គណៈកម្មាធិការអចិន្រ្តៃយ៍ នៃរដ្ឋសភាកម្ពុជា នៅព្រឹកថ្ងៃទី២២ ខែមិថុនា ឆ្នាំ២០២១នេះ បានបើក កិច្ចប្រជុំមួយ ដើម្បីពិនិត្យសំណើសុំជ្រើសរើស ឯកឧត្តម ប្រាជ្ញ ចន្ទ ជាបេក្ខជនប្រធានគ.ជ.ប មុនបើក កិច្ចប្រជុំពេញអង្គដើម្បីបោះឆ្នោតផ្តល់សេចក្តីទុកចិត្តនៅពេលខាងមុខ។
កិច្ចប្រជុំនេះ ធ្វើឡើងតាមប្រព័ន្ធវីដេអូអនឡាញ ក្រោមអធិបតីភាព សម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា ដោយមានការចូលរួមពីសមាជិកគណៈកម្មធិការអចិន្រ្តៃយ៍រដ្ឋសភា និងអគ្គលេខាធិការរដ្ឋសភាផងដែរ។
របៀបវារៈសម្រាប់កិច្ចប្រជុំព្រឹកនេះរួមមាន៖
១៖ ពិនិត្យសំណើសុំជ្រើសរើស ឯកឧត្តម ប្រាជ្ញ ចន្ទ ជាបេក្ខជនប្រធានគណៈកម្មាធិការជាតិរៀប ចំការបោះឆ្នោត។
២៖ ពិនិត្យសំណើសុំប្រកាសទទួលស្គាល់ ឯកឧត្តម ម៉ែន កួន ជាតំណាងរាស្ត្រមណ្ឌលខេត្តត្បូងឃ្មុំ ជំនួស ឯកឧត្តម ប្រាជ្ញ ចន្ទ ដែលបានសុំលាលែង។
៣៖ ពិនិត្យលើសេចក្តីព្រាងរបាយការណ៍ស្តីពីសកម្មភាពការងាររបស់រដ្ឋសភាចន្លោះសម័យ ប្រជុំ រដ្ឋសភាលើកទី៥ និងលើកទី៦ នីតិកាលទី៦
និង៤៖ ពិនិត្យលើសមាសភាពលេខាធិការសម័យប្រជុំរដ្ឋសភាលើកទី៦ នីតិកាលទី៦ នៃ រដ្ឋសភា ចំនួន៣រូបផងដែរ។
ឯកឧត្តម ប្រាជ្ញ ចន្ទ ជាបេក្ខជនម្នាក់ក្នុងចំណោម២នាក់ ដែលគណបក្សឈ្នះឆ្នោតជ្រើសរើសដើម្បី ឱ្យរដ្ឋសភា បោះឆ្នោតផ្តល់សេចក្តីទុកចិត្តធ្វើជាំប្រធានគ.ជ.ប ជំនួសឯកឧត្តម ស៊ិក ប៊ុនហុក ដែល លាលែងពីតំណែង។
ការរៀបចំនីតិវិធីជ្រើសរើសប្រធានគ.ជ.បថ្មី បានធ្វើឡើងបន្ទាប់ពី ឯកឧត្តម ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត បានដាក់ពាក្យលាលែងពីតំណែង កាលពីថ្ងៃទី០១ ខែមិថុនា ឆ្នាំ២០២១ បន្ទាប់ពីមានបញ្ហាសុខភាព ឯកឧត្តម កស៊ិក ប៊ុនហុក ត្រូវ បានរដ្ឋសភាបោះឆ្នោតជ្រើសតាំងជាប្រធាន(គ.ជ.ប) កាលពីឆ្នាំ២០១៥ ក្រោយពេលការជាប់គាំង ផ្នែកនយោបាយនៅកម្ពុជា ក្រោយការបោះឆ្នោតឆ្នាំ២០១៣៕
