(ភ្នំពេញ)៖ ព្រឹកថ្ងៃសុក្រ ទី២៤ ខែកុម្ភៈ ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រី កម្ពុជា អញ្ជើញជាអធិបតីក្នុងពិធីប្រគល់សញ្ញាបត្រជូននិស្សិតសាកលវិទ្យាល័យភូមិន្ទភ្នំពេញជាង ៧ពាន់នាក់ បន្ទាប់ពីពួកគេបញ្ចប់ការសិក្សាដោយជោគជ័យ។
និស្សិតជ័យលាភីដែលទទួលសញ្ញាបត្រនេះ មានថ្នាក់បរិញ្ញាបត្រ និងបរិញ្ញាបត្រជាន់ខ្ពស់ ក្នុងឆ្នាំ សិក្សា២០១៨-២០១៩ និងឆ្នាំសិក្សា២០១៩-២០២០ សរុបចំនួន ៧,០២១នាក់ នារី ៣,៧០១ នាក់។ សម្តេចតេជោនាយករដ្ឋមន្ត្រី ជាមេដឹកនាំដែលបានយកចិត្តទុកដាក់ខ្ពស់លើការអប់រំ ដើម្បី បណ្តុះធនធានមនុស្សរួមចំណែកកសាងសង្គមកម្ពុជា។ សម្តេចតេជោ តែងតែឆ្លៀតពេលវេលា ដ៏មមាញឹកក្នុងកិច្ចការដឹកនាំប្រទេស អញ្ជើញជាជាអធិបតី ឬប្រគល់សញ្ញាបត្រដល់និស្សិត ដែល បញ្ចប់ការសិក្សានៅតាមសាកលវិទ្យាល័យនានាទាំងរដ្ឋ និងឯកជន។
ការអញ្ជើញរបស់សម្តេចតេជោ ហ៊ុន សែន ផ្តល់កិត្តិយសប្រគល់សញ្ញាបត្រដល់និស្សិត បានឆ្លុះបញ្ចាំងពីការយកចិត្តទុកដាក់ខ្ពស់ចំពោះវិស័យអប់រំ និងជាការលើកទឹកចិត្តដល់ថ្នាក់ដឹកនាំ សាស្រ្តាចារ្យ បុគ្គលិក និងនិស្សិតទាំងអស់ នៃសាកលវិទ្យាល័យភូមិន្ទភ្នំពេញ ឱ្យកាន់តែមានភាពកក់ក្តៅទ្វេឡើងថែមទៀត ក្រោមម្លប់នៃសន្តិភាពនិងការអភិវឌ្ឍ។
យោងតាមរបាយការណ៍ បានឱ្យដឹងថា សាកលវិទ្យាល័យភូមិន្ទភ្នំពេញ ជាគ្រឹះស្ថានឧត្តមសិក្សាសាធារណៈ និងមានតួនាទីដ៏សំខាន់ ក្នុងការបណ្តុះបណ្តាលធនធានមនុស្ស ដើម្បីបម្រើឱ្យការអភិវឌ្ឍសង្គម សេដ្ឋកិច្ចកម្ពុជា។ គិតចាប់តាំងពីឆ្នាំ១៩៨០ មកទល់ឆ្នាំសិក្សា២០១៩-២០២០ និស្សិតបានបញ្ចប់ការសិក្សាសរុប ៥៤,៧០៦នាក់ (នារី ២០,៧៣៨នាក់)។ ក្នុងនោះមាននិស្សិតអាហារូបករណ៍សរុប ១៩,៧៨៦នាក់ (នារី ៦,១៦១នាក់) និងនិស្សិតជ័យលាភីអាហារូបករណ៍សម្តេចតេជោ និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សរុប ៩៧នាក់ (នារី ៦៣ នាក់)។
ក្នុងឆ្នាំសិក្សា ២០២២-២០២៣នេះ និសិ្សតកំពុងសិក្សាសរុប ១៩,៨៦៤នាក់ (នារី ១១,២២៥ នាក់) ក្នុងនោះនិស្សិតអាហារូបករណ៍សម្តេចតេជោ និងសម្តេចកិត្តិព្រឹទ្ធបណ្ឌិត សរុប ២៤៩នាក់ (នារី ១៣៩នាក់)។
បច្ចុប្បន្នសាកលវិទ្យាល័យភូមិន្ទភ្នំពេញ គឺជាគ្រឹះស្ថានសាធារណៈរដ្ឋបាល ដែលអាចឱ្យសាកលវិទ្យាល័យមានស្វ័យភាពក្នុងកិច្ចការរដ្ឋបាល, ហិរញ្ញវត្ថុ, និងការងារស្រាវជ្រាវ។ សាកលវិទ្យាល័យមានមហាវិទ្យាល័យចំនួន០៥ និងវិទ្យាស្ថានចំនួន០២ រួមមាន មហាវិទ្យាល័យវិទ្យាសាស្រ្ត, មហាវិទ្យា ល័យសង្គមសាស្រ្ត-មនុស្សសាស្រ្ត, មហាវិទ្យាល័យសិក្សាអភិវឌ្ឍន៍, មហាវិទ្យាល័យវិស្វកម្ម, មហាវិទ្យាល័យអប់រំ, វិទ្យាស្ថានភាសាបរទេស, និងវិទ្យាស្ថានសិក្សាអន្តរជាតិ និងគោលនយោបាយសាធារណៈ។
នៅពេលខាងមុខនេះ សាកលវិទ្យាល័យគ្រោងបើក «វិទ្យាស្ថានសិក្សាបរិស្ថាន» ដែលមានទីតាំងនៅសាកលវិទ្យាល័យភូមិន្ទភ្នំពេញ មណ្ឌល៣ នៅក្បែរវិមានឈ្នះឈ្នះ ដែលទីតាំងនេះរាជរដ្ឋាភិបាល បានផ្តល់ជូនបន្ថែមដល់សាកលវិទ្យាល័យភូមិន្ទភ្នំពេញ។
ក្រៅពីការងារបណ្តុះបណ្តាលនិស្សិត សាកលវិទ្យាល័យ បានធ្វើកិច្ចសហប្រតិបត្តិការជាមួយសាកលវិទ្យាល័យបរទេសល្បីៗ ដើម្បីលើកកម្ពស់គុណភាពនៃការបណ្តុះបណ្តាលឲ្យកាន់តែប្រសើរឡើង។ គិតត្រឹមឆ្នាំសិក្សា២០២២-២០២៣ នេះ សាកលវិទ្យាល័យបានចុះហត្ថលេខាលើអនុស្សារណៈ នៃការយោគយល់គ្នាជាមួយសាកលវិទ្យាល័យដៃគូ និងស្ថាប័នផ្សេងៗទាំងក្នុងស្រុក និងក្រៅស្រុកសរុប២៣៩ ដើម្បីធ្វើការផ្លាស់ប្តូរនិស្សិត និងសាស្រ្តាចារ្យទៅវិញទៅមក លើការងារសិក្សា, ការងារ បង្រៀន, និងការងារស្រាវជ្រាវ។
ជាមួយគ្នានេះ សាកលវិទ្យាល័យបានលើកទឹកចិត្ត និងជំរុញការងារស្រាវជ្រាវ ដោយរាប់ចាប់ពីឆ្នាំ២០០៨ មកទល់បច្ចុប្បន្ន។ សាកលវិទ្យាល័យ បានបោះពុម្ពផ្សាយអត្ថបទស្រាវជ្រាវកម្រិត អន្តរជាតិ បានចំនួន ៣០៥អត្ថបទ, បោះពុម្ពផ្សាយក្នុងស្រុកបានចំនួន ៤០អត្ថបទ, និងបោះពុម្ពក្នុង Journal របស់សាកលវិទ្យាល័យភូមិន្ទភ្នំពេញបានចំនួន ៨៦អត្ថបទ។
ចាប់ពីឆ្នាំ២០១៦មក សាកលវិទ្យាល័យបានផ្តល់ថវិកាប្រមាណ ១០ម៉ឺនដុល្លារ ជារៀងរាល់ឆ្នាំ សម្រាប់ពង្រឹងកិច្ចការស្រាវជ្រាវរបស់និស្សិត និងសាស្ត្រាចារ្យ។ ដោយឡែកក្នុងឆ្នាំ២០២២ សាកលវិទ្យាល័យបានបញ្ចប់គម្រោងស្រាវជ្រាវចំនួន ២៥ និងមានគម្រោងស្រាវជ្រាវចំនួន១៩ កំពុងដំណើរការ។ សាកលវិទ្យាល័យបានចូលរួមក្នុងកម្មវិធីសង្គមមួយចំនួនដូចជា៖ សកម្មភាពសប្បុរសធម៌, កាកបាទក្រហម, និងការផ្តល់សេវាសហគមន៍នានា តាមរយៈការបញ្ជូនយុវជន ឱ្យចូលរួមក្នុងសកម្ម ភាពសង្គម, ការបរិច្ចាគឈាម, ការបណ្តុះបណ្តាលពីសុវត្ថិភាពចរាចរណ៍, ការបំបាត់អំពើហឹង្សា ក្នុងគ្រួសារ និងកម្មវិធីអង្គរសង្រ្កាន្ត។ល។
ក្រៅពីនេះ សាកលវិទ្យាល័យបានដំណើរការមជ្ឈមណ្ឌលសំខាន់ៗ រួមមាន៖ មជ្ឈមណ្ឌលសហប្រតិបត្តិការកម្ពុជា-ជប៉ុន, មជ្ឈមណ្ឌលសហប្រតិបត្តិការកម្ពុជា-កូរ៉េ, មជ្ឈមណ្ឌលផលិតកម្មឌីជីថលកម្ពុជា-ជប៉ុន, មជ្ឈមណ្ឌលសូត្រខ្មែរ, និងអគារស្ទែម។ ក្នុងនោះ មជ្ឈមណ្ឌលផលិតកម្មឌីជីថលកម្ពុជា-ជប៉ុន ត្រូវបានសម្ពោធដាក់ឲ្យប្រើប្រាស់ជាផ្លូវការនៅ ឆ្នាំ២០២២ និងមានតួនាទីបណ្តុះបណ្តាលធនធានមនុស្សលើវិស័យផលិតកម្មឌីជីថល។
មជ្ឈមណ្ឌលសូត្រខ្មែរ ត្រូវបានសម្ពោធដាក់ឲ្យប្រើប្រាស់ជាផ្លូវការនៅឆ្នាំ២០១៩ និងមានតួនាទីធ្វើ ការស្រាវជ្រាវពីដើមមន ដង្កូវនាង និងផលិតជាអំបោះសូត្រ ព្រមទាំងបានចែកចាយពងដង្កូវនាង និងបង្រៀនកសិករពីការចិញ្ចឹមដង្កូវនាងផងដែរ។
នៅចុងឆ្នាំ២០២៣នេះ អគារ «មជ្ឈមណ្ឌលជាតិបណ្តុះធុរកិច្ចថ្មីនៃកម្ពុជា» នឹងត្រូវបញ្ចប់ការសាងសង់ ដើម្បីបង្កើតប្រព័ន្ធជំរុញពាណិជ្ជកម្មរវាងសាកលវិទ្យាល័យ និងឧស្សាហកម្មនៅកម្ពុជា ក្រោមគម្រោងគាំទ្រដោយរដ្ឋាភិបាលនៃសាធារណរដ្ឋកូរ៉េ។
បច្ចុប្បន្នសាកលវិទ្យាល័យភូមិន្ទភ្នំពេញកំពុងអនុវត្តគម្រោងធំៗចំនួនពីរគឺ៖ គម្រោងកែលម្អការអប់រំឧត្តមសិក្សា ដែលផ្តោតទៅលើការរៀន និងបង្រៀន, ការស្រាវជ្រាវ ,និង ការពង្រឹងស្ថាប័ន និង គម្រោងទេ្វភាគីស៊ុយអ៊ែត-សាកលវិទ្យាល័យភូមិន្ទភ្នំពេញ ដែលផ្តោតទៅ លើការពង្រឹងសមត្ថភាពផ្នែកស្រាវជ្រាវ, និងអភិវឌ្ឍហេដ្ឋារចនាសម្ព័ន្ធផ្នែក ICT នៅសាកលវិទ្យា ល័យភូមិន្ទភ្នំពេញ៕
