(វ៉ាស៊ីនតោន)៖ តាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអាទិត្យ ទី២៥ ខែធ្នូ ឆ្នាំ២០២២ បញ្ជាក់ថា ព្យុះព្រិលដ៏អាក្រក់មួយ បានបណ្ដាលឱ្យផ្ទះ និងហាងទំនិញរាប់សែនខ្នង គ្មានអគ្គិសនីប្រើប្រាស់នៅទូទាំងសហរដ្ឋអាមេរិក ខណៈមនុស្ស១៨នាក់បានស្លាប់ ដោយសារគ្រោះ ថ្នាក់ដែលមានជាប់ពាក់ព័ន្ធនឹងព្យុះព្រិលនេះ។
ព្យុះព្រិលឈ្មោះ «bomb cyclone» ក៏បានបង្ខំឱ្យមានការលុបចោលជើងហោះហើរជាង ៣,០០០ ជើងផងដែរ កាលពីថ្ងៃសៅរចុងសប្ដាហ៍នេះ បន្ទាប់ពីជើងហោះហើរ ៥,៧០០ជើង ត្រូវបានលុប ចោលកាលពីថ្ងៃសុក្រកន្លងទៅនេះ ដែលធ្វើឱ្យអ្នកដំណើររាប់ពាន់នាក់ត្រូវជាប់គាំង នៅនាទីចុង ក្រោយនៃការស្វាគមន៍ពីបុណ្យណូអែល ចូលមកដល់។ សីតុណ្ណភាពបានធ្លាក់ចុះទាបគួរឱ្យព្រួយបារម្ភនៅតាមផ្នែកមួយចំនួននៃសហរដ្ឋអាមេរិក ក្នុងនោះ រួមមានទាំងរដ្ឋធានីវ៉ាស៊ីនតោន។ ចំណែកឯ ប្រព័ន្ធផ្គត់ផ្គង់ អគ្គិសនីនៅទូទាំងសហរដ្ឋអាមេរិក ត្រូវគាំងដំណើរការដោយសារតែតម្រូវការអគ្គិសនីខ្ពស់ពេកសម្រាប់ម៉ាស៊ីនកម្ដៅ និងការខូចខាត បណ្ដាញផ្គត់ផ្គង់អគ្គិសនីបង្កឡើងដោយ ព្យុះព្រិលនេះ។
គួរបញ្ជាក់ថា បើតាមគេហទំព័រ Poweroutage.us ផ្ទុះ និងហាងទំនិញយ៉ាងហោច ៣០០,០០០ខ្នង គ្មានអគ្គិសនីប្រើប្រាស់ គិតត្រឹមល្ងាចថ្ងៃសៅរ៍ (ម៉ោងនៅអាមេរិក) ហើយបើទោះជាតួលេខនេះមាន ការថយចុះបើធៀបទៅនឹងប៉ុន្មានថ្ងៃមុនក៏ដោយ ក៏ក្រុមហ៊ុនផ្គត់ផ្គង់អគ្គិសនីនៅតែបន្តស្នើឱ្យ ប្រជាជនសន្សំសំច្ចៃ ដោយកាត់បន្ថយការប្រើ អំពូលភ្លើងដែលមិនចាំបាច់៕
