ប្រធានសភាតំណាងរាស្ត្រអាមេរិក លោកស្រី ផេឡូស៊ី ធ្វើដំណើរមកដល់ម៉ាឡេស៊ី ហើយ

 (គូឡាឡាំពួ)៖  តាមការចេញផ្សាយដោយសារព័ត៌មាន Straitstimes នៅថ្ងៃអង្គារ ទី២ ខែសីហា ឆ្នាំ២០២២ បញ្ជាក់ថា ប្រធានសភាតំណាងរាស្ត្រអាមេរិក លោកស្រី ណាន់ស៊ី ផេឡូស៊ី និងក្រុម ប្រតិភូរបស់លោកស្រី បានធ្វើដំណើរមកដល់ប្រទេសម៉ាឡេស៊ីហើយ នៅថ្ងៃអង្គារនេះ ក្រោមក្រប ខណ្ឌនៃការបំពេញទស្សនកិច្ចនៅតំបន់ឥណ្ឌូប៉ាស៊ីហ្វិក។

យន្ដហោះពិសេសដឹកលោកស្រី ផេឡូស៊ី និងក្រុមប្រតិភូសមាជិកសភាតំណាងរាស្ត្រអាមេរិក បាន ចុះចតនៅឯមូលដ្ឋានទ័ពអាកាសម៉ាឡេស៊ី Royal Malaysian Air Force ក្នុងទីក្រុង ស៊ូបាំង (Subang) នៅម៉ោង១០៖៣៣ព្រឹកមិញនេះ (ម៉ោងនៅម៉ាឡេស៊ី) ក្រោមការរឹតបន្តឹងសន្តិសុខយ៉ាង ខ្លាំង ហើយនេះគឺជាលើកដំបូងដែល លោកស្រី ផេឡូស៊ីដែលបំពេញទស្សនកិច្ចមកកាន់ម៉ាឡេស៊ី។

ដំណើរទស្សនកិច្ចរបស់លោកស្រី ផេឡូស៊ី មកកាន់ទីក្រុងគូឡាឡាំពួ ធ្វើឡើងបន្ទាប់ពីលោកស្រី បញ្ចប់ទស្សនកិច្ចនៅសិង្ហបុរី។ ដោយឡែក បើតាមកាលវិភាគ បន្ទាប់ពីបញ្ចប់ទស្សនកិច្ចនៅ ម៉ាឡេស៊ី លោកស្រីក៏គ្រោងនឹងបំពេញទស្សនកិច្ចនៅកូរ៉េខាងត្បូង និងជប៉ុនផងដែរ ដោយមិនបាន បញ្ជាក់ពីតៃវ៉ាន់ទេ។ ប៉ុន្តែបើតាម ប្រព័ន្ធផ្សព្វផ្សាយអាមេរិក និងតៃវ៉ាន់ លោកស្រីប្រធានសភា តំណាងរាស្ត្រអាមេរិករូបនេះត្រូវបានរំពឹងថានឹងធ្វើដំណើរទៅដល់កោះតៃវ៉ាន់ នៅយប់ថ្ងៃអង្គារនេះ តែម្ដង៕