(ភ្នំពេញ)៖ នាព្រឹកថ្ងៃទី១៦ ខែសីហា ឆ្នាំ២០២២ នៅទីស្តីការក្រសួងពាណិជ្ជកម្ម ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានកិច្ចប្រជុំថ្នាក់រដ្ឋមន្ត្រីសេដ្ឋកិច្ចអាស៊ាន ព្រមទាំង ជាប្រធានគណៈកម្មការរៀបចំកិច្ចប្រជុំក្រោមសសរស្តម្ភសហគមន៍សេដ្ឋកិច្ចអាស៊ានសម្រាប់ឆ្នាំ២០២២ និងកិច្ចប្រជុំពាក់ព័ន្ធ បានអញ្ជើញដឹកនាំកិច្ចប្រជុំត្រៀមលើកទី៣ នៃគណៈកម្មការរៀបចំកិច្ច ប្រជុំក្រោមសសរស្តម្ភសហគមន៍សេដ្ឋកិច្ចអាស៊ាន និងកិច្ចប្រជុំពាក់ព័ន្ធ។
កិច្ចប្រជុំនេះ មានការអញ្ជើញចូលរួមពីប្រធាន អនុប្រធាន និងសមាជិកអនុគណៈកម្មការ និងក្រុម ការងារលេខាធិការដ្ឋាន មន្ត្រីជំនាញពាក់ព័ន្ធ ព្រមទាំងមន្ត្រីជំនាញមកពីអន្តរក្រសួង-ស្ថាប័នពាក់ ព័ន្ធផងដែរ។
ជាកិច្ចចាប់ផ្តើម ឯកឧត្តម រដ្ឋមន្ត្រី ក្នុងនាមជាប្រធានអង្គប្រជុំ បានមានមតិស្វាគមន៍យ៉ាងកក់ក្តៅ និងថ្លែងអំណរគុណ ព្រមទាំងកោតសរសើរជូនចំពោះសមាជិកអង្គប្រជុំទាំងអស់ ដែលបានចូល រួមបំពេញកិច្ចការពាក់ព័ន្ធនឹងការត្រៀមរៀបចំកិច្ចប្រជុំនានា ក្រោមសសរស្តម្ភសហគមន៍សេដ្ឋកិច្ច អាស៊ានយ៉ាងសស្រាក់សស្រាំ ក្នុងស្មារតីទទួលខុសត្រូវខ្ពស់ នាពេលកន្លងមក។ កិច្ចប្រជុំត្រៀមនេះ មានគោលបំណងតាមដានវឌ្ឍនភាពក្នុងការរៀបចំត្រៀមកិច្ចប្រជុំថ្នាក់រដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ ដែលគ្រោងនឹងប្រព្រឹត្តទៅចាប់ពីថ្ងៃទី១១-១៨ ខែកញ្ញា ឆ្នាំ២០២២ នៅទីក្រុងសៀមរាប នាពេលខាងមុខនេះ។
លោករដ្ឋមន្ត្រីបន្តថា កិច្ចប្រជុំនេះ ផ្តោតសំខាន់លើរបៀបវារៈសំខាន់ៗរួមមាន៖ (១) របាយការណ៍ វឌ្ឍនភាព បញ្ហាប្រឈម និងសំណូមពររបស់អនុគណៈកម្មការទាំងអស់ ក្នុងការត្រៀមរៀបចំកិច្ច ប្រជុំថ្នាក់រដ្ឋមន្រ្តីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ (២) អនុសាសន៍ណែនាំដោះ ស្រាយបញ្ហាប្រឈម និងទិសដៅការងារបន្តជូនដល់គណៈកម្មការនិងអនុគណៈកម្មការនីមួយៗ និង (៣) បញ្ហាផ្សេងៗ។
ក្នុងកិច្ចប្រជុំនេះ ឯកឧត្តម រដ្ឋមន្ត្រី ប៉ាន សូរស័ក្តិ បានផ្តល់អនុសាសន៍មួយចំនួនសម្រាប់ជាទិសដៅការ ងារបន្ទាប់ ជូនអនុគណៈកម្មការនីមួយៗ ព្រមទាំងក្រុមការងារលេខាធិការដ្ឋាន ដូចខាងក្រោម៖
១៖ អនុគណៈកម្មការខ្លឹមសារ និងឯកសារ និងក្រុមការងារលេខាធិការដ្ឋាន រៀបចំបញ្ចប់វីដេអូស្តីពី វឌ្ឍនភាព PEDs របស់កម្ពុជា និងត្រៀមរៀបចំឯកសារកិច្ចប្រជុំនិងឯកសារពាក់ព័ន្ធ ជូនប្រធាន កិច្ចប្រជុំ AEM លើកទី៥៤ និងកិច្ចប្រជុំពាក់ព័ន្ធ និងកិច្ចប្រជុំទ្វេភាគី តាមការស្នើសុំជំនួបទ្វេភាគី ជាក់ស្ដែង។
២៖ អនុគណៈកម្មការពិធីការ ដឹកជញ្ជូន សន្តិសុខ សុខាភិបាល រៀបចំកន្លែងប្រជុំនិងសិល្បៈត្រូវ ចុះពិនិត្យមើលទីតាំងរៀបចំកិច្ចប្រជុំ សណ្ឋាគារស្នាក់នៅ សន្តិសុខ ការរៀបចំ Backdrop បដាផ្សព្វ ផ្សាយព័ត៌មាន ទីតាំងធ្វើតេស្តយកសំណាក PCR និង Facilities សង្គ្រោះបន្ទាន់ បន្ទប់បន់ស្រន់ (Prayer Rooms) និងបន្ទប់ចំាបាច់ដទៃទៀត និងការត្រៀមរៀចំសម្រាប់អាហារការងារ អាហារ ស្វាគមន៍ និងការថតរូបផ្សព្វផ្សាយផ្សេងៗ។
៣៖ អនុគណៈកម្មការពិធីការ ដឹកជញ្ជូន សន្តិសុខ សុខាភិបាល រៀបចំកន្លែងប្រជុំនិងសិល្បៈ តាម ដានបញ្ជីជើងហោះហើររបស់គណៈប្រតិភូចូលរួមកិច្ចប្រជុំ និងចាត់ចែងឱ្យមន្រ្តី LOs និង SOs ត្រៀមទទួលឱ្យបាន ល្អប្រសើរ និងការត្រៀមរៀបចំកម្មវិធី Spouse និងសំណូមពរផ្សេងៗ។
៤៖ អនុគណៈកម្មការផ្សព្វផ្សាយព័ត៌មាន គួរយកចិត្តទុកដាក់តាមដានវឌ្ឍនភាពកិច្ចប្រជុំទាំងអស់ និងការតាមដានព័ត៌មានទូទៅ ដើម្បីរៀបចំផ្សព្វផ្សាយឱ្យបានគ្រប់ជ្រុងជ្រោយ។
៥៖ លើកទឹកចិត្តឱ្យរាយការណ៍ជាបន្តបន្ទាប់នូវវឌ្ឍនភាពនៃដំណើរការរៀបចំកិច្ចប្រជុំ AEM លើក ទី៥៤ និងលើកផែនការចំណាយ ក៏ដូចជារាយការណ៍នូវបញ្ហាប្រឈម និងលើកជាសំណូមពរ ដើម្បីអាចដោះស្រាយបានទាន់ពេលវេលា។
ឯកឧត្តម ប៉ាន សូរស័ក្តិ បានថ្លែងអំណរគុណយ៉ាងជ្រាលជ្រៅ ជូនចំពោះប្រធាន និងអនុប្រធានអនុ គណៈកម្មការទាំងអស់ ដែលបានខិតខំយកចិត្តទុកដាក់បំពេញកាតព្វកិច្ច និងតួនាទី ក្នុងស្មារតី បុរេសកម្ម និងទទួលខុសត្រូវខ្ពស់ ក្នុងការរៀបចំកិច្ចប្រជុំនានាក្រោមសសរស្តម្ភសហគមន៍សេដ្ឋកិច្ច ឱ្យប្រព្រឹត្តទៅបានយ៉ាងរលូន និងទទួលបានលទ្ធផលជូនជាតិយ៉ាងល្អប្រសើរ៕
