(ភ្នំពេញ)៖ ពេញមួយសប្តាហ៍នេះ កម្មវិធីស្បៀងអាហារពិភពលោក សហការជាមួយក្រសួងអប់រំ យុវជន និងកីឡា ដើម្បីចែកស្បៀងជូន ដល់ក្រុមគ្រួសារងាយរងគ្រោះចំនួន៣០,០០០គ្រួសារ ដែល ក្នុងនោះមានប្រជាពលរដ្ឋសរុបដែលទទួលបានជំនួយនេះ ប្រហែល១៥០,០០០នាក់ នៅក្នុងខេត្ត ចំនួនប្រាំគឺ សៀមរាប ឧត្តរមានជ័យ កំពង់ធំ កំពង់ឆ្នាំង និង ពោធិ៍សាត់។
ការចែកជំនួយនេះ ប្រព្រឹត្តទៅជារៀងរាល់ថ្ងៃ ចាប់ពីថ្ងៃទី៣០ ខែសីហា ដល់ថ្ងៃទី៣ ខែកញ្ញា ឆ្នាំ ២០២១នេះ។ នេះបើតាមសេចក្តីប្រកាសព័ត៌មានរបស់កម្មវិធីស្បៀងអាហារពិភពលោក ដែល ទទួលបាននៅថ្ងៃទី៣១ ខែសីហានេះ។
ជំនួយនេះ ផ្តល់ជូនដល់ក្រុមគ្រួសារដែលអាជ្ញាធរកំណត់ថា ជាគ្រួសារងាយរងគ្រោះ មានអត្ត សញ្ញាណប័ណ្ណគ្រួសារក្រីក្រ (IDPoor) និងមានកូនចុះឈ្មោះ ចូលរៀននៅតាមសាលា ដែលមាន ការគាំទ្រពីកម្មវិធីផ្ដល់ស្បៀងអាហារតាមសាលារៀន របស់កម្មវិធីស្បៀងអាហារពិភពលោក និងក្រសួងអប់រំ យុវជន និងកីឡា។
នេះគឺជាការចែកស្បៀងជុំទី៥ ហើយដែលកើតឡើង ស្របពេលដែលរាជរដ្ឋាភិបាលកម្ពុជា បាន បញ្ជាក់ពីការប្តេជ្ញាចិត្តរបស់ខ្លួន ចំពោះសម្ព័ន្ធភាពរដ្ឋអនុវត្តកម្មវិធីស្បៀងអាហារ តាមសាលារៀន ដែលបើកដំណើរការ ជាផ្នែកមួយនៃកិច្ចប្រជុំកំពូលប្រព័ន្ធស្បៀងអាហារសកលនៅខែកញ្ញា ឆ្នាំ ២០២១។
សម្ព័ន្ធនេះ មានការចូលរួមពីរដ្ឋាភិបាល អង្គការសហប្រជាជាតិ សង្គមស៊ីវិល គ្រឹះស្ថានអប់រំ អង្គការ មនុស្សធម៌ និងវិស័យឯកជនទាំងអស់ដែលទទួលស្គាល់ថា អាហារនៅតាមសាលាមានសារៈ សំខាន់ណាស់ ក្នុងការផ្លាស់ប្តូរប្រព័ន្ធអាហារនិងអាច ជួយឲ្យប្រទេសនិមួយៗអាចងើបពីវិបត្ត សេដ្ឋកិច្ច-សង្គម ដែលបណ្តាលមកពីជំងឺកូវីដ -១៩ និងសម្រេចបាននូវគោលដៅអភិវឌ្ឍន៍ប្រកប ដោយចីរភាព។
ប្រទេសកម្ពុជាគឺជាប្រទេសមួយ ក្នុងចំណោមប្រទេសចំនួន ៤០ ដំបូងគេបង្អស់ដែលបានចុះឈ្មោះ ចូលរួមក្នុងសម្ព័ន្ធភាពជាប្រវត្តិសាស្ត្រមួយនេះ ដែលអាចជួយការពារកុមារដែលងាយរងគ្រោះបំផុត ពីភាពអត់ឃ្លាន និងកង្វះអាហារូបត្ថម្ភនានា។
ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងក្នុងសេចក្តីប្រកាសព័ត៌មាន ថា «អាហារសុខភាពដែលមានជីវជាតិ នៅតាមសាលា អាចជួយបង្កើនការផ្តោតអារម្មណ៍ របស់សិស្ស និងធ្វើឲ្យលទ្ធផលសិក្សារបស់គាត់ កាន់តែល្អប្រសើរឡើង។
វាក៏ជួយសម្រាលបន្ទុកសេដ្ឋកិច្ច របស់ ក្រុមគ្រួសារសិស្សផងដែរ។ នេះហើយជាមូលហេតុ ដែលយើងចុះឈ្មោះចូលរួមជាមួយសម្ព័ន្ធភាព មួយនេះ ដើម្បីបង្ហាញពីការប្តេជ្ញាចិត្តរបស់រាជរដ្ឋាភិបាលយើង ក្នុងការធានាឲ្យបានថា គ្មានកុមារ ណាម្នាក់ត្រូវបានទុកចោលឡើយ»។
អស់រយៈពេល២០ឆ្នាំមកហើយ កម្មវិធីផ្ដល់ស្បៀងអាហារ តាមសាលារៀនរបស់កម្មវិធីស្បៀង អាហារពិភពលោក បានផ្តល់អាហារបំប៉នសំបូរជីវជាតិ ដល់កុមារនៅសាលាបឋមសិក្សានៅតំបន់ ក្រីក្របំផុតមួយចំនួន នៃប្រទេសកម្ពុជា។
លោកស្រី គ្លែរ កូណាន់ តំណាងកម្មវិធីស្បៀងអាហារពិភពលោកប្រចាំនៅកម្ពុជា បានថ្លែងថា «កម្មវិធីស្បៀងអាហារពិភពលោកដឹងច្បាស់ថា អាហារូបត្ថម្ភល្អ មានសារៈសំខាន់ណាស់ សម្រាប់ ការអភិវឌ្ឍរបស់កុមារ នេះហើយជាមូលហេតុ ដែលក្រុមការងាររបស់យើងខិតខំប្រឹងប្រែង ដើម្បី ឲ្យប្រាកដថាកញ្ចប់អាហារទាំងនេះ ទៅដល់ដៃក្រុមគ្រួសារងាយរងគ្រោះ ដើម្បីធានាថាកុមារនឹងមាន អាហារទទួលទាន ក្នុងកំឡុងពេលវិបត្តិកូវីដមួយនេះ»៕
