កូរ៉េខាងជើង បាញ់កាំភ្លើងធំរាប់រយគ្រាប់ចូលសមុទ្រ ខណៈកូរ៉េខាងត្បូងធ្វើសមយុទ្ធយោធាប្រចាំឆ្នាំ

 (សេអ៊ូល)៖  តាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី១៩ ខែតុលា ឆ្នាំ២០២២ អោយដឹងថា យោធាកូរ៉េខាងត្បូង បានឱ្យដឹងថាកូរ៉េខាងជើងបានបាញ់កាំភ្លើងធំរាប់រយ គ្រាប់ ចូល សមុទ្រនៃតំបន់ឆ្នេរភាគខាងកើត និងខាងលិចរបស់ខ្លួន កាលពីថ្ងៃអង្គារសប្ដាហ៍នេះ ចំពេលភាព តានតឹងនៅលើតំបន់ឧបទ្វីបកូរ៉េឡើងកម្ដៅកាន់តែខ្លាំង។

នៅក្នុងសេចថ្លែងការណ៍មួយចេញផ្សាយនៅថ្ងៃពុធនេះ នាយសេនាធិការចម្រុះកងទ័ពកូរ៉េខាងត្បូង បានបញ្ជាក់ថាកូរ៉េខាងជើងបានបាញ់កាំភ្លើងធំប្រហែល ១០០គ្រាប់ ចូលក្នុងសមុទ្រនៃតំបន់ឆ្នេរ ភាគខាងកើត និង១៥០គ្រាប់ទៀត ចូលក្នុងសមុទ្រនៃតំបន់ឆ្នេរភាគខាងលិច នៅម៉ោងប្រមាណ ១០ព្រឹក កាលពីថ្ងៃអង្គារសប្ដាហ៍នេះ។

សូមបញ្ជាក់ថា ការបាញ់កាំភ្លើងធំរបស់កូរ៉េខាងជើង កើតមានឡើងបន្ទាប់ពីយោធាកូរ៉េខាងត្បូង ចាប់ផ្ដើមធ្វើសមយុទ្ធយោធាប្រចាំឆ្នាំរបស់ខ្លួន កាលពីថ្ងៃចន្ទ ដើមសប្ដាហ៍នេះ ដែលមានគោល បំណងពង្រឹងសមត្ថភាពឆ្លើយតបទៅនឹងការគំរាមកំហែងដោយមីស៊ីល និងអាវុធនុយក្លេអ៊ែររបស់ កូរ៉េខាងជើង។ សមយុទ្ធយោធានេះគ្រោងនឹងបញ្ចប់នៅថ្ងៃសៅរ៍ចុងសប្ដាហ៍នេះ៕