នាយករដ្ឋមន្ត្រីជប៉ុន ណែនាំឱ្យគណៈរដ្ឋមន្ត្រី បន្តដាក់ទណ្ឌកម្មប្រឆាំងរុស្ស៉ី និងគាំទ្រអ៊ុយក្រែន

 (តូក្យូ)៖  តាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី២៣ ខែសីហា ឆ្នាំ២០២២ គឺ នាយករដ្ឋមន្ត្រីជប៉ុន លោក គីស៊ីដា ហ្វូមីអុ (Fumio Kishida) បានណែនាំដល់ គណៈរដ្ឋមន្ត្រីរបស់លោកឱ្យបន្តចាត់វិធានការ ឆ្លើយតបតាមផ្លូវការទូត ក្នុងនោះរួមមានទាំងការ ដាក់ទណ្ឌកម្មប្រឆាំងនឹងរុស្ស៉ី។

រដ្ឋមន្ត្រីហិរញ្ញវត្ថុជប៉ុន លោក ស៊ូនិឈិ ស៊ូហ្សូគី (Shunichi Suzuki) ធ្វើការកត់សម្គាល់ខាងលើ ប្រាប់អ្នកសារព័ត៌មាន នៅថ្ងៃអង្គារនេះជាមួយ ការសង្កត់ធ្ងន់ថា ជប៉ុននឹងរក្សារទំនាក់ទំនងយ៉ាងជិត ស្និទ្ធជាមួយក្រុមប្រទេស G7 ក្នុងការចាត់វិធានការឆ្លើយតបទៅនឹងសង្រ្គាមរបស់រុស្ស៉ី នៅអ៊ុយក្រែន ក៏ដូចជាបន្តផ្ដល់ការគាំទ្រដល់ទីក្រុងកៀវ។

លោក ស៊ូហ្សូគី បានគូសបញ្ជាក់ដូច្នេះថា «យើងនឹងបន្តធ្វើការយ៉ាងជិតស្និទ្ធជាមួយ G7 និងសហ គមន៍អន្តរជាតិ បន្ទាប់ពីមានការណែនាំពី លោកនាយករដ្ឋមន្ត្រី ដើម្បីចាត់វិធានការឆ្លើយតបយ៉ាង សមស្រប»។ ក៏ប៉ុន្តែ ព្រមពេលជាមួយគ្នា រដ្ឋមន្ត្រីហិរញ្ញវត្ថុរូបនេះបានបញ្ជាក់ថាមិន ទាន់មានការ ជជែកពីការដាក់ទណ្ឌកម្មថ្មីបន្ថែមលើទីក្រុងមូស្គូ នៅឡើយទេ៕