(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងលោកស្រី ល្វីស មូស៊ីគីវ៉ាបូ អគ្គលេខាធិការអង្គការអន្តរជាតិហ្វ្រង់កូហ្វូនី ក្នុងជំនួបនៅព្រឹកថ្ងៃទី២៩ ខែមីនា ឆ្នាំ២០២២នេះ បានឯកភាពរួមគ្នាពង្រឹងទំនាក់ទំនង សំដៅជំរុញពាណិជ្ជកម្ម និងការវិនិយោគ។ នេះបើតាម លោក អ៊ាង សុផល្លែត ជំនួយការផ្ទាល់សម្ដេចតេជោ ហ៊ុន សែន បានបញ្ជាក់ប្រាប់អ្នកសារព័ត៌មាន។
ឯកឧត្តម អ៊ាង សុផល្លែត បានបញ្ជាក់ថា នៅក្នុងជំនួបនេះ លោកស្រី ល្វីស មូស៊ីគីវ៉ាបូ បានលើក ឡើងថា សេដ្ឋកិច្ចកម្ពុជា គឺមានការទាក់ទាញខ្លាំង ហើយអាចជាគំរូ នៃការអភិវឌ្ឍលើវិស័យពាណិជ្ជ កម្ម សម្រាប់ប្រទេសនិយាយភាសាបារាំង។ ក្នុងជំនួបរវាងអ្នកវិនិយោគមកពី២៤ប្រទេសជាមួយនឹង អ្នកវិនិយោគកម្ពុជា លោកស្រីបានជម្រាបជូនសម្ដេចតេជោនាយករដ្ឋមន្ដ្រីថា គឺបានទទួលលទ្ធផល ល្អណាស់ មានការចាប់អារម្មណ៍ខ្លាំង ហើយក៏មានការចុះហត្ថលេខាលើអនុស្សរណៈដើម្បីបន្តកិច្ច សហប្រតិបត្តិការផងដែរ។
លោកស្រីអះអាងថា គោលបំណងរបស់លោកស្រី និងប្រតិភូមកកាន់កម្ពុជា ដែលពេលនេះ គឺចង់ បានកិច្ចសហប្រតិបត្តិការលើវិស័យវិនិយោគសេដ្ឋកិច្ចពាណិជ្ជកម្ម ដែលមានដំណើរការរីកធំធាត់ និងនិរន្ដន៍តទៅ ហើយដំណើរទស្សនកិច្ចរបស់លោកស្រីនាពេលនេះ គឺជាចំណុចចាប់ផ្ដើម សម្រាប់ កិច្ចសហប្រតិបត្តិការតទៅអនាគត។ ចំណុចនេះ លោកស្រីបានថ្លែងអំណរគុណយ៉ាងជ្រាលជ្រៅជូន ចំពោះ សម្តេចតេជោ ជូនចំពោះរាជរដ្ឋាភិបាល ដែលបានរៀបចំទទួលដំណើរទស្សនកិច្ចរបស់ប្រតិភូ អង្គការអន្តរជាតិហ្វ្រង់កូហ្វូនី។
ជាការឆ្លើយតប សម្តេចតេជោ ហ៊ុន សែន បានសម្ដែងនូវការអបអរសាទរចំពោះជោគជ័យ នៃជំនួប រវាងអ្នកវិនិយោគមកពីបណ្ដាប្រទេសនិយាយភាសាបារាំង និងអ្នកវិនិយោគកម្ពុជា។ សម្តេចតេជោ បានមានប្រសាសន៍ថា សេដ្ឋកិច្ច ពាណិជ្ជកម្ម និងវិនិយោគជាចំណុចស្នូល នៃកិច្ចសហប្រតិបត្តិការ រវាងភាគីទាំងពីរ។ សម្ដេចថា ប្រទេសយើង និងតំបន់យើងមានសក្ដានុពល គ្រាន់តែយើងមិនទាន់ មានឱកាសនៅឡើយប៉ុណ្ណោះ។
សម្ដេចតេជោនាយករដ្ឋមន្ដ្រី បានបន្ដថា ភាគីទាំងពីរគប្បីណារួមគ្នាបង្កឱកាស ដើម្បីចាប់យកសក្ដា នុពលទាំងឡាយណាដែលយើងមាននេះដើម្បីមិនត្រឹមតែពង្រីកពង្រឹងកិច្ចសហប្រតិបត្តិការរវាងប្រទេស និងតំបន់យើងទាំងពីរទេ តែសម្រាប់ជាទំនាក់ទំនងនយោបាយល្អរវាងប្រទេសយើងទាំងពីរ ផង និងតំបន់ផង ព្រោះថាទំនាក់ទំនងល្អលើវិស័យ សេដ្ឋកិច្ច ពាណិជ្ជកម្ម និងវិនិយោគ និងនាំទៅ ដល់ភាពស្ថិតជិតស្និទ្ធផ្នែកនយោបាយ។
ឆ្លៀតក្នុងឱកាសនោះ សម្ដេចតេជោ ក៏បានជម្រាបជូនលោកស្រីល្វីសថា ក្នុងនាមជាប្រធានអាស៊ាន អ្វីដែលសម្តេចតេជោចង់បាន គឺជំរុញការអនុវត្តអាស្តា និងអាស៊ីម ឲ្យទៅចលនាសេដ្ឋកិច្ច ពាណិជ្ជ កម្ម និងវិនិយោគ និងរបៀងដំណើរទេសចរណ៍នៅតំបន់អាស៊ាន មានដំណើរការប្រក្រតីភាពឡើង វិញ។ គួរជម្រាបថា អង្គការអន្តរជាតិហ្វ្រង់កូហ្វូនី ជាអង្គការ នៃប្រទេសនិយាយភាសាបារាំង ដែល ក្នុងនោះប្រទេសកម្ពុជាជាសមាជិកផងដែរ។ ក្នុងដំណើរទស្សនកិច្ចនៅកម្ពុជា លោកស្រី ល្វីស មូស៊ីគីវ៉ាបូ បានអញ្ជើញជួបមន្ត្រីរាជរដ្ឋាភិបាល និងវិស័យឯកជននៅកម្ពុជាផងដែរ ដើម្បីពង្រឹងទំនាក់ ទំនង និងកិច្ចសហប្រតិបត្តិការលើវិស័យនានា៕
