(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា ទិវាជាតិគ្រប់គ្រងគ្រោះមហ ន្តរាយ ផ្ដល់ដល់កម្ពុជានូវការចងចាំ ពីប្រទេសមានគ្រោះមហន្តរាយធំធេង បង្កដោយសង្គ្រាម មកជា ប្រទេសមានសន្តិភាពពេញលេញ។
នេះបើតាមសារលិខិត របស់សម្តេចតេជោ ហ៊ុន សែន ក្នុងឱកាសនៃការប្រារព្ធទិវាជាតិគ្រប់គ្រង គ្រោះមហន្តរាយ រួមជាមួយទិវាអាស៊ានគ្រប់គ្រងគ្រោះមហន្តរាយ និងទិវាអន្តរជាតិកាត់បន្ថយ ហានិភ័យគ្រោះមហន្តរាយ ក្រោមមូលបទ «រួមគ្នាដើម្បីលើកកម្ពស់ តុល្យការសកម្មភាពមូលដ្ឋានី យកម្ម សម្រាប់ភាពធន់នឹងគ្រោះមហន្តរាយ» ដែលត្រូវធ្វើឡើងនៅថ្ងៃទី១៣ ខែតុលា ឆ្នាំ២០២២ ស្អែកនេះ។
សារលិខិតដែលទទួលបាន គឺសម្តេចតេជោ ហ៊ុន សែន បានបញ្ជាក់យ៉ាងដូច្នេះ «ខ្ញុំជឿជាក់ថា ទិវាជាតិគ្រប់គ្រងគ្រោះមហន្តរាយ១៣ តុលា ឆ្នាំ២០២២ នេះ នឹងផ្ដល់ដល់យើងនូវការចងចាំនូវ ដំណើរវែងឆ្ងាយដែលយើងបានឆ្លងកាត់ពីប្រទេសមានគ្រោះមហន្តរាយធំធេង បង្កដោយមនុស្សគឺ «សង្គ្រាម» មកជាប្រទេសមានសុខសន្តិភាពពេញបរិបូណ៌ និងមានមោទកភាពក្នុងនាមជាប្រជាជាតិ មួយ នៅពេលដែលយើងបន្តដំណើររួមគ្នាទៅមុខ ប្រកបដោយអភិវឌ្ឍនភាពឥតឈប់ឈរ និង គ្មានគ្រោះមហន្តរាយ»។
បើតាមសម្តេចតេជោនាយករដ្ឋមន្ត្រី សម្រាប់កម្ពុជា ជារៀងរាល់ឆ្នាំ បានរងផលប៉ះពាល់ពីទឹកជំនន់ រាំងស្ងួត ខ្យល់កន្ត្រាក់ រន្ទះបាញ់ បាក់ច្រាំងទន្លេ និងគ្រោះមហន្តរាយផ្សេងៗទៀត។ ទោះជាយ៉ាងនេះក្តី រាជរដ្ឋាភិបាលកម្ពុជា បានផ្តល់អាទិភាពខ្ពស់ លើការងារគ្រប់គ្រងគ្រោះមហន្ត រាយ ដោយបានពុះពារគ្រប់ឧបសគ្គ ប្រយុទ្ធលើគ្រប់សមរភូមិ ម្ចាស់ការបានលើគ្រប់ទិដ្ឋភាព និង គ្រប់កាលៈទេសៈ។
ដើម្បីជាការដាស់តឿន ក្រើនរំលឹកអំពីការយល់ដឹង និងអំពីកាតព្វកិច្ចម្នាក់ៗ ចំពោះការងារគ្រប់គ្រង គ្រោះមហន្តរាយនេះ សម្តេចតេជោ ហ៊ុន សែន បានណែនាំឱ្យគណៈកម្មាធិការជាតិគ្រប់គ្រងគ្រោះ មហន្តរាយ រៀបចំទិវាជាតិគ្រប់គ្រងគ្រោះមហន្តរាយ១៣ តុលា ឆ្នាំ២០២២ នេះ ដោយចាត់ឱ្យមានមេញ្ទីងអបអរសាទរជាការជួបជុំក្នុងកម្រិតមួយសមល្មម ក្នុងកាលៈទេសៈនៃ សភាពការណ៍ជំងឺកូវីដ-១៩ ដោយរៀបចំផ្សព្វផ្សាយជាបដា ផ្សព្វផ្សាយតាមប្រព័ន្ធសារព័ត៌មាន វិទ្យុ ទូរទស្សន៍ និងបណ្ដាញសង្គមនូវខ្លឹមសារអប់រំ ជូនដល់ជនរួមជាតិបន្ថែមទៀត៕
