(មូស្គូ)៖ យោងតាមការចេញផ្សាយដោយ ទីភ្នាកងារសារព័ត៌មាន AFP នៅថ្ងៃអាទិត្យ ទី២៥ ខែធ្នូ ឆ្នាំ២០២២ អោយដឹងថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានថ្កោលទោសលោកខាងលិច ចំពោះការព្យាយាម «បំបែក» រុស្ស៊ីជាផ្នែកតូចៗ នៅក្នុងបទសម្ភាសន៍មួយ ដែលចាក់ផ្សាយតាម ទូរទស្សន៍រដ្ឋ កាលពីល្ងាចថ្ងៃអាទិត្យនេះ។
លោក ពូទីន បាននិយាយថា «ចំណុចសំខាន់នៃរឿងទាំងអស់នេះ គឺជាគោលនយោបាយរបស់គូ ប្រជែងភូមិសាស្ត្រនយោបាយរបស់រុស្ស៉ី ដែលមានគោលបំណងបំបែកប្រទេសរុស្ស៊ីជាប្រវត្តិសាស្ត្រ»។
លោកបាននិយាយបន្តថា «ពួកគេ (លោកខាងលិច)បានព្យាយាម បំបែក និងគ្រប់គ្រង …ប៉ុន្តែ គោល ដៅរបស់យើងគឺអ្វីផ្សេងទៀត – ដើម្បីបង្រួបបង្រួមប្រជាជនរុស្ស៊ី»។
លោក ពូទីន បានប្រើគំនិតនៃ «រុស្ស៊ីជាប្រវត្តិសាស្ត្រ» ដើម្បីជជែកវែកញែកថា អ៊ុយក្រែន និងរុស្ស៊ី ដើមឡើយជាប្រទេសតែមួយ និងជាប្រជាជនតែមួយ ដោយបង្ហាញពីភាពត្រឹមត្រូវ ចំពោះការវាយ លុកលុយរយៈពេល ១០ខែរបស់គាត់នៅអ៊ុយក្រែន។
លោក ពូទីន បាននិយាយទៀតថា «យើងកំពុងធ្វើដំណើរក្នុងទិសដៅត្រឹមត្រូវ យើងកំពុងការពារផល ប្រយោជន៍ជាតិរបស់យើង ផលប្រយោជន៍របស់ប្រជាពលរដ្ឋ និងប្រជាជនរបស់យើង»។
ទោះជាយ៉ាងណា ប្រធានាធិបតីរុស្ស៉ីរូបនេះបានអះអាងម្តងទៀតថា ទីក្រុងម៉ូស្គូត្រៀមខ្លួនជាស្រេច ដើម្បីចរចា (ដើម្បីស្វែងរក) ដំណោះស្រាយដែលអាចទទួលយកបាន ជាមួយអ្នកលេងទាំងអស់ នៅក្នុងដំណើរការដើម្បីដោះស្រាយជម្លោះ។
គួរបញ្ជាក់ថា ប្រធានាធិបតីអ៊ុយក្រែន លោក Volodymyr Zelensky បានធ្វើដំណើរទស្សនកិច្ចក្រៅ ប្រទេសលើកដំបូងរបស់លោកទៅកាន់សហរដ្ឋអាមេរិក ចាប់តាំងពីការវាយលុកបានចាប់ផ្តើមនៅ ក្នុងខែកុម្ភៈ ដោយបានទទួលការសន្យាផ្តល់ការគ្រាំទ្រយ៉ាងមុតមាំ ពីប្រធានាធិបតីសហរដ្ឋអាមេរិក លោក Joe Biden រួមទាំងប្រព័ន្ធការពារដែនអាកាសដ៏ទំនើបរបស់មន្ទីរបញ្ចកោណផងដែរ៕
