(ភ្នំពេញ)៖ ឯកឧត្តម បណ្ឌិត ហ៊ុន ម៉ាណែត ដែលជាបេក្ខជននាយករដ្ឋមន្ត្រីបន្តវេនមកពីគណបក្ស ប្រជាជន កម្ពុជា បានសម្តែងនូវការហួសចិត្ត និងអស់សំណើចផងដែរចំពោះអ្នកវិភាគក្រៅស្រុក ដែលបានលើកឡើងថា លោកចង់យកភរិយាជាជនជាតិអាមេរិកាំង តែត្រូវសម្តេចតេជោ ហ៊ុន សែន រារាំង។
ឯកឧត្តម បណ្ឌិត បានគូសបញ្ជាក់ថា កាលរៀននៅអាមេរិកមាននារីអាមេរិកាំង បេតីខ្លះដែរ តែ ឯកឧត្តម ជាមនុស្សអៀន ដូច្នេះក៏មិនមានទំនាក់ទំនងណាស៊ីជម្រៅនោះឡើយ។
ឯកឧត្តម បណ្ឌិត បានគូសបញ្ជាក់បែបនេះ «កាលពីប៉ុន្មានខែមុន មានអ្នកនយោបាយត្រាស់ដឹងរឿង ទឹកជន់លិចផែនដី។ ប៉ុន្មានថ្ងៃមុននេះ ក៏លេចចេញអ្នកវិភាគម្នាក់នៅក្រៅប្រទេស ត្រាស់ដឹងពីរឿងនៃ ជីវិតស្នេហារបស់ខ្ញុំ… ដែលខ្ញុំចាត់ទុកថា ជាការត្រាស់ដឹងនោះ ក៏ព្រោះតែគាត់បានអួតថា គាត់ដឹងរឿង ខ្ញុំច្បាស់ ដែលសូម្បីតែរូបខ្ញុំជាសាមីខ្លួន ក៏មិនដែលដឹងរឿងនោះផង សុំស្ងើចហើយ បច្ចុប្បន្នសម្បូរ អ្នកត្រាស់ដឹងគ្រប់រឿងណាស់»។
សូមបញ្ជាក់ថា អ្នកវិភាគនៅក្រៅស្រុករូបនេះ ធ្លាប់ត្រូវបានឯកឧត្តម បណ្ឌិត ហ៊ុន ម៉ាណែត បង្រៀន ពីការវិភាគផងដែរ។ លោកបានបង្រៀនថា បើចង់វិភាគឱ្យបានត្រឹមត្រូវ ត្រូវប្រមូលព័ត៌មានឱ្យបាន គ្រប់ជ្រុងជ្រោយ៕
