(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសថា កម្ពុជាចាក់វ៉ាក់សាំង បង្ការជំងឺកូវីដ១៩ ជូនប្រជាពលរដ្ឋ បាន៨លាននាក់ហើយ (សម្រាប់អ្នកមានវ័យ ១៨ឆ្នាំឡើង) នៅថ្ងៃទី១០ ខែសីហា ឆ្នាំ២០២១នេះ។ ជនទី៨លាន បានទីលើស្ត្រីជនជាតិឡាវ រស់នៅក្នុងខេត្ត ស្ទឹងត្រែង។
សម្តេចតេជោនាយករដ្ឋមន្ត្រី បានគូសបញ្ជាក់លើទំព័រ Facebook នៅយប់ថ្ងៃនេះយ៉ាងដូច្នេះ «នៅថ្ងៃ១០ ខែសីហា ឆ្នាំ២០២១នេះ កម្ពុជាយើងបានចាក់វ៉ាក់សាំងការពារកូវីដ១៩ ដូសទី១ បាន៨លាននាក់រួចហើយ គឺស្មើនឹង ៨០% នៃប្រជាពលរដ្ឋ១០លាននាក់ ដែលត្រូវចាក់វ៉ាក់សាំង ដោយមិនទាន់គិតពីកុមារ និងយុវវ័យ ដែលបាននិងកំពុងចាក់ព្រមទាំងបងប្អូនដែលបាននិងកំពុង ចាក់ដូសទី៣»។
សម្តេចតេជោ បានបន្ថែមថា «ដំណើរឆ្ពោះទៅរក ១០លាននាក់នៅមិនឆ្ងាយពីយើងនោះទេ ដែលធ្វើ ឱ្យយើងសម្រេចការងារមុនការកំណត់៧ទៅ៨ខែប្រៀបជាមួយផែនការដើមរបស់យើង»។
សម្តេចតេជោ បានបញ្ជាក់ថា ជនចាក់ទី៨លាន គឺបានទៅលើស្ត្រីឈ្មោះ ថឹង ថា អាយុ៥៦ឆ្នាំ ជនជាតិខ្មែរឡាវ រស់នៅភូមិដនឡុង ឃុំសេកុង ស្រុកសៀមប៉ាង ខេត្តស្ទឹងត្រែង។
សម្តេចតេជោ ហ៊ុន សែន បានអបអរសាទរចំពោះជ័យលាភីទី៨លាន ដែលជាអ្នកចាក់វ៉ាក់សាំង Johnson & Johnson ដែលជាជំនួយរបស់សហរដ្ឋអាមេរិក។
សម្តេចតេជោប្រមុខរាជរដ្ឋាភិបាល បានបញ្ជាក់ថា លោកជំទាវ ឱ វណ្ណឌីន រដ្ឋលេខាធិការក្រសួង សុខាភិបាល នឹងនាំយកជំនួយថវិកា ១០លានរៀលព្រមទាំងសម្ភារៈផ្សេងៗទៀតទៅប្រគល់ជូន ដោយផ្ទាល់។
ឆ្លៀតឱកាសនេះ សម្តេចតេជោ សូមជូនពរជនរួមជាតិជួបតែសេចក្តីសុខសេចក្តីចម្រើន និងចៀស ផុតពីជំងឺកូវីដ-១៩ ដោយការខិតខំការពារខ្លួនតាមរយៈវិធានការ «៣ការពារ និង៣កុំ»។
សូមបញ្ជាក់ថា សម្តេចតេជោ ហ៊ុន សែន មិនត្រឹមតែជាប្រមុខរាជរដ្ឋាភិបាល ដែលបានស្វះស្វែង រកវ៉ាក់សាំងមកចាក់ជូនប្រជាពលរដ្ឋដោយមិនគិតថ្លៃប៉ុណ្ណោះទេ។ តែសម្តេចក៏ជាមេដឹកនាំ ដែល បានផ្តល់កម្មវិធីលើកទឹកចិត្តសម្រាប់អ្នកដែលបានទៅចាក់វ៉ាក់សាំងផងដែរ។
ក្នុងនោះមនុស្សចំនួន៧នាក់រួចមកហើយ ដែលជាជនចាក់វ៉ាក់សាំងទី១លាន, ២លាន, ៣លាន, ៤លាន, ៥លាន, ៦លាន និង ៧លាន ក៏បានទទួលបានការឧបត្ថម្ភថវិកា ១០លាន និងសម្ភារៈ ផ្សេងៗពីសម្តេចតេជោ។
ក្រៅតែពីជនទាំង៧នាក់នេះ សម្តេចតេជោនាយករដ្ឋមន្ត្រី ក៏បានឧបត្ថម្ភថវិកាជូនលោកយាយ លោកតា ដែលមានវ័យចាប់ពី ១០០ឆ្នាំឡើង ហើយបានចាក់វ៉ាក់សាំងផងដែរ។ លោកយាយ លោកតា អាយុ ១០០ឆ្នាំឡើង ដែលបានចាក់វ៉ាក់សាំងទទួលបានថវិកា ៣លានរៀល និងគ្រឿង ឧបភោគ បរិភោគមួយចំនួនទៀត៕
