(ហ្សាការតា)៖ តាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃចន្ទ ទី៣០ ខែមករា ឆ្នាំ២០២៣ ប្រាប់អោយដឹងថា ប្រជាជនឥណ្ឌូណេស៊ីរាប់រយនាក់ បានធ្វើបាតុកម្មនៅមុខស្ថានទូត ស៊ុយអែត ដែលមានការយាមកាមយ៉ាងតឹងរ៉ឹង ក្នុងរដ្ឋធានីរបស់ប្រទេសឥណ្ឌូនេស៊ីនៅថ្ងៃចន្ទនេះ ដើម្បីបរិហារការប្រមាថព្រះគម្ពីរអ៊ីស្លាមនាពេលថ្មីៗនេះ ដោយសកម្មជនស្តាំនិយមនៅក្នុងប្រទេស ស៊ុយអែត និងហូឡង់។
គ្រវីទង់ពណ៌សជាមួយនឹងសេចក្តីណែនាំរបស់សាសនាអ៊ីស្លាម អ្នកតវ៉ាជាង៣០០នាក់ បានដើរក្បួន ពេញផ្លូវធំមួយក្នុងទីក្រុងហ្សាការតា ហើយបានជាន់ឈ្លី និងដុតរូបសកម្មជនដាណឺម៉ាក លោក Rasmus Paludan អមជាមួយទង់ជាតិនៃប្រទេសស៊ុយអែត ដាណឺម៉ាក និងហូឡង់។
អាជ្ញាធរបានបិទផ្លូវដែលនាំទៅកាន់ស្ថានទូត ដោយមានប៉ូលិស និងទាហានជាង ២០០នាក់ដាក់ពង្រាយនៅក្នុង និងជុំវិញអគារដែលមានរបងលួសបន្លា។
ការតវ៉ានេះបានកើតឡើងបន្ទាប់ពី សកម្មជនស្តាំនិយមជ្រុលរបស់ស៊ុយអែត បានដុតគម្ពីរគួរអាននៅ ក្រៅស្ថានទូតតួកគី នៅក្នុងបាតុកម្មតវ៉ាមួយកាលពីថ្ងៃទី២១ ខែមករា។ ប៉ុន្មានថ្ងៃក្រោយមកទៀត លោក Edwin Wagensfeld ដែលជាមេដឹកនាំស្តាំនិយមជ្រុលរបស់ប្រទេសហូឡង់ ក៏បានហែក ទំព័រគម្ពីរគួរអាននៅជិតសភាហូឡង់ ហើយជាន់ឈ្លីវាផងដែរ។
ទង្វើទាំងពីរនេះ វាបានធ្វើឱ្យអ្នកកាន់សាសនាអ៊ីស្លាមរាប់លាននាក់នៅជុំវិញពិភពលោកខឹងសម្បារ និងបង្កឱ្យមានការតវ៉ា រួមទាំងនៅក្នុងប្រទេសឥណ្ឌូនេស៊ី ដែលជាប្រទេសមានអ្នកកាន់សាសនា អ៊ីស្លាមច្រើនជាងគេលើពិភពលោកផងដែរ៕
