(ព្រះវិហារ)៖ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈ កម្មការចំពោះកិច្ចចាក់វ៉ាក់សាំងបង្ការជំងឹកូវីដ១៩ ក្របខ័ណ្ឌទូទាំងប្រទេស អមដំណើរដោយ លោកស្រី លី អាយលែន តំណាងអង្គការសុខភាពពិភពលោកប្រចាំប្រទេសកម្ពុជា នៅថ្ងៃទី១៧ ខែមិថុនា ឆ្នាំ២០២២នេះ បានចុះពិនិត្យដំណើរការចាក់វ៉ាក់សាំងនៅទីតាំងផ្សារកំពង់ប្រណាក ស្ថិតក្នុងទីរួមខេត្តព្រះវិហារ។
ទីតាំងចាក់វ៉ាក់សាំងនៅផ្សារកំពង់ប្រណាក ខេត្តព្រះវិហារនេះ បាននិងកំពុងតែមមាញឹកចាក់វ៉ាក់ សាំងដែលភាគច្រើនជាដូសជំរុញជូនដល់ប្រជាពលរដ្ឋទូទៅទាំងអស់ ដោយមិនគិតថា ជាអាជីវកម្ម ឬអ្នកមកទិញទំនិញ ឬជាមន្ដ្រីជួរមុខនោះទេ។ ដោយក្រុមគ្រូពេទ្យប្រចាំការនៅទីនេះ ត្រៀមចាក់វ៉ាក់ សាំងជូនដល់ប្រជាពលរដ្ឋដែលដល់ពេលកំណត់គ្រប់ៗគ្នាតែម្ដង។
បន្ទាប់ពីសំណេះសំណាលជាមួយអ្នកមកទទួលវ៉ាក់សាំងដូសជំរុញហើយនោះ លោកជំទាវ ឱ វណ្ណឌីន ក៏បានដឹកនាំក្រុមការងារចុះសួរសុខទុក្ខដល់អាជីវករដែលកំពុងលក់ដូរនៅក្នុងផ្សារផងដែរ។
តាមរយៈការសាកសួរនោះ លោកជំទាវ ឱ វណ្ណឌីន បានទទួលចម្លើយពីអាជីវករថា ពួកគាត់បាន ចាក់ វ៉ាក់សាំងដូសជំរុញគ្រប់ៗគ្នារួចរាល់ហើយ នៅពេលដល់វេលាកំណត់។ ចាក់វ៉ាក់សាំងនេះ ពួកគាត់មិនបានធ្វើដំណើរទៅឆ្ងាយនាំឲ្យខាតបង់ពេលវេលាលក់ដូរនោះទេ ពោលក្រុមគ្រូពេទ្យ បានប្រចាំការនៅទីតាំងផ្សារ ដើម្បីចាក់ជូនពួកគាត់តែម្ដង។
ប្រធានគណៈកម្មការចំពោះកិច្ចរូបនេះ បានអះអាងថា ទាំងអស់នេះគឺជាការគិតគូរដ៏ត្រឹមត្រូវប្រកប ដោយភាពប៉ិនប្រសព្វរបស់ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ក្នុងការរុញវ៉ាក់សាំង ឲ្យកាន់តែគៀកជិតប្រជាពលរដ្ឋ មានន័យថា វ៉ាក់សាំងរត់រកប្រជាពលរដ្ឋតែម្ដង។
បន្ថែមពីនេះ អាជីវករក្នុងផ្សារកំពង់ប្រណាក់ក៏បានបង្ហាញក្ដីសប្បាយរីករាយ នៅពេលពួកគាត់ទទួល បាននូវចាក់វ៉ាក់សាំង ដើម្បីមានកងការពារពីជំងឺកូវីដ១៩។ ផ្ញើសារតាមរយៈលោកជំទាវ ឱ វណ្ណឌីន ក្រុមអាជីវករទាំងអស់នោះ បានថ្លែងអំណរគុណយ៉ាងជ្រាលជ្រៅ ជូនចំពោះសម្ដេចតេជោនាយក រដ្ឋមន្ដ្រី ដែលបានគិតគូរដល់សុខមាលភាពរបស់ប្រជាពលរដ្ឋ ហើយបើគ្មានវ៉ាក់សាំងទេនោះ ម្ល៉េះ ពេលនេះពួកគាត់មិនមានឱកាសបានលក់ដូរប្រកបអាជីវកម្មនោះទេ៕
