(ភ្នំពេញ)៖ ភ្លាមៗ! សម្តេចតេជោ ហ៊ុន សែន គណបក្សប្រជាជនកម្ពុជា នៅយប់ថ្ងៃទី៣ ខែមករា ឆ្នាំ២០២៤នេះ បានប្រកាសស្វាគមន៍លោក សូ សមយុទ្ធ អតីតសមាជិកគណៈកម្មាធិការនាយក នៃអតីតគណបក្សសង្គ្រោះជាតិ ដែលស្នើសូមចូលរួមជីវភាពនយោបាយជាមួយ គណបក្សប្រជា ជនជាជនកម្ពុជា។
សម្តេចតេជោ ហ៊ុន សែន មានប្រសាសន៍បញ្ជាក់លើបណ្តាញ Telegram យ៉ាងដូច្នេះថា៖ «ក្នុងនាមគណបក្សប្រជាជនកម្ពុជាខ្ញុំសូមស្វាគមន៍យ៉ាងកក់ក្តៅចំពោះលោក ឡុង គឹមឃន (ឈ្មោះហៅក្រៅ សូ សមយុទ្ធ) ដែលសុំមកចូលរួមជីវភាពនយោបាយជាមួយគណបក្សប្រជាជន កម្ពុជា»។
សូមជម្រាបថា លោក ឡុង គឹមឃន អតីតសមាជិកគណៈកម្មាធិការនាយក នៃអតីតគណបក្ស សង្គ្រោះជាតិ នៅយប់នេះ បានផ្ញើលិខិតគោរពជូន សម្តេចតេជោ ហ៊ុន សែន ប្រធានគណបក្ស ប្រជាជនកម្ពុជា ដើម្បីស្នើសូមចូលរួមជីវភាពនយោបាយជាមួយ គណបក្សប្រជាជនជាជនកម្ពុជា។
លិខិតដែលទទួលបាន បញ្ជាក់យ៉ាងដូច្នេះថា៖ «ខ្ញុំបាទសូមគោរពជម្រាបជូន សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានក្រុមឧត្តមប្រឹក្សាព្រះមហាក្សត្រ នៃព្រះរាជា ណាចក្រកម្ពុជា មេត្តាជ្រាបដ៏ខ្ពង់ខ្ពស់ថា ក្នុងរយៈពេលជាង១០ឆ្នាំ នៃជីវិតនយោបាយ និងឆ្លងកាត់ វ័យ ៤០ឆ្នាំកន្លងមកនេះ ខ្ញុំបាទបានមើលឃើញយ៉ាងច្បាស់ថា មានតែគណបក្សប្រជាជនកម្ពុជា តែមួយគត់ ដែលមាននយោបាយច្បាស់ កម្លាំងនយោបាយរឹងមាំ និងគោលនយោបាយវែងឆ្ងាយ ដើម្បីធានាស្ថិរភាពនយោបាយនិងសន្តិភាពជាតិ ដើម្បីជាមូលដ្ឋានរឹងមាំក្នុងការបន្តអភិវឌ្ឍសង្គម សេដ្ឋកិច្ចរបស់ប្រទេសកម្ពុជា ឱ្យបានរីកចម្រើនរុងរឿងបន្តទៅមុខទៀត»។
សេចក្ដីដូចបានគោរពជម្រាបជូនខាងលើ ខ្ញុំបាទសូមសម្ដេចតេជោ ហ៊ុន សែន មេត្តាពិនិត្យ និង សម្រេចអនុញ្ញាតដល់រូបខ្ញុំបាទ បានចូលរួមជីវភាពនយោបាយជាមួយគណបក្សប្រជាជនកម្ពុជា ដើម្បីខ្ញុំបាទមានឱកាស បានចូលរួមចំនែក ក្នុងការបម្រើជាតិ មាតុភូមិ និងប្រជាជនកម្ពុជា បន្តទៅ មុខទៀត៕
