បរទេស ៖ រដ្ឋមន្ត្រីកិច្ចការអឺរ៉ុបរបស់ប្រទេសបារាំង លោក អាមេលី ដឺ ម៉ុនឆាលីន បាននិយាយថា ចក្រភពអង់គ្លេស នឹងត្រូវការអនុម័តច្បាប់របស់សហភាពអឺរ៉ុប ប្រសិនបើប្រទេសនេះ ចង់បានការធ្វើពាណិជ្ជកម្ម ដោយគ្មានឧបសគ្គចូលទីផ្សារអឺរ៉ុបតែមួយ ។
លោក ម៉ុនឆាលីន បាននិយាយបែបនេះ ទៅកាន់ប្រព័ន្ធផ្សព្វផ្សាយ បន្ទាប់ពីកិច្ចប្រជុំ ជាមួយ អ្នកចរចាលើការចាកចេញរបស់អង់គ្លេសពីសហភាពអឺរ៉ុប លោក Michel Barnier ដែល បានបង្ហាញអាណត្តិរបស់គណៈកម្មការអឺរ៉ុប សម្រាប់កិច្ចពិភាក្សាជាមួយ ប្រទេស អង់គ្លេស ស្តីពីទំនាក់ទំនង នាពេលអនាគតរវាងទីក្រុងឡុងដ៍ និងទីក្រុងព្រូស៊ែល។
លោក Barnier បាននិយាយថា សហភាពអ៊ឺរ៉ុប ចង់បានកិច្ចព្រមព្រៀង លើការ ធ្វើ ពាណិជ្ជកម្ម គ្មានពន្ធ និងគ្មានកូតា ដ៏មានមហិច្ឆតាជាមួយប្រទេសអង់គ្លេស ប៉ុន្តែ កិច្ចព្រម ព្រៀងនេះ នឹងពឹងផ្អែកលើការប្រកួតប្រជែងបើកចំហ និងយុត្តិធម៌រវាងចក្រភពអង់គ្លេស និងប្លុកប្រទេសទាំង ២៧ ។
ចក្រភពអង់គ្លេស និងសហភាពអឺរ៉ុប បានជាប់គាំងលើការផុតកំណត់ ដើម្បីទទួលបានកិច្ចព្រមព្រៀង ស្តីពីទំនាក់ទំនងពាណិជ្ជកម្ម និងទំនាក់ទំនងនាពេលអនាគត ប៉ុន្តែនាយករដ្ឋមន្ត្រីអង់គ្លេស លោក Boris Johnson បាននិយាយថា ប្រទេសអង់គ្លេសនឹងមិនគោរពតាមវិធាន និងបទប្បញ្ញត្តិ របស់ប្លុកនេះទៀតនោះទេ៕
