វេណេស៊ុយអេឡា និងកូឡុំប៊ី ព្រមព្រៀងសា្ដរទំនាក់ទំនងការទូត ឡើងវិញ

 (បូហ្គូតា)៖  យោងតាមការដកស្រង់ចេញផ្សាយពីទីភ្នាក់ងារសារព័ត៌មាន AFP នៅថ្ងៃសុក្រ ទី២៩ ខែកក្កដា ឆ្នាំ២០២២ គឺ ប្រទេសកូឡុំប៊ី និងវេណេស៊ុយអេឡា នឹងតែងតាំងឯកអគ្គរដ្ឋទូតថ្មី ប្រចាំរដ្ឋ ធានីនៃប្រទេសរៀងៗខ្លួន នៅពេលដែលប្រធានាធិបតីជាប់ឆ្នោតកូឡុំប៊ី លោក ហ្គូស្តាវ៉ូ ប៉េត្រូ (Gustavo Petro) ចូលកាន់តំណែងជាផ្លូវការ នៅខែសីហាខាងមុខ ជាផ្នែកមួយនៃកិច្ចខិតខំប្រឹង ប្រែងស្ដារទំនាក់ទំនងការទូតឡើងវិញ បន្ទាប់ពីមានភាពតានតឹងនឹងគ្នាជាច្រើនឆ្នាំមកនេះ។

ការសម្រេចចិត្តខាងលើត្រូវបានប្រកាស នៅក្នុងសេចក្តីថ្លែងការណ៍រួមមួយ កាលពីថ្ងៃព្រហស្បតិ៍ សប្តាហ៍នេះ ដោយរដ្ឋមន្ត្រីការបរទេសវេណេស៊ុយអេឡា លោក កាឡូស ហ្វារៀ (Carlos Faria) និងរដ្ឋមន្ត្រីការបរទេសកូឡុំប៊ី ដែលស្ថិតក្នុងការរង់ចាំចូលកាន់តំណែង គឺលោក អាល់វ៉ារ៉ូ ឡេវ៉ា (Alvaro Leyva) បន្ទាប់ពីកិច្ចប្រជុំមួយក្នុងទីក្រុង សាន់ គ្រីស្តូបាល់ (San Cristobal)។

លោក ឡេវ៉ា បានអានសេចក្តីថ្លែងការណ៍មួយដែលគូសបញ្ជាក់ថា ប្រទេសទាំង២បានបង្ហាញពី បំណងចង់ដំណើរការលើរបៀបវារៈការងារ ឆ្ពោះទៅរកការធ្វើឲ្យមាន ប្រក្រតីនៃទំនាក់ទំនងទ្វេភាគី ឡើងវិញ ចាប់ពីថ្ងៃទី៧ ខែសីហា ដោយការបង្ហាញសមាសភាពផ្លូវការនៃឯកអគ្គរដ្ឋទូត និងមន្ត្រីការ ទូត ក៏ដូចជាស្ថានកុងស៊ុល។ ភាគីទាំង២ ក៏បានអះអាងសារជាថ្មីថាឆន្ទៈរបស់ពួកគេគឺការខិតខំ ប្រឹងប្រែងរួមគ្នាដើម្បីធានាសន្តិសុខ និងសន្តិភាពនៅតាមព្រំដែន។

សូមបញ្ជាក់ថា ទំនាក់ទំនងរវាងកូឡុំប៊ី និងវេណេស៊ុយអេឡា មានភាពរង្គោះរង្គើអស់ជាច្រើនឆ្នាំជុំ វិញបញ្ហាជាច្រើន រួមទាំងការកើនឡើងនៃចំនួនជនចំណាកស្រុក វេណេស៊ុយអេឡា ដែលឆ្លងកាត់ព្រំ ដែនរួមចំពេលមានវិបត្តិសេដ្ឋកិច្ច នៅក្នុងប្រទេស៕