(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានលើកទឹកចិត្តឱ្យកងទ័ពកម្ពុជា និងសិង្ហបុរី បន្តពង្រឹងកិច្ចសហប្រតិបត្តិការជាមួយគ្នា។ ជាពិសេសចែករំលែកបទពិសោធន៍ ព័ត៌មាន និងលើកម្ពស់ការអភិវឌ្ឍន៍ធនធានមនុស្សក្នុងវិស័យកងទ័ពរវាងប្រទេសទាំងពីរ។
សម្តេចតេជោ បានលើកឡើងបែបនេះក្នុងជំនួបជាមួយឧត្តមសេនីយ៍ទោ ដេវីត នេអូ (David Neo) មេបញ្ជាការកងទ័ពជើងគោកសិង្ហបុរី នាព្រឹកថ្ងៃអង្គារ ទី២៨ ខែកុម្ភៈនេះ នៅវិមានសន្តិភាព។
លោក អ៊ាង សុផល្លែត ជំនួយការផ្ទាល់របស់សម្តេចតេជោនាយករដ្ឋមន្ត្រី បានឱ្យដឹងថា ក្នុងជំនួប នោះ លោក នេអូ បានសម្ដែងនូវក្ដីរីករាយចំពោះទំនាក់ទំនង និងកិច្ចសហប្រតិបត្តិការល្អរវាង ប្រទេសកម្ពុជា និងសិង្ហបុរី ជាពិសេសរវាងកងទ័ព និងកងទ័ពនៃប្រទេសទាំងពីរ។
លោកឧត្តមសេនីយ៍ទោ ក៏បានជម្រាបជូនសម្ដេចតេជោពីដំណើរទស្សនកិច្ចរបស់លោកនៅកម្ពុជា។ ក្នុងនោះ លោកបានជួបពិភាក្សាជាមួយឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកង យោធពលខេមរភូមិន្ទ និងជាមេបញ្ជាការកងទ័ពជើងគោក កាលពីថ្ងៃទី២៧ ខែកុម្ភៈ។ ក្នុងជំនួបមេកងទ័ពជើងគោកប្រទេសទាំងពីរ បានកំណត់គោលដៅកិច្ចសហប្រតិបត្តិការនៅពេលខាងមុខ ឱ្យកាន់តែខ្លាំងឡើងថែមទៀត។
សម្ដេចតេជោ ហ៊ុន សែន បានវាយតម្លៃខ្ពស់ចំពោះកិច្ចសហប្រតិបត្តិការរវាងកងទ័ពប្រទេសទាំងពីរ។ សម្ដេចតេជោ ក៏បានលើកទឹកចិត្តឱ្យកងទ័ពទាំងពីរ បន្តកិច្ចសហប្រតិបត្តិការ ហើយចែក រំលែកបទពិសោធន៍ ព័ត៌មាន និងវិស័យអភិវឌ្ឍន៍ធនធានមនុស្សក្នុងជួរកងទ័ពនៃប្រទេសទាំង ពីរផងដែរ៕
