(ភ្នំពេញ)៖ រដ្ឋមន្ត្រីការបរទេសចិនថ្មីលោក ឈីន កាង (Qin Gang) បានថ្លែងសារអបអរសាទរ ដល់លោក កៅ គឹមហួន ដែលទើបក្លាយជាអគ្គលេខាធិការអាស៊ាន កាលពីថ្ងៃចន្ទ ទី១០ ខែមករា ឆ្នាំ២០២៣។ នេះបើតាមការផ្សាយដោយគេហទំព័រទូរទស្សន៍ចិន CGTN នៅថ្ងៃអង្គារនេះ។
ក្នុងនាមជាអគ្គលេខាធិការអាស៊ានទី១៥ ឯកឧត្តម បណ្ឌឹត កៅ គឹមហួន នឹងកាន់តំណែងពីឆ្នាំ២០២៣ ដល់ឆ្នាំ២០២៧។
ដោយកត់សម្គាល់ថា អាស៊ាន គឺជាអង្គការក្នុងតំបន់ដ៏សំខាន់មួយនៅអាស៊ីអាគ្នេយ៍ លោក ឈីន កាង បានថ្លែងនៅក្នុងសាររបស់គាត់ថា អាស៊ានបានប្តេជ្ញាចិត្តជាយូរមកហើយ ក្នុងការរក្សាសន្តិភាព និងស្ថិរភាពក្នុងតំបន់ ការលើកកម្ពស់កំណើនសេដ្ឋកិច្ច វឌ្ឍនភាពសង្គម និងការអភិវឌ្ឍវប្បធម៌ និងការលើកកម្ពស់កិច្ចសហប្រតិបត្តិការក្នុងតំបន់។
«ខ្ញុំទន្ទឹងរង់ចាំទំនាក់ទំនងការងារដ៏ល្អជាមួយអគ្គលេខាធិការ ឯកឧត្តម បណ្ឌឹត កៅ គឹមហួន។ ភាគីទាំងពីរនឹងផ្តោតលើការកសាង “មាតុភូមិទាំងប្រាំ” នៃសន្តិភាព ភាពស្ងប់ស្ងាត់ វិបុលភាព ភាពស្រស់ស្អាត និងមិត្តភាព ធ្វើឱ្យស៉ីជម្រៅនូវយុទ្ធសាស្ត្រគ្រប់ជ្រុងជ្រោយចិន-អាស៊ាន។ ភាពជាដៃគូ ការកសាងសហគមន៍ចិន-អាស៊ានកាន់តែជិតស្និទ្ធ ជាមួយនឹងអនាគតរួមគ្នា និងការ លើកកម្ពស់សន្តិភាព ស្ថិរភាព និងវិបុលភាពក្នុងតំបន់»។ នេះបើតាមលោករដ្ឋមន្ត្រីការបរទេសចិន។
ចាប់តាំងពីបង្កើតទំនាក់ទំនងសន្ទនាជាមួយអាស៊ានក្នុងឆ្នាំ១៩៩១ ប្រទេសចិនបានគាំទ្រយ៉ាងពេញ ទំហឹង នូវការកសាងសហគមន៍អាស៊ាន និងមជ្ឈភាពរបស់អាស៊ាន ក្នុងកិច្ចសហប្រតិបត្តិការក្នុង តំបន់ និងជំរុញការធ្វើឱ្យប្រសើរឡើងនូវទំនាក់ទំនងទ្វេភាគី។
សូមជម្រាបថា នៅលេខាធិការដ្ឋានអាស៊ាន ក្នុងទីក្រុងហ្សាការតា ប្រទេសឥណ្ឌូនេស៉ី នាវេលាម៉ោង ០៣៖១០នាទីរសៀលថ្ងៃចន្ទ បានរៀបចំពិធីផ្ទេរតំណែងអគ្គលេខាធិការអាស៊ាន ក្រោមអធិបតី ភាពលោកស្រី រដ្ឋមន្ត្រីការបរទេសឥណ្ឌូណេស៉ី ដោយ ឯកឧត្តមបណ្ឌឹត កៅ គឹមហួន ជំនួសលោក លឹម ចុកហ៊យ ដែលចប់អាណត្តិ។
ក្នុងពិធីនេះ មានការចូលរួមពីតំណាងអចិន្ត្រៃយ៍ប្រទេសសមាជិកអាស៊ានទាំង១០ និងឯកអគ្គរដ្ឋទូត ប្រទេសមិនមែនអាស៊ាន ចំនួន៩៧ប្រទេស បណ្តាញសារព័ត៌មានអន្តរជាតិចំនួន១១ និងអង្គភាព អាស៊ាននានាដែលមានមូលដ្ឋាននៅទីក្រុងហ្សាការតា ចំនួន៦។
ឯកឧត្តមបណ្ឌឹត កៅ គឹមហួន បានធ្វើដំណើរទៅកាន់រដ្ឋធានីហ្សាកា នៅថ្ងៃទី០៦ ខែមករា ឆ្នាំ ២០២៣ ក្រោយត្រូវបានកិច្ចប្រជុំកំពូលអាស៊ាន ដែលកម្ពុជាធ្វើជាម្ចាស់ផ្ទះ នៅថ្ងៃទី១១ ខែវិច្ឆិកា ឆ្នាំ២០២២ ប្រកាសតែងតាំងជា អគ្គលេខាធិការអាស៊ាន ចាប់ពីឆ្នាំ២០២៣តទៅ ដែលអាណត្តិ នៃអគ្គលេខាធិការអាស៊ាននេះ មានរយៈពេល៥ឆ្នាំ។
ឯកឧត្តមបណ្ឌឹត កៅ គឹមហួន ជាឥស្សរជនម្នាក់ក្នុងចំណោម៣នាក់ ដែលរាជរដ្ឋាភិបាលកម្ពុជា ស្នើធ្វើជាអគ្គលេខាធិការអាស៊ាន ឆ្នាំ២០២៣ នៅពេលដែលដល់វេនប្រទេសកម្ពុជា។ នេះជាលើកទី១ ដែលកម្ពុជាមានឱកាសធ្វើជា អគ្គលេខាធិការអាស៊ាន បន្ទាប់ពីកម្ពុជាបានចូល ជាសមាជិកអាស៊ាន កាលពីឆ្នាំ១៩៩៩។
តាមមាត្រា ១១ នៃធម្មនុញ្ញអាស៊ានបានឱ្យដឹងថា អគ្គលេខាធិការអាស៊ាន ត្រូវជ្រើសរើសចេញ ពីក្នុងចំណោមជនជាតិនៃរដ្ឋសមាជិកអាស៊ាន ផ្អែកទៅលើការប្ដូរវេនគ្នាតាមលំដាប់អក្ខរក្រមនៃ ឈ្មោះរដ្ឋសមាជិក ដោយពិចារណាល្អិតល្អន់ទៅលើសុច្ចរិតធម៌ សមត្ថភាព បទពិសោធន៍វិជ្ជាជីវៈ និងសមភាពយេនឌ័រ៕
