(បាងកក)៖ រដ្ឋមន្រ្តីការបរទេសថៃនាថ្ងៃអង្គារនេះ បាននិយាយថា ប្រទេសថៃបានត្រៀមលក្ខណៈ ដើម្បីទទួលយកមនុស្សបានរហូតដល់ ១០០,០០០នាក់ ដែលភៀសខ្លួនពីមីយ៉ាន់ម៉ា ខណៈការប្រយុទ្ធគ្នារវាងរដ្ឋាភិបាលយោធាមីយ៉ាន់ម៉ា និងក្រុមចលនាតស៊ូប្រឆាំងរបបសឹក នៅក្បែរតំបន់ព្រំប្រទល់រវាងប្រទេសទាំងពីរ កំពុងតែបន្ត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអង្គារ ទី៩ ខែមេសា ឆ្នាំ២០២៤។
រដ្ឋមន្រ្តីការបរទេសថៃ លោក Parnpree Bahiddha-Nukara បាននិយាយដូច្នេះថា «យើងបានត្រៀមលក្ខណៈមួយរយៈដែរមកហើយ ដោយយើងមានសមត្ថភាព អាចទទួលយកមនុស្សប្រមាណ១០០,០០០នាក់ ឱ្យមកស្នាក់នៅក្នុងតំបន់សុវត្ថិភាពរបស់ថៃ ជាបណ្តោះអាសន្ន»។ ប្រទេសថៃមានព្រំប្រទល់ប្រវែង២,៤០០គីឡូម៉ែត្រ ជាប់ជាមួយមីយ៉ាន់ម៉ា ដែលកំពុងស្ថិតក្នុងសង្រ្គាមស៉ីវិល ចាប់តាំងពីយោធា បានធ្វើរដ្ឋប្រហារទម្លាក់រដ្ឋាភិបាលស៉ីវិល កាលពីឆ្នាំ២០២១មក។
គួរបញ្ជាក់ថា ក្នុងរយៈពេលជាច្រើនខែមកនេះ កងកម្លាំងរបស់រដ្ឋាភិបាលយោធាមីយ៉ាន់ម៉ា បានប្រឈមនឹងការគំរាមកំហែងខ្លាំងធ្ងន់ធ្ងរបំផុត ស្របពេលដែលការប្រយុទ្ធគ្នា ជាមួយក្រុមចលនាតស៊ូប្រឆាំងរបបសឹក បានរីករាលដាលនៅប៉ែកជាច្រើននៃផ្ទៃប្រទេស ដល់បណ្តាតំបន់ដែលពីមុនធ្លាប់តែមានសន្តិភាព។ កាលពីចុងសប្តាហ៍កន្លងទៅ មានសេចក្តីរាយការណ៍ អំពីការប៉ះទង្គិចគ្នាខ្លាំងនៅក្បែរក្រុង Myawaddy របស់មីយ៉ាន់ម៉ា ដែលនៅជាប់ក្រុង Mae Sot របស់ថៃ។ ក្នុងថ្ងៃអង្គារនេះ នាយករដ្ឋមន្រ្តីថៃ លោក Srettha Thavisin និងក្រុមមន្រ្តីជាន់ខ្ពស់ថៃ ក៏បានបើកកិច្ចប្រជុំស្តីពីបញ្ហាព្រំដែនជាប់មីយ៉ាន់ម៉ា ផងដែរ៕
