(គូឡាឡាំពួរ)៖ យោងតាមទីភ្នាក់ងារព័ត៌មានរ៉យទ័រ អោយដឹងថា ធនាគារកណ្តាលរបស់ប្រទេស ម៉ាឡេស៊ីបានឱ្យដឹងកាលពីថ្ងៃសុក្រថា កំណើន សេដ្ឋកិច្ចរបស់ប្រទេសស្ថិតក្នុងតំបន់អាស៊ីអាគ្នេយ៍ មួយនេះបានកើនឡើងខ្ពស់ក្នុងត្រីមាសទី១ ដោយ សារការស្ទុះងើបតម្រូវការឡើងវិញនិងទីផ្សារការ ងារកាន់តែរឹងមាំនៅពេលដែលសេដ្ឋកិច្ចពិភពលោកបានងើបឡើងវិញពីជំងឺរាតត្បាតកូវីដ-១៩។
ផលិតផលក្នុងស្រុកសរុបបានកើនឡើង ៥ភាគរយក្នុងអំឡុងពីខែមករាដល់ខែមីនា ដែលខ្ពស់ជាង ការព្យាករដែលថាមានត្រឹមតែ ៤ភាគរយក្នុងការស្ទង់មតិរបស់ទីភ្នាក់ងារព័ត៌មានរ៉យទ័រ និងកើន ឡើងពីកំណើន ៣,៦ភាគរយនៅក្នុងត្រីមាសទី៤ ឆ្នាំមុន។
ទីភ្នាក់ងារព័ត៌មានរ៉យទ័របានរាយការណ៍ដោយដកស្រង់សំដីលោកស្រី Nor Shamsiah Mohd Yunus ទេសាភិបាលធនាគារ Bank Negara Malaysia ដែលជាធនាគារកណ្តាលរបស់ម៉ាឡេ ស៊ីថា ធនាគារកណ្តាលបានរាប់បញ្ចូលសង្គ្រាមរវាងរុស្ស៊ី និងអ៊ុយក្រែននៅក្នុងការព្យាកររបស់ខ្លួន ហើយកំណើននៅឆ្នាំ២០២២ នឹងត្រូវបានគាំទ្រដោយការកើនឡើងជាបន្តនូវតម្រូវការក្នុងស្រុក និងខាងក្រៅ។
លោកស្រី Nor Shamsiah បានឱ្យដឹងថា ហានិភ័យធ្លាក់ចុះរួមមានទាំង ការលុកលុយរបស់រុស្ស៊ី លើប្រទេសអ៊ុយក្រែន និងការបិទខ្ទប់យ៉ាងតឹងរ៉ឹងនៅក្នុងប្រទេសចិន ដើម្បីទប់ស្កាត់ការរីករាល ដាលជំងឺកូវីដ-១៩ ក៏ដូចជាការអាក់ខានដែលអូសបន្លាយពេលចំពោះខ្សែចង្វាក់ផ្គត់ផ្គង់។
លោកស្រីថ្លែងទៅកាន់សិន្នសីទកាសែតមួយថា៖ «ទោះបីជាហានិភ័យធ្លាក់ចុះបានកើនឡើងនៅក្នុង ពិភពលោកក៏ដោយ ក៏យើងមានទំនុកចិត្តទៅលើគន្លងកំណើនសេដ្ឋកិច្ចរបស់យើងផងដែរ ហើយ យើងមិនឃើញមានហានិភ័យដំណើរដើរថយក្រោយនៃសេដ្ឋកិច្ចណាមួយនៅក្នុងប្រទេសម៉ាឡេស៊ីនោះទេ»។ ធនាគារកណ្តាលម៉ាឡេស៊ីបានរក្សាការព្យាករកំណើនសេដ្ឋកិច្ចឆ្នាំ២០២២ របស់ខ្លួននៅ ចន្លោះពី ៥,៣ ភាគរយទៅ ៦,៣ភាគរយដដែល ដែលអត្រានេះត្រូវបានទម្លាក់កាលពីខែមីនា។
ប្រទេសម៉ាឡេស៊ីដែលទទួលរងគ្រោះដោយសារការផ្ទុះជំងឺកូវីដ-១៩ ដ៏អាក្រក់បំផុតនៅក្នុងតំបន់ បានដកវិធានការបង្ការជំងឺឆ្លងភាគច្រើនរបស់ខ្លួនក្នុងខែនេះ ដោយសារអត្រានៃការឆ្លងបានថយចុះ ក្នុងគ្រាដែលមានការបង្កើនកម្មវិធីចាក់វ៉ាក់សាំង។ នេះបើយោងតាមទីភ្នាក់ងារព័ត៌មានរ៉យទ័រ៕
