ខេត្តកែប ៖ ក្រោយពីទទួលបានពាក្យបណ្ដឹងជាច្រើនពីបណ្ដាអង្គភាពមួយចំនួន និងជនរងគ្រោះជាច្រើននាក់ សមត្ថកិច្ចនគរបាល បានបើកការស្រាវជ្រាវរហូតដល់មានការឃាត់ខ្លួនបុរសម្នាក់ នៅព្រឹកថ្ងៃទី១៥ ខែធ្នូ ឆ្នាំ២០២០ នេះ នៅខេត្តកែប ជាកន្លែងដែលជនសង្ស័យេស់នៅ។
ការឃាត់ខ្លួនជនសង្ស័យឈ្មោះ ងិន ស៊ុយទ្រី ភេទប្រុស អាយុ២៥ឆ្នាំ ធ្វើឡើងនៅចំណុចភូមិកែប សង្កាត់កែប ក្រុងកែប ខេត្តកែប ដែលជាកន្លែងរស់នៅរបស់ជនសង្ស័យ។
តាមរបាយការណ៍សមត្ថកិច្ចបញ្ជាក់ថា យុវជនរូបនេះ មានចេតនាទុច្ចរិត បានបង្កើតគណនី facebook ក្លែងក្លាយជាច្រើនធ្វើការជេរប្រមាថ បរិហាកេរ្តិ៍ បំប៉ោងព័ត៌មានបំពុលសង្គម បង្កើតព័ត៌មានក្លែងក្លាយ ដើម្បីបរិហារកេរ្តិ៍លើថ្នាក់ដឹកនាំកំពូល តាំងពីព្រះមហាក្សត្រ សម្តេចនាយករដ្ឋមន្រ្តី អភិបាលខេត្ត រហូតដល់ស្នងការនគរបាលខេត្តមួយចំនួន ដោយគេបានសរសេរនូវភាសាអសុរោះ កាត់តរូបភាពលើគណនី Facebook ក្លែងក្លាយទាំងនោះ។
តាមចម្លើយរបស់ជនសង្ស័យឈ្មោះ ងិន ស៊ុយទ្រី បានសារភាពថា ខ្លួនពិតជាបានបង្កើតគណនីក្លែងក្លាយជាឈ្មោះរបស់នារី ទ្រី ស៊ាងម៉ី ជាឪពុក និងជាមិត្តភ័ក្កិរបស់នាងជាច្រើនទៀត ដើម្បីវាយប្រហារថ្នាក់ដឹកនាំកំពូលៗ ចេតនាដើម្បីទំលាក់កំហុសអោយនាង ទ្រី ស៊ាងម៉ី ព្រមទាំងមិត្តភក្កិ និងគ្រួសាររបស់នាង។
បច្ចុប្បន្ន នាយកដ្ឋានប្រឆាំងបទល្មើសបច្ចេកវិទ្យាសហការជាមួយស្នងការដ្ឋាននគរបាលខេត្តកែប កំពុងរៀបចំកសាងសំណុំរឿង ដើម្បីបញ្ជូនជនសង្ស័យ ទៅតុលាការតាមនីតិវិធី។
អគ្គស្នងការដ្ឋាននគរបាលជាតិ នាយកដ្ឋានជំនាញនគរបាលព័ត៌មានវិទ្យា ក៏ដូចជាតាមបណ្តាស្នងការដ្ឋាននគរបាលខេត្តនានា តែងតែក្រើនរំលឹកដល់អ្នកលេងបណ្តាញសង្គម សូមប្រើប្រាស់បណ្តាញសង្គមប្រកបដោយក្រមសីលធម៌ ជាពិសេសកុំប្រើប្រាស់បណ្តាញសង្គមធ្វើជាទីលានបញ្ចេញកំហឹងសងសឹកស្នេហា ដែលនាំឲ្យអាបឱនដល់ប្រពៃណីដ៏ផូរផង់របស់ជាតិ ហើយកុំព្យាយាមប្រើប្រាស់បណ្តាញសង្គម ដើម្បីប្រព្រឹត្តបទល្មើស ព្រោះមិនអាចគេចចេញពីសំណាញ់ច្បាប់បានឡើយ៕ (ប្រភព ៖ ស្នងការដ្ឋាននគរបាលខេត្តកែប)
