សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានគណបក្សប្រជាជនកម្ពុជា បាន បញ្ជាក់ថា គណបក្សប្រជាជនកម្ពុជា បានត្រៀមខ្លួនរួចជាស្រេច ក្នុងការធ្វើការយ៉ាងជិតស្និទ្ធជាមួយ បក្សកុម្មុយនីស្ដចិន ដើម្បីជំរុញកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ និងរួមគ្នាកសាងសហគមន៍វាសនារួមរវាងប្រទេសទាំងពីរ។
សម្តេចតេជោ ហ៊ុន សែន បានគូសបញ្ជាក់បែបនេះ ប្រាប់ដល់លោកប្រធានាធិបតីចិន ស៊ី ជិនពីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនិស្តចិន តាមរយៈសារលិខិតមួយនៅថ្ងៃទី០២ ខែកក្កដា ឆ្នាំ២០២១នេះ ដែលឆ្លើយតបទៅនឹងសារលិខិតអបអរសាទររបស់ ប្រធានាធិបតី មហាយក្សចិន ចំពោះខួបលើកទី៧០ នៃការបង្កើតគណបក្សប្រជាជនកម្ពុជា។
ក្នុងសារលិខិតដែល ទទួលបាន សម្តេចតេជោ ហ៊ុន សែន បានបញ្ជាក់ដូច្នេះថា៖ «គណបក្ស ប្រជាជនកម្ពុជា ត្រៀមខ្លួនរួចជាស្រេច ក្នុងការធ្វើការយ៉ាងជិតស្និទ្ធជាមួយគណបក្សកុម្មុយនីស្ដចិន ដើម្បីជំរុញកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ រវាងប្រទេសយើងទាំងពីរ និងរួមគ្នាកសាងសហគមន៍វាសនារួមកម្ពុជា-ចិន សម្រាប់ផលប្រយោជន៍ជាក់ស្តែងរបស់ប្រទេស និងប្រជាជនយើងទាំងពីរ ក៏ដូចជាដើម្បីសន្តិភាព ស្ថិរភាព និងវិបុលភាពក្នុងតំបន់ និងពិភពលោក»។
សម្តេចតេជោ ហ៊ុន សែន បានសម្តែងភាពរីករាយជាខ្លាំង ដែលបានសង្កេតឃើញពីការរីកចម្រើននៃ ទំនាក់ទំនង និងការប្រាស្រ័យទាក់ទងយ៉ាង ជិតស្និទ្ធរវាង គណបក្សប្រជាជនកម្ពុជា និងគណ បក្សកុម្មុយនីស្ដចិន។
សម្តេចបានបញ្ជាក់ថា៖ «ដោយផ្អែកលើការជឿជាក់ផ្នែកនយោបាយ និងការគាំទ្រគ្នាទៅវិញទៅមក របស់គណបក្សយើងទាំងពីរ ខ្ញុំមានជំនឿយ៉ាងមុតមាំថា ទំនាក់ទំនង និងកិច្ចសហប្រតិបត្តិការយ៉ាងជិត ស្និទ្ធដែលមានស្រាប់រវាងកម្ពុជា និងចិន នឹងត្រូវបានពង្រឹង និងពង្រីកបន្ថែមទៀត នៅក្នុងឆ្នាំ ខាងមុខ »៕
សារលិខិតរបស់សម្តេចតេជោ ហ៊ុន សែន ឆ្លើយតបចំពោះលិខិតអបអររបស់ លោកប្រធានាធិបតីចិន ស៊ី ជិនពីង នៅខាងក្រោម ៖
