(កៀវ)៖ តាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី៣ ខែកុម្ភៈ ឆ្នាំ២០២៣ អោយដឹងថា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយកាលពីថ្ងៃ ព្រហស្បតិ៍សប្តាហ៍នេះថា ប្រទេសរបស់លោកដែលកំពុងបន្តរងគ្រោះដោយសារសង្រ្គាម ស័ក្តិសម នឹងទទួលបានការចាប់ផ្តើមកិច្ចចរចានៅក្នុងឆ្នាំនេះ ស្តីពីការចូលជាសមាជិករបស់សហភាពអឺរ៉ុប (EU)។
លោក ហ្សេលេនស្គី បានលើកឡើងដូចខាងលើ ក្រោយជួបជាមួយប្រធានគណៈកម្មការអឺរ៉ុប លោកស្រី អួរស៊ូឡា វ៉ុនដឺ លីយេន (Ursula von der Leyen) នៅរដ្ឋធានីកៀវ។ លោក ហ្សេលេន ស្គី បានបន្តថា ការធ្វើសមាហរណកម្មជាមួយសហភាពអឺរ៉ុប នឹងលើកទឹកចិត្តអ៊ុយក្រែនកាន់តែខ្លាំង ហើយផ្តល់កម្លាំងចិត្តដល់ពួកគេបន្ថែមទៀត ដើម្បីប្រយុទ្ធតស៊ូជាមួយកងកម្លាំងឈ្លានពានរបស់ រុស្ស៉ី។ នៅថ្ងៃសុក្រនេះ ទីក្រុងកៀវនឹងធ្វើជាម្ចាស់ផ្ទះរៀបចំ កិច្ចប្រជុំកំពូលមួយរវាងសហភាពអឺរ៉ុប និងអ៊ុយក្រែន។
គួរបញ្ជាក់ថា កាលពីខែមិថុនា ឆ្នាំ២០២២ ក្រុមមេដឹកនាំសហភាពអឺរ៉ុប បានផ្តល់ឋានៈជាបេក្ខភាព សមាជិក EU ដល់អ៊ុយក្រែន គឺប៉ុន្មានខែបន្ទាប់ពីប្រធានាធិបតីរុស្ស៉ី បានបញ្ជូនទ័ពចូលឈ្លានពាន ប្រទេសជិតខាងខ្លួន ដែលមាននិន្នាការគាំទ្រលោកខាងលិច។ ទោះជាបែបនេះក្តី ផ្លូវឆ្ពោះទៅរកការ ចូលជាសមាជិក EU ពេញលេញ គឺវែងឆ្ងាយនិងអាចប្រើពេលយូរឆ្នាំសម្រាប់ទីក្រុងកៀវ។ តួយ៉ាងកាលពីខែឧសភា ឆ្នាំមុន ប្រធានាធិបតីបារាំង លោក អេម៉ានុយអែល ម៉ាក្រុង បានព្រមានថា វាអាចនឹងប្រើពេលវេលាដល់ខ្ទង់រាប់ទសវត្សរ៍ឯណោះ មុនពេលអ៊ុយក្រែនបានបំពេញតាមលក្ខ ខណ្ឌគ្រប់បែបយ៉ាង ហើយក្លាយជាសមាជិក EU ពេញសិទ្ធិ៕
