(កំពង់ធំ)៖ នៅថ្ងៃទី១២ ខែសីហា ឆ្នាំ២០២១នេះ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ច ចាក់វ៉ាក់សាំងបង្ការជំងឺកូវីដ១៩ បានបន្ដបេសកកម្មពេញមួយថ្ងៃទៀត ក្នុងការនាំយកអំណោយមនុស្សធម៌របស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ផ្ដល់ជូនអ្នកទី៨លាន នៃការចាក់វ៉ាក់សាំង និងលោកតា លោកយាយ អាយុ១០០ឆ្នាំឡើងដែលបានស្ម័គ្រចិត្តចាក់វ៉ាក់សាំង។
បេសកកម្មពេញមួយថ្ងៃនេះ គឺផ្ដើមចេញពីស្រុកសៀមប៉ាង ខេត្តស្ទឹងត្រែង ទីដែលរកឃើញអ្នកចាក់វ៉ាក់សាំងទី៨លាន ជាជនជាតិខ្មែរកាត់ឡាវ។ ទីនោះជាតំបន់ដាច់ស្រយាល នឹងត្រូវធ្វើដំណើរជាច្រើនម៉ោងទើបទៅដល់គោលដៅ។
អ្នកទី៨លាន ដែលបានស្ម័គ្រចិត្តចាក់វ៉ាក់សាំងបង្ការជំងឺកូវីដ១៩នេះ ឈ្មោះ ថឹង ថា អាយុ៥៦ឆ្នាំ ជនជាតិខ្មែរឡាវ រស់នៅភូមិដនឡុង ឃុំសេកុង ស្រុកសៀមប៉ាង ខេត្តស្ទឹងត្រែង។ រូបគាត់បានចាក់វ៉ាក់សាំងនៅថ្ងៃទី១០ ខែសីហា ឆ្នាំ២០២១។ អំណោយរបស់សម្ដេចតេជោ ហ៊ុន សែន ដែលបានផ្ដល់ជូននាឱកាសនោះ រួមមាន ថវិកាចំនួន១០លានរៀល និងគ្រឿងឧបភោគ បរិភោគជាច្រើនផ្សេងទៀតផងដែរ។
ក្រោយបញ្ចប់ការប្រគល់អំណោយជូនអ្នកទី៨លានភ្លាម ដោយមិនបង្អង់យូរឡើយលោកជំទាវ ឱ វណ្ណឌីន បានដឹកនាំក្រុមការងារធ្វើដំណើរឆ្ពោះទៅកាន់ខេត្តព្រះវិហារ ដើម្បីយកអំណោយប្រគល់ជូនលោកតាម្នាក់ ដែលមានអាយុ១០១ឆ្នាំ ក្រោយស្ម័គ្រចិត្តចាក់វ៉ាក់សាំងបង្ការជំងឺកូវីដ១៩។
លោកតាដែលស្ម័គ្រចិត្តចាក់វ៉ាក់សាំង ហើយទទួលបានអំណោយពីសម្ដេចតេជោ ហ៊ុន សែន នាឱកាសនេះ ឈ្មោះ ញ៉ិក យ៉ង់ អាយុ១០១ឆ្នាំ រស់នៅភូមិប្រធាតុ ឃុំចំរើន ស្រុកសង្គមថ្មី ខេត្តព្រះវិហារ។ ទីតាំងអាសយដ្ឋានរបស់លោកតា គឺស្ថិតនៅជើងភ្នំត្បែង នៃខេត្តព្រះវិហារ ដែលក្រុមការងារត្រូវធ្វើដំណើរជាច្រើនគីឡូម៉ែត្រទើបទៅដល់ទីនោះ។
ក្នុងនាមជាសេនាធិការជូនសម្ដេចតេជោនាយករដ្ឋមន្ដ្រី បន្ទាប់ពីប្រគល់អំណោយជូនលោកតាអាយុ១០១ឆ្នាំរួច លោកជំទាវ ឱ វណ្ណឌីន បានបន្ដដំណើរមកកាន់ខេត្តកំពង់ធំ ដើម្បីផ្ដល់អំណោយជូនលោកយាយ សុខ អេង អាយុ១០២ឆ្នាំ រស់នៅភូមិកន្ធាន ឃុំប្រឡាយ ស្រុកស្ទោង។
ក្រុមការងាររបស់លោកជំទាវ ឱ វណ្ណឌីន មិនទាន់ត្រឡប់ទៅរាជធានីភ្នំពេញភ្លាមនោះទេ នៅថ្ងៃទី១២ ខែសីហា ឆ្នាំ២០២១នេះ ពោលក្រុមការងារត្រូវសម្រាកនៅខេត្តកំពង់ធំយប់ ដើម្បីត្រៀមបន្ដដំណើរនៅថ្ងៃទី១៣ ខែសីហា ឆ្នាំ២០២១ស្អែក ទៅកាន់ស្រុកសណ្ដាន់ ដើម្បីផ្ដល់អំណោយជូនលោកតា លោកយាយ ២នាក់ទៀតផងដែរ ដែលមានអាយុចាប់ពី១០០ឆ្នាំឡើង។
គួរជម្រាបថា ក្នុងពិធីប្រគល់អំណោយរបស់សម្ដេចតេជោ ហ៊ុន សែន, លោកស្រី ឱ វណ្ណឌីន តែងតែបាននាំនូវការផ្ដាំផ្ញើសាកសួរសុខទុក្ខពីសំណាក់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ជូនលោកតា លោកយាយ ព្រមទាំងបានជម្រាបសាកសួរអំពីស្ថានភាពសុខភាពរបស់ពួកគាត់ ក្រោយពីចាក់វ៉ាក់សាំងបង្ការជំងឺកូវីដ១៩ផងដែរ។
លោកយាយ និងលោកតា ដែលបានចាក់វ៉ាក់សាំង បានថ្លែងអំណរគុណយ៉ាងជ្រាលជ្រៅជូនចំពោះ សម្ដេចតេជោនាយករដ្ឋមន្ដ្រី ដែលអនុញ្ញាតឲ្យគាត់បានចាក់វ៉ាក់សាំង និងបានផ្ដល់អំណោយជូនរូបគាត់នៅឱកាសនេះ៕
