(អង់ការ៉ា)៖ នេះបើតាមការដកស្រង់ការផ្សាយចេញពី ទីភ្នាក់ងារសារព័ត៌មាន AFP នៅថ្ងៃចន្ទ ទី២៩ ខែសីហា ឆ្នាំ២០២២ អោយដឹងថា កាលពីថ្ងៃអាទិត្យកន្លងទៅ តួកគីបានអះអាងថា ក្រិកដែលជា សមាជិកអង្គការ ណាតូ (NATO) ដូចគ្នា បានប្រើប្រាស់ ប្រព័ន្ធមីស៉ីលការពារដែនអាកាសផលិត ដោយរុស្ស៉ីគឺ S-300 មកបំពានលើយន្តហោះចម្បាំងរបស់ខ្លួន ពេលបំពេញបេសកកម្មឈ្លបការណ៍ មួយ កាលពីកន្លង ទៅនេះ។
ក្រសួងការពារជាតិតួកគីបានឱ្យដឹងថា ហេតុការណ៍ខាងលើបានកើតឡើង កាលពីថ្ងៃទី២៣ ខែសីហា នៅពេលដែលប្រព័ន្ធមីស៉ីល S-300 ឈរជើងនៅឯកោះគ្រីត (Crete) នៃប្រទេសក្រិក បានតម្រង់រ៉ាដាកំណត់មកលើ ក្រុមយន្តហោះចម្បាំង F-16 របស់តួកគី ដែលហោះធ្វើប្រតិបត្តិការ នៅចម្ងាយ៣គីឡូម៉ែត្រពីភាគខាងលិចកោះរ៉ូដ (Rhodes) របស់ក្រិក។
ក្រសួងការពារជាតិតួកគី បានលើកឡើងយ៉ាងដូច្នេះថា «វាមិនសមស្របទាល់តែសោះជាមួយ ស្មារតីរបស់បក្សសម្ព័ន្ធយោធា NATO ហើយសកម្មភាពនោះ គឺស្មើនឹងសកម្មភាពបែបជាសត្រូវ នៅក្រោមក្បួនច្បាប់របស NATO ស្តីពីការធ្វើប្រាស្រ័យទាក់ទងយោធា។ យ៉ាងណាក្តី ទោះមានសកម្ម ភាពបែបនេះក៏ដោយ ក្រុមយន្តហោះចម្បាំងតួកគី បានសម្រេចបេសកកម្មខ្លួន និងត្រឡប់មកដល់ មូលដ្ឋានវិញ ដោយសុវត្ថិភាព»។
ពាក់ព័ន្ធការចោទប្រកាន់ខាងលើ របស់ទីក្រុងអង់ការ៉ា ក្រសួងការពារជាតិក្រិក បានចេញមុខច្រាន ចោល ដោយឆ្លើយតបដូច្នេះថា «ប្រព័ន្ធមីស៉ីលការពារដែនអាកាស S-300 របស់ប្រទេសក្រិក មិនដែលបានកំណត់រ៉ាដាទៅលើ យន្តហោះចម្បាំង F-16 របស់តួកគី នោះឡើយ»។
គួរបញ្ជាក់ ប្រទេសជិតខាងទាំងពីរ មានបញ្ហាវិវាទរឿងព្រំដែនសមុទ្រនិងអាកាស ជាមួយគ្នាយូរម កហើយ ដែលបាននាំឱ្យមាន ការហោះល្បាតនិងការស្ទាក់គ្នាទៅវិញទៅមក ស្ទើរជារៀងរាល់ថ្ងៃ ភាគច្រើននៅជុំវិញបណ្តាកោះរបស់ក្រិក ដែលស្ថិតនៅក្បែរ បណ្តោយឆ្នេររបស់តួកគី៕
