(ភ្នំពេញ)៖ ផ្លែមៀនប៉ៃលិនស្រស់របស់កម្ពុជា ត្រូវបាននាំយកទៅដាក់លក់ជាផ្លូវការ នៅលើទីផ្សារ អនឡាញប្រទេសចិន នៅក្នុង Alibaba Group កាលពីពេលថ្មីៗ បន្ទាប់ពីអនុញ្ញាតឱ្យនាំចូល ទៅប្រទេសចិនជាផ្លូវការ។
លោក នាង សំរិតកុមារ អគ្គកុងស៊ុលកម្ពុជាប្រចាំទីក្រុងសៀងហៃប្រទេសចិន បានប្រាប់ នៅថ្ងៃ ទី២១ ខែធ្នូនេះថា មៀនប៉ៃលិនកម្ពុជា បានចាប់ផ្តើមសម្ពោធដាក់លក់ នៅលើទីផ្សារអនឡាញរបស់ Alibaba Group កាលពីថ្ងៃពី១២ ខែធ្នូ ឆ្នាំ២០២២ នៅទីក្រុងហាន់ចូវ ខេត្តជឺជាំង ប្រទេសចិន ដែលទីក្រុងនេះ គឺជាកន្លែងបោះដុំផ្លែឈើដ៏ធំមួយ នៅក្នុងប្រទេសចិន ដោយសារមៀនប៉ៃលិន គោរពតាមបទដ្ឋានភូមគាមអនាម័យ មានស្តង់ដារសុវត្ថិភាព ស្របពេលកម្ពុជាមានកិច្ចព្រមព្រៀង សេរីពាណិជ្ជកម្មជាមួយចិន។
លោកបន្ថែមថា តាមរយៈការផ្សព្វផ្សាយផលិតផលកម្ពុជា លើបណ្តាញឌីជីថលរបស់ចិន នឹងធ្វើឱ្យ អ្នកប្រើប្រាស់នៅចិន កាន់តែច្រើនអាចស្គាល់ផលិតផលកសិកម្មកម្ពុជា ព្រោះចិនជាទីផ្សារធំដែល មានប្រជាជនជាង ១៤០០លាននាក់។ ហើយថ្ងៃខាងមុខ ផលិតផលខ្មែរផ្សេងទៀត ដូចជាស្វាយ និងចេក ក៏នឹងមានវត្តមាននៅលើទីផ្សារនេះផងដែរ។ តាមរយៈទីផ្សារនេះ នឹងផ្តល់ប្រយោជន៍កាន់ តែច្រើនដល់កសិករខ្មែរ ខណៈក្រុមហ៊ុន Alibaba Group មានគម្រោងនាំចូលផ្លែមៀនប៉ៃលិនពី កម្ពុជាក្នុងមួយឆ្នាំ ចំនួនជាង៣០០តោន សម្រាប់ដាក់លក់ផងដែរ។
លោក Brian Jiang នាយកផ្នែកបញ្ជាទិញសកល របស់ក្រុមហ៊ុន Shanghai Grandfruit Import & Export ដែលបាននាំចូលមៀនប៉ៃលិន ទៅប្រទេសបានឱ្យដឹងថា ផ្លែមៀនស្រស់របស់កម្ពុជា បាននាំមកដល់ក្រុងសៀងហៃ ប្រទេសចិន សម្រាប់ដាក់លក់នៅថ្ងៃទី១២ ខែធ្នូ ឆ្នាំ២០២២ ក្នុង ផ្សារផ្លែឈើ Jiaxing បានលក់អស់ជាង១៨តោន ក្នុងថ្ងៃទី១៥ ខែធ្នូ ឆ្នាំ២០២២ ដែលនេះជាសញ្ញាល្អមួយសម្រាប់ធុរជននៃប្រទេសទាំងពីរ ក្នុងការវិនិយោគ និងពង្រឹងអាជីវកម្មរបស់ខ្លួន លើការនាំផ្លែឈើស្រស់ពីកម្ពុជា។
ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ដែលបានថ្លែងតាមរយៈប្រព័ន្ធវីដេអូ នៅវេទិកា ពាណិជ្ជកម្មពិភពលោកអេឡិចត្រូនិក (eWTP) មានប្រសាសន៍ថា ភាពជាដៃគូ នៃវេទិកា eWTP រវាងកម្ពុជា និង Alibaba Group នឹងសម្រេចបានលទ្ធផលជាផ្លែផ្កា និងនាំមកនូវអត្ថប្រយោជន៍កាន់ តែច្រើនដល់ប្រជាជនកម្ពុជា-ចិន និងបង្កើនការនាំរបស់កម្ពុជា។
ផ្លែមៀនស្រស់ គឺជាផលិតផលកសិផលទី៣ របស់កម្ពុជា ដែលនាំចេញទៅលក់នៅលើទីផ្សារ ប្រទេសចិនជាផ្លូវការ នៅក្នុងឆ្នាំ ២០២២ នេះ បន្ទាប់ពីផ្លែស្វាយ និងចេក។
លោក ភត់ សុផាន់បូរី ប្រធានក្រុមប្រឹក្សាភិបាលក្រុមហ៊ុន ពេជ្រចិន្តា ដែលជាក្រុមហ៊ុនសម្អាត កែច្នៃ និងវេចខ្ចប់ផលិតផលមៀនប៉ៃលិន បានប្រាប់ថា ការនាំយកផលិតផលមៀនប៉ៃលិនរបស់កម្ពុជា ដាក់លក់នៅលើទីផ្សារអនឡាញ Alibaba នឹងជួយលើកកម្ពស់ផលិតផលមៀនប៉ៃលិនកម្ពុជា ក៏ដូច ជាធ្វើឱ្យអន្តរជាតិកាន់តែស្គាល់ពីផលិតផលនេះ ព្រោះវេបសាយ Alibaba មិនមែនប្រើប្រាស់ សម្រាប់ប្រជាជនចិននោះទេ គឺមានការទទួលស្គាល់ស្ទើរតែទូទាំងសាកលលោក។ ការដាក់លក់មៀនប៉ៃលិន នៅក្នុងទីផ្សារ Alibaba នឹងជំរុញឱ្យបណ្តាប្រទេសដ៏ទៃ ទទួលស្គាល់ពី គុណភាពមៀនប៉ៃលិនកម្ពុជាដែរ ខណៈបច្ចុប្បន្នមានក្រុមហ៊ុនមួយចំនួនពីប្រទេសចិន ថៃ ម៉ាឡេ ស៊ីជាដើម ចង់មកសហការដើម្បីនាំចេញមៀនប៉ៃលិនផងដែរ។
លោកបន្តថា «ឥលូវនេះ កំពុងតែមានដៃគូមកចរចា ក៏ប៉ុន្តែយើងមិនទាន់ថា គ្រោងនឹងផ្គត់ផ្គង់ឱ្យមួយ ណាទេ ព្រោះយើងកំពុងដំណើរការធ្វើឱ្យរួចរាល់។ ណាមួយយើងជាក្រុមហ៊ុនខ្មែរ យើងខ្វះទុនក្នុង ការពង្រីក និងពង្រឹង ក៏ប៉ុន្តែផែនការយើងកំពុងធ្វើរាល់ថ្ងៃ បើយើងធ្វើរួចរាល់ ក្នុងមួយថ្ងៃយើងអាច ផ្គត់ផ្គង់បានចន្លោះពី៦០តោន ទៅ៩០តោន។ […] មានក្រុមហ៊ុនចិន ម៉ាឡេស៊ី និងក្រុមហ៊ុនមក ពីក្រៅផ្សេងៗទៀត ប៉ុន្តែគេតម្រូវឱ្យផ្ញើគំរូក្នុងការពិសោធន៍ផលប៉ះពាល់ ពីរបាំងបច្ចេកទេសនៅ ប្រទេសនីមួយៗ ដូចជានៅជប៉ុន សិង្ហបុរី គឺការបរិភោគរបស់គេវាខុស ពីប្រទេសនីមួយៗ»។
បើតាមលោក លោក ភត់ សុផាន់បូរី ទិន្នផលមៀនប៉ៃលិន ក្នុងមួយឆ្នាំទទួលបានក្នុងរង្វង់ ១០ម៉ឺន តោន ហើយទិន្នផលនេះនឹងកើនឡើងចន្លោះពី១០%ទៅ១៥%។
សូមជម្រាបជូនថាចំការមៀនដែលទទួលបានការអនុម័តចុះបញ្ជីជាផ្លូវការឱ្យនាំចេញផ្លែមៀនទៅកាន់ទីផ្សារចិន មានចំនួន៧៤ ក្នុងនោះ នៅខេត្តប៉ៃលិនមានចំនួន ៤០ចំការ បាត់ដំបងចំនួន ២៨ចំការ និងបន្ទាយមានជ័យចំនួន ៦ចំការ។ ដោយឡែករោងចក្រវេចខ្ចប់ចំនួន៨ ដែលមានទីតាំងនៅក្នុង ខេត្តកណ្តាលចំនួន១ ខេត្តបាត់ដំបងចំនួន៣ ខេត្តប៉ៃលិនចំនួន២ និងខេត្តព្រះសីហនុចំនួន២។ រីឯផ្ទៃដីដាំដុះមៀនទូទាំងប្រទេសរបស់កម្ពុជាវិញ មានចំនួន ១៣ ៦០៨ហិកតា ស្ថិតក្នុងខេត្តចំនួន ៤៕
