(ព្រះសីហនុ)៖ នៅវេលាម៉ោង២៣:១០នាទីយប់ ថ្ងៃទី១២ ខែកក្កដា ឆ្នាំ២០២២ លោក គួច ចំរើន អភិបាល នៃគណៈអភិបាលខេត្តព្រះសីហនុ បានអនុញ្ញាតឱ្យបើកដំណើរការឆ្លងកាត់រថយន្តតូច-ធំ ធ្វើចរាចរណ៍ទៅមកជាធម្មតា លើកំណាត់ផ្លូវជាតិលេខ៤ឡើងវិញ ក្រោយស្ថានភាពកំពស់ទឹកភ្លៀង បានស្រកទៅវិញ នៅចំណុចស្ពានស្ទឹងសំរោង ត្រង់ចន្លោះ គីឡូម៉ែត្រ លេខ ១១៥-១១៦ ស្ថិតក្នុង ភូមិ ស្ទឹង សំរោង ឃុំអូរបាក់រទេះ ស្រុកកំពង់សីលា។
ជាមួយគ្នានេះ រដ្ឋបាលខេត្តព្រះសីហនុ នៅព្រឹកថ្ងៃទី១៣ ខែកក្កដា ក៏បានចេញសេចក្តីជូនដំណឹង បន្ថែម ចំពោះការអនុញ្ញាតឲ្យចរាចរណ៍ឡើងវិញនេះផងដែរ។
ចំពោះមុខ កម្លាំងគណៈបញ្ជាការឯកភាពរដ្ឋបាលខេត្ត និងស្រុក ចុះជួយសម្រួលចរាចរណ៍ រក្សា សណ្តាប់ធ្នាប់ នៅលើដងផ្លូវជាតិផងដែរ៕
