(ភ្នំពេញ)៖ ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿង ញៀន នៅព្រឹកថ្ងៃទី៣០ ខែមីនា ឆ្នាំ២០២២នេះ បានអញ្ជើញបើកសន្និបាតបូកសរុបលទ្ធផលការ ងារត្រួតពិនិត្យគ្រឿងញៀន ឆ្នាំ២០២១ និងលើកទិសដៅការងារឆ្នាំ២០២២ របស់អាជ្ញាធរជាតិ ប្រយុទ្ធប្រឆាំងគ្រឿង ។
ពិធីនេះធ្វើឡើងនៅសណ្ឋាគារសុខាភ្នំពេញ ដោយមានការចូលរួមពី ឯកឧត្តម វង សូត រដ្ឋមន្ត្រី ក្រសួងសង្គមកិច្ច អតីតយុទ្ធជន និងយុវនីតិសម្បទា ថ្នាក់ដឹកនាំអាជ្ញាធរជាតិប្រយុទ្ធប្រឆាំងគ្រឿង, ឯកអគ្គរដ្ឋទូតប្រទេសជាមិត្ត, ថ្នាក់ដឹកនាំតំណាងក្រសួង ស្ថាប័នពាក់ព័ន្ធ ព្រមទាំងអភិបាលរាជធានី-ខេត្ត ស្នងការរាជធានី-ខេត្ត មេបញ្ជាការកងរាជអាវុធហត្ថរាជធានី-ខេត្ត និងបណ្តាអង្គការដៃគូរពាក់ ព័ន្ធមួយចំនួន។ សម្រាប់កម្មវិធីបិទសន្និបាតនេះ នឹងធ្វើឡើងនារសៀលថ្ងៃទី៣០ ខែមីនានេះ ក្រោម អធិបតីភាព សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
បើតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿង បានឲ្យដឹងថា ក្នុងឆ្នាំ២០២១នេះ លទ្ធ ផលនៃកិច្ចប្រតិបត្តិការបង្ក្រាបបទល្មើសគ្រឿងញៀនមានដូចតទៅ៖
* បទល្មើសគ្រឿងញៀនសរុបបង្ក្រាបបាន ៦,៣០៨ករណី ស្មើនឹង ៦០,៣០% គិតលើឆ្នាំ២០២០ (១០,៤៦១ករណី) មានចំនួនតិចជាង ៤,១៥៣ករណី ថយចុះ ៣៩,៧០%
* ជនសង្ស័យសរុប ឃាត់ខ្លួន ១៣,៩៧៩នាក់/ស្រី ៨៣១នាក់ ស្មើនឹង ៦៤,៨២% គិតលើឆ្នាំ ២០២០ (២១,៥៦៦នាក់) មានចំនួនតិចជាង ៧,៥៨៧នាក់ ថយចុះ ៣៥,១៨% ក្នុងនោះ មានជន សង្ស័យជាជនជាតិខ្មែរ ១៣,៦១៤នាក់ (ស្រី៧៨៩នាក់) និងជនបរទេស ៣៦៥នាក់ (ស្រី៤២នាក់) ស្មើនឹង ១៥ជនជាតិ
* គ្រឿងញៀនសរុបចាប់យកបានចំនួន ០៤តោន ៦៨៩គីឡូក្រាម និង៦១១,៤៧ក្រាម ស្មើនឹង ១២១% គិតលើឆ្នាំ២០២០ (០៣ តោន ៨៧៥ គីឡូក្រាម និង៨៩៨,០០ក្រាម) មានចំនួនច្រើនជាង ៨១៣គីឡូក្រាម និង៧១៣,៤៧ក្រាម កើនឡើងប្រមាណ ២១%
* កញ្ឆាស្រស់កាប់បំផ្លាញបានចំនួន ៥៣,១៨៧ដើម និងកញ្ញាក្រៀម១៣៥គីឡូក្រាម និង១០០ ក្រាម
* សារធាតុគីមីផ្សំ ចំនួន៨៤តោន និង៩២០គីឡូក្រាម ស្មើនឹង១.៩១៩% គិតលើឆ្នាំ២០២០ (០៤តោន និង៤២៥គីឡូក្រាម) មានចំនួនច្រើនជាង ៨០តោន និង៤៩៥គីឡូក្រាម កើនឡើង ១.៨១៩% មានន័យថាសារធាតុគីមីផ្សំគ្រប់ប្រភេទដែលចាប់យកបានក្នុងឆ្នាំ២០២១ គឺស្មើនឹង ១៩ដង នៃទិន្នន័យចាប់យកក្នុងឆ្នាំ២០២០កន្លងទៅ។ រួមទាំងមធ្យោបាយសម្ភារ និងឧបករណ៍ ផលិតកែច្នៃគ្រឿងញៀន ដែលបានចាប់យកក្នុងប្រតិបត្តិការបង្ក្រាបបទល្មើសគ្រឿងញៀន និងបានបញ្ជូនទៅសាលាដំបូងរាជធានី ខេត្តជាច្រើនផងដែរ។
ចំនួនអ្នកប្រើប្រាស់គ្រឿងស្ថិតក្រោមការគ្រប់គ្រងនៅឆ្នាំ២០២១ មានចំនួន១៦,២៦៤នាក់ ដោយ ក្នុងនោះរួមមាន៖
* អ្នកញៀនគ្រឿងញៀន ដែលបានធ្វើសមារណកម្មចេញពីមណ្ឌល មានចំនួន៧,៤៨២នាក់
* អ្នកញៀនគ្រឿងញៀន ដែលកំពុងបន្តស្នាក់នៅក្នុងមណ្ឌល មានចំនួន ៣,០៣៨នាក់
* អ្នកញៀនគ្រឿងញៀន ដែលបានទទួលសេវាកម្មក្នុងមូលដ្ឋានសុខាភិបាល មានចំនួន ៥,១២៤នាក់
*អ្នកញៀនគ្រឿងញៀន ដែលបានបញ្ជូនទៅពន្ធនាគារ មានចំនួន ៦០៩នាក់។
បន្ថែមពីនេះ លទ្ធផលការងារបង្ក្រាបទីតាំងកែច្នៃគ្រឿងញៀន និងការរឹបអូសសាធាតុគីមីផ្សំ ក្នុងឆ្នាំ ២០២១ មន្ត្រីអនុវត្តច្បាប់ បានធ្វើការបង្ក្រាបករណីកែច្នៃផលិតគ្រឿងញៀនខុសច្បាប់ បានចំនួន ០៩ករណី ឃាត់ខ្លួនជនសង្ស័យពាក់ព័ន្ធបានចំនួន ៣៤នាក់ និងចាប់យកសារធាតុគីមីផ្សំ បានចំនួន ៦១,៧០០គីឡូក្រាម។
ដោយឡែកសម្រាប់ដើមឆ្នាំ២០២២នេះ មន្ត្រីអនុវត្តច្បាប់បានធ្វើការបង្ក្រាបករណីកែច្នៃផលិតគ្រឿង ញៀនខុសច្បាប់ចំនួន ៣ករណី និងចាប់សារធាតុគីមីផ្សំ បានចំនួន១៦៥,៦០២គីឡូក្រាម ព្រមទាំងឧបករណ៍កែច្នៃផលិតជាច្រើនប្រភេទ៕
