(ប៉េកាំង)៖ តាមការចេញផ្សាយដោយ សារព័ត៌មានស៊ីនហួរ នៅថ្ងៃអង្គារ ទី៦ ខែកញ្ញា ឆ្នាំ២០២២ អោយដឹងថា អាជ្ញាធរក្នុងប្រទេសចិន នៅថ្ងៃអង្គារនេះ បានឱ្យដឹងថាចំនួនអ្នកស្លាប់ នៅក្នុងគ្រោះ រញ្ជួយដីកម្រិត ៦.៨រ៉ិចទ័រ ដែលបានវាយប្រហារលើខេត្ត ស៊ីឈួន (Sichuan) ភាគនិរតីនៃប្រទេស កាលពីថ្ងៃចន្ទដើមសប្ដាហ៍នេះ បានកើនដល់ ៦៦នាក់ និង២៥៣នាក់រងរបួស ខណៈ១៦នាក់ទៀត បន្តបាត់ខ្លួននៅឡើយ។
គ្រោះរញ្ជួយដីកម្រិត ៦.៨រ៉ិចទ័រ ដែលបានវាយប្រហារលើខេត្តស៊ីឈួន (Sichuan) ភាគនិរតីនៃ ប្រទេសចិន កាលពីថ្ងៃចន្ទ និងបង្កការញ័ររញ្ជួយដល់ទីក្រុងចេងទូ (Chengdu) និងខេត្តមួយចំនួន ទៀតនៅជាប់នោះ។
គិតត្រឹមម៉ោង២រសៀលថ្ងៃអង្គារនេះទីស្នាក់ការកណ្តាលសង្គ្រោះបន្ទាន់បានប្រាប់សន្និសីទសារព័ត៌មានមួយថា ក្នុងចំណោមជនរងគ្រោះទាំង៦៦នាក់ខាងលើ មាន៣៨នាក់ ត្រូវបានរាយការណ៍ ពីខេត្តស្វយ័ត Ganzi ទីបេ ខណៈ២៨នាក់ផ្សេងទៀតនៅក្រុងយ៉ាអាន (Ya’an)។
យោងតាមមជ្ឈមណ្ឌលតាមដានគ្រោះរញ្ជួយដីចិន ចំណុចរំញ័ររបស់វា ស្ថិតនៅក្រុងលូទីង (Luding) គឺម្តុំតំបន់ភ្នំចម្ងាយប្រហែលជា ២២៦គីឡូម៉ែត្រពីភាគនិរតីទីក្រុងចេងទូ ដែលជារដ្ឋធានីនៃខេត្តស៊ី ឈួន។ បើតាមស្ថានីយទូរទស្សន៍រដ្ឋចិន មានមនុស្សសរុប៣៩,០០០នាក់ ដែលរស់នៅក្នុងបរិវេណ ២០គីឡូម៉ែត្រជុំវិញចំណុចរំញ័រ ហើយមាន១.៥៥លាននាក់ ស្ថិតក្នុងបរិវេណ១០០គីឡូម៉ែត្រជុំវិញ ទីនោះ។
គួរបញ្ជាក់ថា ក្រៅពីទីក្រុងចេងទូ គ្រោះរញ្ជួយដីខាងលើ ក៏បានជះឥទ្ធិពលដល់បណ្តាខេត្តក្បែរខាង រួមមានយូនណាន (Yunnan), សាអានស៉ី (Shaanxi) និងគួយចូវ (Qhuzhou) ថែមទៀតផង។ សម្រាប់ហេតុការណ៍រញ្ជួយផែនដីដ៏ខ្លាំងបំផុតនៅខេត្តស៉ីឈួន គឺត្រូវបានកត់ត្រាកាលពីខែឧសភា ឆ្នាំ២០០៨ នៅពេលរញ្ជួយដីកម្រិត៨.០រ៉ិចទ័រ បានវាយប្រហារស្រុកវិនឈួន (Wenchuan) ដែល បណ្តាលឱ្យមានមនុស្សស្លាប់ជិត ៧០,០០០នាក់ និងការបំផ្លិចបំផ្លាញយ៉ាងហិនហោច៕
