(ភ្នំពេញ)៖ នៅថ្ងៃទី២៨ ខែកក្កដា ឆ្នាំ២០២២ នាយឧត្តមសេនីយ៍ មាស វិរិទ្ធ អគ្គលេខាធិការ អាជ្ញាធរជាតិប្រយុទ្ធប្រឆាំងគ្រឿងញៀន ទទួលជួបពិភាក្សាការងារជាមួយក្រុមការងារ ត្រួតពិនិត្យ សារធាតុគីមីរបស់អង្គការ សហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (UNODC) ដឹកនាំដោយលោក រ៉េននើ ភុង (Reinner Pungs) ប្រធានគម្រោងត្រួតពិនិត្យសារធាតុគីមីផ្សំ។
នាយឧត្តមសេនីយ៍ មាស វិរិទ្ធ អគ្គលេខាធិការ បានប្រាប់ឱ្យដឹងក្រោយជំនួបនោះថា កិច្ចពិភាក្សាថ្ងៃនេះ«យើងមានគោលបំណងដើម្បីពង្រឹងកិច្ចសហប្រតិបត្តិការគ្រប់គ្រងត្រួតពិនិត្យសារធាតុគីមីផ្សំគ្រឿងញៀន និងលើកកម្ពស់សមត្ថភាពការអនុវត្តច្បាប់ ទប់ស្កាត់ និងបង្រ្កាបការបង្វែរ សារធាតុគីមីយកទៅកែច្នៃផលិតគ្រឿងញៀនខុសច្បាប់នៅក្នុងប្រទេសកម្ពុជា និងតំបន់»។
នាយឧត្តមសេនីយ៍ មាស វិរិទ្ធ ក៏បានស្នើសុំអង្គការ UNODC ពិនិត្យលទ្ធភាពជួយគាំទ្រដល់កម្ពុជា ក្នុងការបណ្តុះបណ្តាលកសាងសមត្ថភាពមន្រ្តីមន្ទីរពិសោធន៍គ្រឿងញៀន និងមន្រ្តីអនុវត្តច្បាប់ ដើម្បីមានលទ្ធភាពគ្រប់គ្រាន់ ក្នុងការស៊ើបអង្កេត ស្រាវជ្រាវ និងបង្រ្កាបរាល់ការបង្វែរសារធាតុ គីមីផ្សំយកទៅលួចលាក់កែច្នៃផលិតគ្រឿងញៀនខុសច្បាប់ និងជួយគាំទ្រម៉ាស៊ីនវិភាគសារធាតុគីមី និងឧបករណ៍បង្ការគ្រោះថ្នាក់គីមីសម្រាប់មន្រ្តីអនុវត្តច្បាប់ និងជួយដល់កម្ពុជាក្នុងការបំផ្លាញ សារធាតុគីមីផ្សំគ្រឿងញៀនខុសច្បាប់ ដែលកម្លាំងសមត្ថកិច្ចបង្ក្រាប និងរឹបអូសបាននាពេលកន្លង មក៕
