(ញូវយ៉ក)៖ តាមទីភ្នាក់ងារព័ត៌មាន AFP អោយដឹងថា សមាគមរថយន្តអាមេរិក (AAA) បានរាយ ការណ៍នៅចុងសប្តាហ៍មុនថាតម្លៃជាមធ្យមនៃប្រេងសាំងប្រភេទល្អនៅតាមស្ថានីយប្រេងឥន្ធនៈនៅអាមេរិក បានកើនលើសពី ៥ដុល្លារអាមេរិកក្នុងមួយហ្កាឡុង (៣,៧៨លីត្រ) ជាលើកដំបូងនៅសហ រដ្ឋអាមេរិក។ តម្លៃខ្ពស់បំផុតនេះដែលកើតឡើងក្នុងគ្រាដែលមានការកើនឡើងអតិផរណាជាច្រើនខែមកហើយនោះ គឺជាព័ត៌មានអាក្រក់ចុងក្រោយបំផុតសម្រាប់លោកប្រធានាធិបតី Joe Biden ខណៈដែល អាមេរិកនឹងរៀបចំការបោះឆ្នោតពាក់កណ្តាលអាណត្តិក្នុងពេល ៥ខែខាងមុខនេះ។
ទីភ្នាក់ងារព័ត៌មាន AFP បានរាយការណ៍ថា កាលពីមួយឆ្នាំមុន តម្លៃជាមធ្យមនៃប្រេងសាំងនៅ សហរដ្ឋអាមេរិកមានតម្លៃត្រឹមតែ ៣,០៧ដុល្លារប៉ុណ្ណោះ។ ចាប់តាំងពីពេលនោះមក ប្រេងសាំងបាន ឡើងថ្លៃ ៦២ភាគរយ។
ការកើនឡើងតម្លៃប្រេងសាំងនេះកើតមានឡើងបន្ទាប់ពីមានការកើនឡើងជាបន្តបន្ទាប់នៃតម្លៃប្រេងឆៅដែលបានធ្លាក់ចុះនៅដំណាក់កាលដំបូងនៃការរាតត្បាតជំងឺកូវីដដោយសារតម្រូវការបានធ្លាក់ចុះ ប៉ុន្តែបានកើនឡើងវិញនៅពេលដែលសកម្មភាពសេដ្ឋកិច្ចពិភពលោកចាប់ផ្តើមឡើងវិញ។
តម្លៃប្រេងបានកើនឡើងបន្ថែមទៀតបន្ទាប់ពីទីក្រុងម៉ូស្គូបានចូលលុកលុយប្រទេសអ៊ុយក្រែននៅចុងខែកុម្ភៈហើយការឡើងថ្លៃប្រេងឆៅបានកើនឡើងម្តងទៀតខណៈដែលអន្តរជាតិដាក់ទណ្ឌកម្មប្រឆាំងប្រទេសរុស្ស៊ី ដែលជាប្រទេសផលិតប្រេងដ៏ធំមួយ។
ប្រេងឆៅក្នុងមួយបារ៉ែលនៅពេលបច្ចុប្បន្នត្រូវបានជួញដូរក្នុងតម្លៃជាង ១២០ ដុល្លារទាំងនៅទីក្រុង ឡុងដ៍ និងទីក្រុងញូវយ៉ក។
យោងតាមទិន្នន័យរបស់រដ្ឋាភិបាលអាមេរិក តម្លៃថាមពលជាមធ្យមនៅសហរដ្ឋអាមេរិកនៅក្នុងខែ ឧសភា មានកម្រិតខ្ពស់ជាងជិត ៣៥ ភាគរយបើធៀបនឹងខែឧសភាឆ្នាំ២០២១។
កត្តានេះបានរួមចំណែកដល់ការកើនឡើងជារួមនៃតម្លៃទំនិញប្រើប្រាស់នៅសហរដ្ឋអាមេរិក ដែល បានកើនឡើង ៨,៦ភាគរយនៅក្នុងខែឧសភា ធៀបនឹងរយៈពេលដូចគ្នាកាលពីឆ្នាំមុន ដែលជា កម្រិតខ្ពស់បំផុតក្នុងរយៈពេល ៤០ឆ្នាំ។ នេះបើយោងតាមទីភ្នាក់ងារព័ត៌មាន AFP៕
