(ភ្នំពេញ)៖ លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ច បានថ្លែងបញ្ជាក់ថា វ៉ាក់សាំងគ្រប់ប្រភេទដែលមានការទទួលស្គាល់ ពីអង្គការសុខភាពពិភពលោក (WHO) អាចមានសមត្ថភាពបង្កើតកងការពារ ទប់ទល់ជាមួយមេរោគនៃជំងឺកូវីដ១៩គ្រប់ប្រភេទ រួមទាំងវីរុសបំប្លែងថ្មី ប្រភេទ Delta ផងដែរ។
ការថ្លែងរបស់លោកជំទាវ ឱ វណ្ណឌីន បានធ្វើឡើងនៅក្នុងឱកាសយកថវិការបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ប្រគល់ជូនដល់លោកតា អាយុ១០២ឆ្នាំ ដែលស្ម័គ្រចិត្ដចាក់វ៉ាក់សាំងបង្ការជំងឺកូវីដ១៩ នៅក្រុងកំពត ខេត្តកំពត នាព្រឹកថ្ងៃទី០២ ខែសីហា ឆ្នាំ២០២១។
លោកជំទាវ ឱ វណ្ណឌីន បញ្ជាក់យ៉ាងដូច្នេះថា៖ «ទោះជាយ៉ាងណាក៏ដោយ វ៉ាក់សាំងកូវីដ១៩ ដែលយើងកំពុងប្រើប្រាស់ ដែលស្ថិតក្នុងបញ្ជីប្រើប្រាស់បន្ទាន់របស់អង្គការ សុខភាពពិភពលោកនេះ នៅតែជាឧបករណ៍ ដែលមានសារៈសំខាន់សម្រាប់វាយបក ជាមួយនឹងវីរុសកូវីដ១៩ ទោះជាប្រភេទណាក៏ដោយ។ នេះជាអ្វីដែលគេសន្និដ្ឋាន ទោះបីយ៉ាងណាវ៉ាក់សាំងនៅតែមានសារៈសំខាន់ចំពោះបុគ្គលគ្រប់រូប»៕
