(សេអ៊ូល)៖ តាមការចុះផ្សាយដោយ ទីភ្នាក់ងារសារព័ត៌មាន Reuters នៅថ្ងៃពុធ ទី១៧ ខែសីហា ឆ្នាំ២០២២ គឺ ប្រធានាធិបតីកូរ៉េខាងត្បូង លោក យូន ស៊ុកយុល (Yoon Suk-yeol) បាននិយាយ នៅថ្ងៃពុធនេះថា កិច្ចចរចាជាមួយកូរ៉េខាងជើង មិនគួរធ្វើឡើង ដើម្បីតែក្នុងន័យនយោបាយ ឬឱ្យ តែល្អមើលនោះឡើយ ប៉ុន្តែវាគួរតែជាការចូលរួមចំណែកដល់ការស្វែងរកសន្តិភាព។
ការកត់សម្គាល់ខាងលើរបស់លោក យូន ធ្វើឡើងក្នុងសុន្ទរកថា នៅឯសន្និសីទ្ធសារព័ត៌មាននា ឱកាសដែលលោកឡើងកាន់អំណាចបាន ១០០ថ្ងៃដំបូង អមជាមួយការអំពាវនាវជាថ្មីម្តងទៀតឲ្យ កូរ៉េខាងជើង បញ្ចប់ការអភិវឌ្ឍន៍អាវុធនុយក្លេអ៊ែររបស់ខ្លួន និងចាប់ផ្តើមការរំសាយអាវុធនុយក្លេអ៊ែរ ជាថ្នូរនឹងជំនួយ សេដ្ឋកិច្ចជាដំណាក់កាលៗ។
បើតាមលោក យូន ជាពិតណាស់ កូរ៉េខាងត្បូងមិនមែនជាអ្នកធានាសន្តិសុខឱ្យកូរ៉េខាងជើងនោះទេ ក្នុងករណីទីក្រុងព្យុងយ៉ាងបោះបង់ចោលអាវុធនុយក្លេអ៊ែរ ប៉ុន្តែអ្វីដែលទីក្រុងសេអ៊ូល អាចធានាបាន នោះគឺទីក្រុងសេអ៊ូលមិនមានបំណងចង់ឲ្យមានការផ្លាស់ប្តូររបបដោយបង្ខំនៅកូរ៉េខាងជើងនោះឡើយ។ សូមជម្រាបថា ការរំសាយអាវុធនុយក្លេអ៊ែរកូរ៉េខាងជើង គឺជាគោលនយោបាយការបរទេសដ៏ សំខាន់មួយរបស់ប្រធានាធិបតីកូរ៉េខាងត្បូង ស្ទើរតែគ្រប់ជំនាន់ ប៉ុន្តែ អ្នកជំនាញជាច្រើនយល់ថា កូរ៉េខាងជើងនឹងមិនបោះបង់ចោលអាវុធនុយក្លេអ៊ែរជាដាច់ខាត ព្រោះថាអាវុធនេះគឺជាអាយុជីវិត នៃរបបដឹកនាំគ្រួសារត្រកូលគីម នៅកូរ៉េខាងជើង៕
