(បាងកកប៉ុស្តិ៍) ៖ រដ្ឋាភិបាលស្រមោលដែលកំពុងធ្វើការដើម្បីផ្តួលរំលំរបបយោធាមីយ៉ាន់ម៉ាបានចាប់ផ្តើមកម្មវិធីវិទ្យុផ្សាយសំឡេងប្រចាំថ្ងៃកាលពីថ្ងៃសុក្រទី២០សីហា ខណៈខ្លួនព្យាយាមប្រយុទ្ធប្រឆាំងនឹងប្រព័ន្ធផ្សព្វផ្សាយដែលគាំទ្រដោយយោធាដើម្បីភាពផ្តាច់មុខលើរលកធាតុអាកាស។
មីយ៉ាន់ម៉ាបានធ្លាក់ចូលក្នុងភាពច្របូកច្របល់ចាប់តាំងពីរដ្ឋបាលស៊ីវិលរបស់លោកស្រីអ៊ុង សាន ស៊ូជី ត្រូវបានទម្លាក់ពីតំណែងនៅក្នុងរដ្ឋប្រហារកាលពីខែកុម្ភៈដែលបង្កឱ្យមានការតវ៉ាគាំទ្រលទ្ធិប្រជាធិបតេយ្យទ្រង់ទ្រាយធំនិងការបង្ក្រាបដោយយោធាយ៉ាងបង្ហូរឈាម។
ក្រុមអ្នកតំណាងរាស្ត្រមកពីគណបក្សរបស់លោកស្រីបានគ្របដណ្តប់លើរដ្ឋាភិបាលបង្រួបបង្រួមជាតិ (NUG) ដែលកំពុងលាក់ខ្លួនឬនិរទេសខ្លួនដើម្បីប្រមូលផ្តុំការគាំទ្រការតស៊ូនៅលើការផ្សាយព័ត៌មានអន្តរជាតិ។
កាលពីថ្ងៃសុក្រ កម្មវិធីវិទ្យុ NUGរយៈពេល ៣០ នាទីពីរដងរៀងរាល់ថ្ងៃជាលើកដំបូងបានផ្សាយតាមអ៊ីនធឺណេត ដោយផ្តល់ជូននូវព័ត៌មានថ្មីៗអំពីជំងឺកូវីដ១៩ព័ត៌មានលម្អិតអំពីអំពើឃោរឃៅរបស់យោធា និងការអានសំបុត្រពីអ្នកគាំទ្រលទ្ធិប្រជាធិបតេយ្យ។
ផ្នែកមួយផ្សេងទៀតត្រូវបានឧទ្ទិសដល់កងកម្លាំង “ស្វ័យការពារ” ក្នុងស្រុកដែលបានកកើតឡើងពាសពេញប្រទេសមីយ៉ាន់ម៉ាដើម្បីប្រយុទ្ធជាមួយនឹងកងកម្លាំងរដ្ឋាភិបាលយោធាដែលជារឿយៗប្រើកាំភ្លើងបាញ់សត្វឬអាវុធកែច្នៃនៅរោងជាងបណ្តោះអាសន្នក្នុងព្រៃ។
សំបុត្រមួយត្រូវបានអានយ៉ាងដូច្នេះ “យើងកំពុងជូនពរល្អៗដល់អ្នក ហើយយើងមានមោទនភាពចំពោះអ្នកណាស់”។
ខណៈកំពុងផ្សព្វផ្សាយការបើកដំណើរការវិទ្យុនេះ NUG ក៏បានជំរុញឱ្យអ្នកស្តាប់ទិញវិទ្យុនិងបើកស្តាប់តាមរលកធាតុអាកាសផងដែរដែលទំនងជាការប៉ុនប៉ងដើម្បីបញ្ចៀសការផ្តាច់អ៊ីនធឺណេតទាំងបង្ខំដោយរបបយោធា។
កម្មវិធីកាលពីថ្ងៃសុក្រត្រូវបានបញ្ចូលទៅក្នុងទំព័រហ្វេសប៊ុកផ្លូវការរបស់ក្រុមនេះ ប៉ុន្តែគេមិនច្បាស់ថាតើពួកគេអាចទទួលបានប្រេកង់វិទ្យុពីកន្លែងណាឬដោយរបៀបណានោះទេ។
របបយោធាបានចាត់ថ្នាក់ NUG ជា “ភេរវករ” ចឹងមានន័យថា ជនណាដែលនិយាយជាមួយពួកគេរួមទាំងអ្នកសារព័ត៌មាន អាចត្រូវបានចោទប្រកាន់ក្រោមច្បាប់ប្រឆាំងភេរវកម្ម។
អង្គការឃ្លាំមើលមួយបាននិយាយកាលពីថ្ងៃពុធថា កងកម្លាំងសន្តិសុខបានសម្លាប់ជនស៊ីវិលជាង ១.០០០ នាក់ចាប់តាំងពីខែកុម្ភៈ។
មេដឹកនាំរដ្ឋប្រហារលោកមីន អ៊ុងហ្លាំងបានបង្ហាញភាពត្រឹមត្រូវនៃការដណ្តើមអំណាចរបស់ខ្លួនដោយអះអាងថាមានការលួចបន្លំក្នុងការបោះឆ្នោតខែវិច្ឆិកាដែលឈ្នះដោយគណបក្ស NLD របស់លោកស្រីអ៊ុងសានស៊ូជី៕
