(ប្រាស៊ីលីយ៉ា)៖ តាមការចេញផ្សាយដោយទីភ្នាក់ងារ សារព័ត៌មាន Reuters នៅថ្ងៃពុធ ទី១ ខែ មិថុនា ឆ្នាំ២០២២ អោយដឹងថា អាជ្ញាធរនៅក្នុងប្រទេសប្រេស៊ីល នៅថ្ងៃអង្គារសប្ដាហ៍នេះបានឱ្យ ដឹងថាចំនួនអ្នក ស្លាប់ដោយសារគ្រោះទឹកជំនន់បង្កឡើងដោយភ្លៀងខ្លាំង នៅឯតំបន់ប៉ែកឦសាន នៃប្រទេស បានកើនដល់ ១០៦នាក់ និង១០នាក់ផ្សេងទៀតកំពុងបាត់ខ្លួននៅឡើយ។
បើតាមអភិបាលរដ្ឋ ពែរណាមប៊ុយកូ (Pernambuco) លោក ប៉ៅឡូ កាម៉ារ៉ា (Paulo Camara) បច្ចុប្បន្នអាទិភាពចម្បងរបស់អាជ្ញាធរគឺស្វែងរកអ្នកដែល បាត់ខ្លួន ខណៈគ្រោះរអិលបាក់ និងទឹក ជំនន់នៅតែបន្តកើតឡើង។ លោក កាម៉ារ៉ាបានបញ្ជាក់យ៉ាងខ្លីដូច្នេះថា «យើងនឹងមិនឈប់ឡើយ រហូតទាល់តែយើង រកឃើញអ្នកដែលបានបាត់ខ្លួនទាំងអស់ ហើយនេះគឺជាអាទិភាពចម្បងនៅពេល នេះ»។ គួរបញ្ជាក់ថា បើតាមអាជ្ញាធឧតុនិយមប្រេស៊ីល ភ្លៀងធ្លាក់ខ្លាំង និងគ្រោះទឹកជំនន់អាចនឹង បន្តកើតមាននៅក្នុងរដ្ឋ Pernambuco ជាពិសេសនៅក្នុងរដ្ឋធានី រ៉េស៊ីហ្វេ (Recife) នៃរដ្ឋមួយនេះ តែម្ដង៕
