណើរម្តងទៀតទេ ប្រសិនបើយើងមិនបានធានាសុវត្ថិភាពក្នុងកម្រិតអតិបរមាដែលអាចធ្វើបាន»។
លោក ជឺរ៉ាផេទ្រីទីស បានគូសបញ្ជាក់ថា «យើងប៉ាន់ប្រមាណថាឆាប់ៗនេះ ប្រព័ន្ធផ្តល់សញ្ញា និង ឃ្លាំមើលពីចម្ងាយនឹងដំណើរការពេញលេញ រួមជាមួយនឹងប្រព័ន្ធគ្រប់គ្រងរថភ្លើងស្តង់ដាអឺរ៉ឺប ETCS។ ជាមួយគ្នានោះគ្រឿងបរិក្ខារត្រួតពិនិត្យល្បឿនរថភ្លើង និងហ្វ្រាំងសង្គ្រោះបន្ទាន់ក៏ត្រូវដំឡើង ផងដែរ ដូច្នេះមិនមានឧបទ្ទវហេតុគ្រោះថ្នាក់ផ្សេងទៀតកើតឡើងនោះទេ»។
សូមបញ្ជាក់ថា ក្រោយពីមានគ្រោះថ្នាក់កើតឡើង កម្មករផ្លូវដែកក្នុងប្រទេសក្រិកបាននាំគ្នាធ្វើកូដកម្ម រយៈពេល ២៤ម៉ោង គិតចាប់តាំងពីថ្ងៃព្រហស្បតិ៍សប្តាហ៍មុន ដោយស្តីបន្ទោសទៅលើការធ្វេស ប្រហែស ការបណ្តាក់ទុនតិច និងបុគ្គលិកមិនគ្រប់គ្រាន់ ដែលនាំឲ្យហេដ្ឋារចនាសម្ព័ន្ធ និងប្រព័ន្ធ សុវត្ថិភាពផ្លូវដែកមានការខ្វះខាតអស់រយៈពេលជាច្រើនឆ្នាំមកនេះ៕
