រដ្ឋាភិបាលក្ស័យធនរបស់ស្រីលង្កាស្វែងរកការបញ្ចុះតម្លៃប្រេងពីរុស្ស៉ី និងកាតា ខណៈប្រទេសនេះកំពុងអស់ប្រេងប្រើប្រាស់

 (កូឡុំបូ)៖  យោងតាមការចេញផ្សាយដោយ សារព័ត៌មាន AFP នៅថ្ងៃអាទិត្យ ទី២៦ ខែមិថុនា ឆ្នាំ ២០២២ អោយដឹងថា ប្រទេសស្រីលង្កាបានប្រកាសបញ្ជូនរដ្ឋមន្ត្រីទៅកាន់ប្រទេសរុស្ស៊ី និងកាតា ដើម្បីព្យាយាមធានាបាននូវប្រេងក្នុងតម្លៃថោក មួយថ្ងៃបន្ទាប់ពីរដ្ឋាភិបាលបាននិយាយថា ខ្លួនមាន អ្វីអស់ហើយ ប៉ុន្តែអស់ប្រេងឥន្ធនៈ។

ទន្ទឹមនឹងនេះ រដ្ឋាភិបាលបានបន្តការបិទស្ថាប័នរដ្ឋមិនសំខាន់រយៈពេលពីរសប្តាហ៍ រហូតដល់មាន ការជូនដំណឹងបន្ថែម ដើម្បីសន្សំសំចៃប្រេង ដោយរក្សាតែបុគ្គលិកសំខាន់ៗប៉ុណ្ណោះ ដើម្បីផ្តល់សេវា កម្មតិចតួចបំផុត។ រដ្ឋមន្ត្រីថាមពលលោក Kanchana Wijesekera បាននិយាយថា រដ្ឋមន្ត្រីពីររូប នឹងធ្វើដំណើរទៅកាន់ប្រទេសរុស្ស៊ីនៅថ្ងៃចន្ទ ដើម្បីពិភាក្សាអំពីការទទួលបានប្រេងបន្ថែមទៀត បន្ទាប់ពីបានទិញប្រេងឆៅចំនួន ៩០,០០០តោនកាលពីខែមុន។

លោក Wijesekera បានប្រាប់អ្នកយកព័ត៌មាននៅទីក្រុងកូឡុំបូយ៉ាងដូច្នេះ ថា «រដ្ឋមន្ត្រីពីរនាក់ នឹងទៅប្រទេសរុស្ស៊ី ហើយខ្ញុំនឹងទៅប្រទេសកាតានៅថ្ងៃស្អែក ដើម្បីមើលថា តើយើងនឹងទទួលបាន លក្ខខណ្ឌពិសេសឬយ៉ាងណា»។

លោក Wijesekera បានប្រកាសកាលពីថ្ងៃសៅរ៍ថា ប្រទេសស្រីលង្កាស្ទើរតែអស់សាំង និងប្រេង ម៉ាស៊ូតប្រើប្រាស់ បន្ទាប់ពីការដឹកជញ្ជូនដែលបានគ្រោងទុកជាច្រើន ត្រូវបានពន្យារពេលដោយគ្មាន​កំណត់ ដោយសារតែហេតុផល «ធនាគារ»។

ប្រជាជននៅតែធ្វើដំណើរនៅលើដងផ្លូវនិងតម្រង់ជួរយ៉ាងវែងអន្លាយនៅតាមស្ថានីយ៍ចាក់សាំងនានាដោយសង្ឃឹមថា នឹងអាចចាក់សាំងរថយន្តរបស់ពួកគេ ខណៈនាយករដ្ឋមន្ត្រីបាននិយាយថា កាល បរិច្ឆេទនៃការមកដល់នៃប្រេងឥន្ធនៈបន្ទាប់ មិនអាចកំណត់បាននោះទេ៕