ឧត្តមសេនីយ៍អាម៉េរិកម្នាក់បាននិយាយថាយោធាអាម៉េរិកបានធ្វើឱ្យខូចលែងដំណើរការនូវយន្តហោះនិងរថពាសដែកជាច្រើនគ្រឿងព្រមទាំងប្រព័ន្ធការពាររ៉ុក្កែតបច្ចេកវិជ្ជាខ្ពស់នៅអាកាសយានដ្ឋានក្រុងកាប៊ុល មុនពេលចាកចេញកាលពីថ្ងៃចន្ទទី៣០សីហា។
មេបញ្ជាការនៃទីបញ្ជាការដ្ឋានកណ្តាល លោកឧត្តមសេនីយ៍ ខេនណេត ម៉ាកខេនហ្ស៊ី បាននិយាយថា យន្តហោះ៧៣ គ្រឿងដែលមាននៅអាកាសយានដ្ឋានអន្តរជាតិហាមីដកាហ្សៃត្រូវបានធ្វើឱ្យក្លាយជាយន្តហោះមិនមែនយោធាឬត្រូវបានចាត់ទុកថា “គ្មានប្រយោជន៍”ដោយកងទ័ពអាម៉េរិកមុនពេលពួកគេបញ្ចប់ការជម្លៀសចេញពីប្រទេសដែលគ្រប់គ្រងដោយតាលីបង់រយៈពេលពីរសប្តាហ៍មកនេះ។
លោកបាននិយាយថា”យន្តហោះទាំងនោះនឹងមិនអាចហោះហើរម្តងទៀតបានទេ…ពួកវានឹងមិនអាចដំណើរការដោយនរណាម្នាក់បានឡើយ។
ពួកវាភាគច្រើននឹងមិនអាចចាប់ផ្តើមធ្វើបេសកកម្មឡើងវិញបានឡើយ ប៉ុន្តែប្រាកដណាស់យន្តហោះទាំងនោះនឹងមិនអាចហោះហើរម្តងទៀតបានទេ”។
លោកបាននិយាយថា មន្ទីរបញ្ចកោណ ដែលបានបង្កើតកម្លាំងទ័ពជិត ៦.០០០ នាក់ដើម្បីកាន់កាប់និងដំណើរការអាកាសយានដ្ឋានក្រុងកាប៊ុល នៅពេលដែលការជម្លៀសបានចាប់ផ្តើមនៅថ្ងៃទី ១៤ ខែសីហា បានទុកចោលនូវរថពាសដែក MRAPប្រមាណ ៧០ គ្រឿង ដែលមានតម្លៃ ១ លានដុល្លារក្នុងមួយគ្រឿង ដែលខ្លួនធ្វើឱ្យខូចលែងដំណើរការមុនពេលចាកចេញ និងរថយន្ត Humveesចំនួន ២៧ គ្រឿង។
លោកបាននិយាយថា យានយន្តទាំងនេះនឹងមិនអាចបានប្រើដោយនរណាម្នាក់ទៀតនោះឡើយ។
សហរដ្ឋអាម៉េរិកក៏ទុកចោលនូវប្រព័ន្ធការពាររ៉ុក្កែត C-RAM ផងដែរ ដែលប្រើដើម្បីការពារអាកាសយានដ្ឋានពីការវាយប្រហារដោយគ្រាប់រ៉ុក្កែត។ប្រព័ន្ធនេះបានជួយទប់ទល់នឹងរ៉ុក្កែត ៥ គ្រាប់ពីក្រុមរដ្ឋអ៊ីស្លាមកាលពីថ្ងៃចន្ទ។លោកម៉ាកខេនហ្ស៊ីនិយាយថា “យើងបានជ្រើសរើសរក្សាប្រព័ន្ធទាំងនោះឱ្យដំណើរការរហូតដល់នាទីចុងក្រោយ” មុនពេលយន្តហោះអាម៉េរិកចុងក្រោយចាកចេញ។
វាជានីតិវិធីដ៏ស្មុគស្មាញនិងជានីតិវិធីដែលត្រូវការពេលវេលាច្រើនដើម្បីកម្ទេចប្រព័ន្ធទាំងនោះ។ ដូច្នេះយើងបានកម្ចាត់ចោលប្រព័ន្ធទាំងនោះដើម្បីកុំឱ្យវាត្រូវបានប្រើម្តងទៀត”៕
