(ភ្នំពេញ)៖ សម្តេចតេជោ ហ៊ុន សែន បានលើកឡើងថា សម្តេចមិនត្រឹមតែយកជីវិតទៅដោះដូរជា មួយនឹងការរស់រានមានជីវិតរបស់ប្រជាពលរដ្ឋខ្មែរ និងសន្តិភាពពេញលេញប៉ុណ្ណោះទេ ប៉ុន្តែជីវិត របស់សម្តេច ក៏ត្រូវបានយកទៅដោះដូរទៅនឹងកំណែទម្រង់ផងដែរ។
ការបញ្ជាក់ជាថ្មីរបស់សម្តេចតេជោ បានធ្វើឡើងនៅក្នុងឱកាសដែលសម្តេច អញ្ជើញជាអធិបតី ប្រគល់សញ្ញាបត្រ ជូននិស្សិតវិទ្យាស្ថាន វ៉ាន់ដា ជិត៥ពាន់នាក់ នៅព្រឹកថ្ងៃទី២២ ខែមីនា ឆ្នាំ២០២៣។
សម្តេចតេជោ បានបញ្ជាក់ដូច្នេះថា៖ «ជីវិតរបស់ខ្ញុំក្នុងមួយជាតិនេះ មិនមែនត្រឹមយកក្បាលទៅដោះ ដូរជាមួយការរស់រានមានជីវិតរបស់ប្រជាជន ក្នុងការផ្តួលរំលំរបបប្រល័យពូជសាសន៍ប៉ុលពត ហើយ ក៏មិនមែនយកក្បាលរបស់ខ្ញុំទៅដោះដូរជាមួយនឹងសន្តិភាព ចន្លោះឆ្នាំ១៩៩៦ និងបញ្ចប់នៅឆ្នាំ ១៩៩៨នោះទេ ប៉ុន្តែក្បាលរបស់ខ្ញុំក៏ត្រូវបានដោះដូរជាមួយកំណែទម្រង់»។
សម្តេចតេជោ បានរំលឹកថា នៅក្នុងរបបប៉ុលពត, ភាពជាម្ចាស់កម្មសិទ្ធិអស់ទាំងដីធ្លី ផ្ទះសម្បែង ទ្រព្យសម្បត្តិផ្សេងៗ ត្រូវបានដកហូត។ ក្រោយរបបនេះដួលរលំ សម្តេចត្រូវកសាងប្រទេស និងធ្វើកំ ណែទម្រង់យ៉ាងលំបាក។ សម្តេចតេជោ ក៏បានរំលឹកផងដែរថា អ្វីដែលពិបាកជាងគេគឺកំណែទម្រង់ ដីធ្លី ដែលប្រែក្លាយពីដីរបស់រដ្ឋ ឱ្យទៅជាដីកម្មសិទ្ធិឯកជន គ្រប់គ្រងដោយឯកជន ដើម្បីពពួកគេ អាចកែលម្អ និងទទួលបានភាពជាម្ចាស់។ សម្តេចតេជោ ហ៊ុន សែន ក៏បានរំលឹកផងដែរ អំពីកំណែ ទម្រង់ខាងនយោបាយ និងសេដ្ឋកិច្ច ដែលសុទ្ធតែលំបាក។
ក្នុងការធ្វើកំណែទម្រង់នយោបាយដែលផ្តួចផ្តើមឱ្យមានការចរចាដើម្បីស្វែងរកសន្តិភាពពេញលេញនៅកម្ពុជា សម្តេចតេជោ ហ៊ុន សែន អះអាងថា ពេលនោះក៏មនុស្សមួយចំនួនមិនសូវយល់នោះ ឡើយ នៅក្នុងក្នុងនោះក៏មានអតីតរដ្ឋមន្ត្រីក្រសួងការពារជាតិ លោក កុយ ប៊ុនថា និងមនុស្សមួយ ចំនួនទៀត ដែលមិនចូលចិត្តសេដ្ឋកិច្ចឯកជន។ សម្តេចក៏បានលើកឡើងអំពីរបាយការណ៍ក្រសួងការពារជាតិ នាពេលកន្លងទៅដែលថា បើធ្វើការ ចរចា គឺស្មើនឹងលុបបំបាត់ចោលសមិទ្ធផលរបស់ជាតិ៕
