(ព្រះសីហនុ)៖ នៅព្រឹកថ្ងៃទី១៦ ខែមីនា ឆ្នាំ២០២២នេះ កងកម្លាំងស្វ័យការពារជើងទឹកជប៉ុន បានធ្វើទស្សនកិច្ចពិនិត្យមើលសមិទ្ធផលនានា ដែលជាការអភិវឌ្ឍនៅមូលដ្ឋានកងទ័ពជើងទឹករាម ខេត្តព្រះសីហនុ។
ទស្សនកិច្ចរបស់កងកម្លាំងស្វ័យការពារជើងទឹកជប៉ុននេះ ដឹកនាំដោយ លោក Nogochi Yasushi មេបញ្ជាការកងពលធំបោសសម្អាតមីនទី១ នៃកងកម្លាំងស្វ័យការពារជើងទឹកជប៉ុន និងលោក មិកាមិ ម៉ាសាហ៊ីរ៉ូ អគ្គរដ្ឋទូតជប៉ុនប្រចាំនៅកម្ពុជា ក្រោមការស្វាគមន៍ដោយភាគីកម្ពុជា គឺឧត្តមនាវី ឯក អ៊ុក សីហា មេបញ្ជាការរងកងទ័ពជើងទឹក មេបញ្ជាការមូលដ្ឋានសមុទ្រ។
ក្នុងដំណើរមកកាន់មូលដ្ឋានទ័ពសមុទ្ររាមនេះ កងទ័ពជើងទឹកកម្ពុជា យកនាវារបស់ខ្លួនទៅទទួល កងកម្លាំងស្វ័យការពារជើងទឹកជប៉ុន នៅកំពង់ផែស្វយ័តក្រុងព្រះសីហនុ ដើម្បីធ្វើដំណើរតាមនាវា មកកាន់មូលដ្ឋានកងទ័ពជើងទឹករាម។ តាមរយៈការធ្វើដំណើរតាមកប៉ាល់នេះ គឺបានផ្តល់ឱកាសឱ្យ អគ្គរដ្ឋទូតជប៉ុន និងកងកម្លាំងស្វ័យការពារជើងទឹកជប៉ុន ពិនិត្យមើលសកម្មភាពនៅជុំវិញតំបន់រាម។
ជាមួយគ្នានេះ នៅពេលមកដល់មូលដ្ឋានកងទ័ពជើងទឹករា ម ឧត្តមនាវីឯក អ៊ុក សីហា បានធ្វើ ដំណើរដោយថ្មើរជើងជាមួយ អគ្គរដ្ឋទូតជប៉ុន និង លោក Nogochi Yasushi ពិនិត្យមើលសមិទ្ធ ផលនានា ដែលជាការអភិវឌ្ឍ នៅក្នុងមូលដ្ឋានកងទ័ពជើងទឹករាម។ បន្ទាប់មកភាគីទាំងពីរ បានជួប ពិភាក្សាគ្នា ដើម្បីពង្រឹងពង្រីកកិច្ចសហប្រតិបត្តិការកងទ័ពជើងទឹកប្រទេសទាំងពីរ ក៏ដូចជាកិច្ចសហ ប្រតិបត្តិការរវាង គណៈ កម្មា ធិការ ជាតិ សន្តិ សុខ លម្ហ សមុទ្រកម្ពុជា និងកងកម្លាំងស្វ័យការពារ ជើងទឹកជប៉ុនផងដែរ។ បន្ថែមពីនេះ នៅពេលមកដល់មូលដ្ឋានកងទ័ពជើងទឹករាម កងកម្លាំងស្វ័យ ការពារជើងទឹកជប៉ុន ក៏បានចុះពិនិត្យរោងជាង ដែលជាកន្លែងសម្រាប់ជួសជុលថែទាំនាវារបស់ កម្ពុជាផងដែរ។
សូមបញ្ជាក់ថា នាវាស្វ័យការពារជើងទឹកជប៉ុនចំនួនពីរគ្រឿង និងនាវិកប្រមាណ ២០០នាក់ បាន ចូលចតនៅកម្ពុជានាព្រឹកថ្ងៃអង្គារ ទី១៥ ខែមីនា ឆ្នាំ២០២២នេះ ដើម្បីអបអរសាទរខួប៣០ឆ្នាំនៃ ការបំពេញ បេសកកម្មរក្សាសន្តិភាពរបស់ជប៉ុននៅកម្ពុជា។ នាវាស្វ័យការពារជើងទឹកជប៉ុន ដែល ចូលមកសំចតនៅកម្ពុជានេះរួមមាន៖ នាវាដែលមានឈ្មោះថា JS URAGA និង JS HIRADO។ នាវា JS URAGA លេខ៤៦៣ ជាប្រភេទនាវាប្រឆាំងមីនមានបណ្ដោយ ១៤១ម៉ែត្រ ទទឹង ២២ ម៉ែត្រ ជម្រៅទឹក ៥.៤ម៉ែត្រ មានទម្ងន់ផ្ទុកជិត ៦ពាន់តោន និងមាននាវិកចំនួន ១២៦នាក់៕
