វៀតណាមរកឃើញអ្នកឆ្លងកូវីដ១៩ថ្មីៗ «១៦,១៣៥ករណី» ក្នុងនោះទីក្រុងហាណូយចំនួន ២,៩៤៨ករណី ព្រមទាំងស្លាប់ថ្មី១៧៧នាក់ទៀត ក្នុងរបាយការណ៍ថ្ងៃពុធនេះ

 (ហាណូយ)៖ យោងតាមការចេញផ្សាយ ដោយទីភ្នាក់ងារសារពត៌មាន Viet Nam News នៅ យប់ថ្ងៃទី១២ ខែមករា ឆ្នាំ២០២២ បញ្ជាក់អោយដឹងថា ក្រសួងសុខាភិបាលវៀតណាមនៅថ្ងៃពុធ នេះបានប្រកាសរកឃើញករណីឆ្លងថ្មីៗ នៃជំងឺកូវីដ១៩ ចំនួន១៦,១៣៥ករណីបន្ថែមទៀត ក្នុងរយៈពេល២៤ម៉ោងចុងក្រោយនេះ។

រដ្ឋធានីហាណូយដែលបច្ចុប្បន្នកំពុងប្រែក្លាយជាចំណុចកណ្តាល នៃការផ្ទុះរីករាលដាលជំងឺនេះ បានរ៉ាប់រងសម្រាប់ករណីឆ្លងថ្មីថ្ងៃនេះចំនួន ២,៩៤៨ករណី ខណៈហូជីមិញបានរាយការណ៍ ចំនួន៦៩៦ករណី។ ចំណែកខេត្តដែលមានករណីឆ្លងច្រើនដែរនោះគឺរួមមានដូចជា ខេត្ត Bình Phước មានចំនួន៦៤១ករណី, ខេត្ត Khánh Hòa ៧៧២ករណី និងខេត្ត Bình Định ៧០២ ករណី។

ក្នុងរបាយការណ៍ថ្ងៃពុធនេះដែរ ក្រសួងសុខាភិបាលវៀតណាម ក៏បានប្រកាសពីករណីអ្នកស្លាប់ថ្មី ដោយសារជំងឺកូវីដ១៩ ចំនួន១៧៧នាក់បន្ថែមទៀតផងដែរ។

សរុបមកវិញ គិតត្រឹមយប់ថ្ងៃទី១២ ខែមករា ឆ្នាំ២០២២នេះវៀតណាមមានករណីឆ្លងកូវីដ-១៩ សរុបនៅទូទាំងប្រទេសចំនួន ១,៩៥៨,៧១៩នាក់ ក្នុងនោះអ្នកជំងឺជាសះស្បើយចំនួន ១,៦៣៥,៨៩៩នាក់ ចំណែកអ្នកស្លាប់សរុបចំនួន ៣៤,៩៦៤នាក់៕