(ហ្សាកាតា, ឥណ្ឌូនេស៊ី)៖ មេដឹកនាំកម្ពុជា និងឥណ្ឌូនេស៊ី
បានសន្យាពង្រឹង និងពង្រីកលើកិច្ចសហប្រតិបត្តិការលើវិស័យទាំងឡាយ
ដែលធ្លាប់ធ្វើជាមួយគ្នាឱ្យកាន់តែស៊ីជម្រៅថែមទៀត។
ក្នុងដំណើរអញ្ជើញចូលរួមកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធនៅទីក្រុងហ្សាកាតា ប្រទេសឥណ្ឌូនេស៊ី, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ទទួលបានការស្វាគមន៍យ៉ាងកក់ក្តៅបំផុតពីសំណាក់លោក ចូកូ វីដូដូ ប្រធានាធិបតីឥណ្ឌូនេស៊ី។
នៅរសៀលថ្ងៃចន្ទ ទី៤ ខែកញ្ញា ឆ្នាំ២០២៣នេះ លោក ចូកូ វីដូដូ បានឆ្លៀតពេលដ៏មមាញឹកក្នុងនាមជាប្រធានអាស៊ាន ដើម្បីទទួលស្វាគមន៍សម្តេចធិបតី ហ៊ុន ម៉ាណែត មេដឹកនាំវ័យក្មេង របស់ កម្ពុជា។ ក្នុងជំនួបនោះ លោក ចូកូ វីដូដូ បានសម្តែងការសាទរចំពោះ សម្តេចមហាបវរធិបតី ដែល ត្រូវបានជ្រើសតាំងជានាយករដ្ឋមន្ត្រីកម្ពុជា សម្រាប់នីតិកាលទី៧ នៃរដ្ឋសភា។
លោកប្រធានាធិបតីឥណ្ឌូនេស៊ី ក៏បានឆ្លៀតផ្តាំផ្ញើការសួរសុខទុក្ខប្រកបដោយក្តីនឹករលឹកដ៏ជ្រាលជ្រៅ ជូនចំពោះសម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ ក្នុងនាម ជាមិត្តភ័ក្តិដ៏ជិតស្និទ្ធរបស់លោក និងរបស់សាធារណរដ្ឋឥណ្ឌូនេស៊ី។
ជាការឆ្លើយតប, សម្តេចមហាបវរធិបតី បានថ្លែងអំណរគុណយ៉ាងជ្រាលជ្រៅ ចំពោះការអបអរសាទរ និងការផ្តាំផ្ញើសួរសុខទុក្ខជូនសម្តេចតេជោ។ សម្តេចមហាបវរធិបតី ក៏បានកោតសរសើរផងដែរ ចំពោះបដិសណ្ឋារកិច្ចដ៏កក់ក្តៅពីសំណាក់ប្រទេស និង ប្រជាជនឥណ្ឌូនេស៊ី ក្នុងនាមជាម្ចាស់ផ្ទះនៃកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធ។
បន្ទាប់ពីការអបអរសាទរ និង កិច្ចស្វាគមន៍ទៅវិញទៅមក, ថ្នាក់ដឹកនាំទាំងពីរក៏បានពិភាក្សាបន្ថែមអំពីកិច្ចសហប្រតិបត្តិការយ៉ាងជិតស្និទ្ធកន្លងមករវាងកម្ពុជា និងឥណ្ឌូនេស៊ី ជាពិសេស លើវិស័យ សេដ្ឋកិច្ច, ពាណិជ្ជកម្ម, ការបណ្តុះបណ្តាលធនធានមនុស្ស និងការប្រយុទ្ធប្រឆាំងភេរវកម្ម និងឧក្រិ ដ្ឋកម្មឆ្លងដែនជាដើម។ ក្នុងន័យនេះ ថ្នាក់ដឹកនាំទាំងពីរបានឯកភាពគ្នាក្នុងការបន្តពង្រឹង និងពង្រីក កិច្ចសហប្រតិបត្តិការរវាងកម្ពុជា និងឥណ្ឌូនេស៊ី ឱ្យកាន់តែស្អិតល្មួតបន្ថែមទៀត៕
