(ព្រះសីហនុ)៖ ក្នុងឱកាសបើកបវេសនកាលឆ្នាំសិក្សាថ្មី២០២១-២០២២ នៅវិទ្យាល័យ ហ៊ុន សែន វាលរេញ ក្នុងស្រុកព្រៃនប់ ខេត្តព្រះសីហនុ នាព្រឹកថ្ងៃចន្ទ ទី១០ ខែមករា ឆ្នាំ២០២២ ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូល ដ្ឋានខេត្តព្រះសីហនុ បានលើកឡើងថា ការអប់រំជាឈ្នាន់យុទ្ធសាស្រ្តក្នុងការកសាងធនធានមនុស្ស និងរំលេចនូវទេពកោសល្យរបស់បុគ្គលម្នាក់ៗ ដែលអាចចូលរួមកសាងសេដ្ឋកិច្ចជាតិ និយាយជារួម និងជានិយាយដោយឡែក ធានាការទាញប្រយោជន៍ពីការអភិវឌ្ឍរបស់ខេត្តព្រះសីហនុតែម្តង។
តាមរយៈនេះឯកឧត្តម រដ្ឋមន្រ្តី ក៏លើកឡើងពីការគាំទ្ររបស់ររាជរដ្ឋាភិបាលក្នុងការអភិវឌ្ឍខេត្តព្រះ សីហនុ ឲ្យក្លាយជាតំបន់សេដ្ឋកិច្ចគំរូពហុបំណង ដែលជាសក្តានុពលយ៉ាងសំខាន់របស់ប្រទេស កម្ពុជា និងផ្តល់ប្រយោជន៍ដល់ប្រជាពលរដ្ឋនៅក្នុងខេត្តព្រះសីហនុ។
ឯកឧត្តម សាយ សំអាល់ បានលើកទឹកចិត្តឲ្យស្ថាប័នមន្ទីរ អង្គភាព អាជ្ញាធរដែនដី សហគមន៍ និងប្រជាពលរដ្ឋគ្រប់រូប យកចិត្តទុកដាក់ និងចូលរួមគាំទ្រឲ្យបានខ្លាំងក្លាបន្ថែមទៀត ក្នុងការ អភិវឌ្ឍសាលារៀន ដូចជាការអភិវឌ្ឍហេដ្ឋរចនាសម្ព័ន្ធរូបវន្ត កន្លែងលែងកីឡា ការថែរក្សាអនាម័យ និងបរិស្ថាន និងការគាំទ្រផ្សេងទៀត តាមគ្រប់លទ្ធភាព ជាពិសេសការចូលរួមពីដៃគូ ដើម្បី អភិវឌ្ឍន៍សាលារៀន និងបង្កើនធនធានមនុស្សឆ្ពោះទៅកាន់អនាគត។ ជាពិសេសដំណើរការបង្រៀន និងរៀន មានភាពទន់ភ្លន់ អាស្រ័យទៅតាមទីតាំងភូមិសាស្ត្រ និងស្ថានភាពអប់រំ ឆ្លើយតបទៅនឹងទីផ្សារការងារ ដោយអនុវត្តវិធីសាស្ត្ររៀន និងបង្រៀន តាមបែបបច្ចេកវិទ្យាទំនើប។
គួរបញ្ជាក់ថា ឯកឧត្តម សាយ សំអាល់ បានអញ្ជើញជាអធិបតីបើកបវេសនកាលឆ្នាំសិក្សា ២០២១-២០២២ នៅខេត្តព្រះសីហនុ រួមដំណើរដោយ ឯកឧត្តម គួច ចំរើន អភិបាលខេត្ត ព្រះសីហនុ លោក ជំទាវ ឃុន រចនា អនុរដ្ឋលេខាធិការក្រសួងអប់រំ យុវជន និងកីឡា ព្រមទាំងថ្នាក់ដឹកនាំក្រុមការងារ រាជរដ្ឋាភិបាលចុះមូលដ្ឋានខេត្តព្រះសីហនុ តំណាងរាស្រ្ត ថ្នាក់ដឹកនាំក្រសួងបរិស្ថាន ប្រធាន-អនុ ប្រធានមន្ទីរអង្គភាពជុំវិញខេត្ត ដៃគូអភិវឌ្ឍន៏ សហគមន៏ បុគ្គលិកអប់រំ និងសិស្សានុសិស្សប្រមាណ ជាច្រើននាក់ នៅវិទ្យាល័យ ហ៊ុន សែន វាលរេញ ក្នុងស្រុកព្រៃនប់ ខេត្តព្រះសីហនុ។
ក្នុងឱកាសនោះ ឯកឧត្តម ក៏បានអញ្ជើញផ្តល់ឧបករណ៍គ្រប់គ្រងអនាម័យ ដែលផ្តល់ជូនដោយមូល និធិព្រីនស៍ និងអង្គការផ្លែនអន្តរជាតិ ព្រមទាំងផ្តល់ជូនថវិកា និងសម្ភារសិក្សាដល់គណៈគ្រប់គ្រង សាលា លោកគ្រូ-អ្នកគ្រូ និងសិសិស្សានុសិស្ស និងមាតាបិតាសិស្សដែលបានចូលរួមផងដែរ៕
