(ភ្នំពេញ )៖ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នា ថ្ងៃទី១៦ ខែមិថុនា ឆ្នាំ២០២២នេះ បានទទួលជួបពិភាក្សាការងារជាមួយគណៈប្រតិភូការិយាល័យ សេដ្ឋកិច្ច និងពាណិជ្ជកម្មហុងកុង ប្រចាំទីក្រុងបាងកក ប្រទេសថៃ(HKETO) ដឹកនាំដោយលោក Sheung Yuen Lee ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញពីអង្គភាពពាក់ ព័ន្ធផងដែរ។ជំនួបនេះធ្វើឡើងក្នុងគោលបំណងដើម្បីស្វែងយល់ឱ្យបានច្បាស់អំពីការអភិវឌ្ឍហេដ្ឋារចនាសម្ព័ន្ធរបស់ប្រទេសកម្ពុជា ក៏ដូចជាដើម្បីវាយតម្លៃអំពីកាលានុវត្តភាពពាណិជ្ជកម្ម និងការវិនិ យោគឱ្យបានទូលំ ទូលាយនៅកម្ពុជាផងដែរ។
ជាកិច្ចចាប់ផ្តើម លោក Sheung Yuen Lee បានថ្លែងអំណរគុណឯកឧត្តម ទេសរដ្ឋមន្ត្រី ដែលបាន បញ្ជាក់ពីការចូលរួមកិច្ចប្រជុំកំពូលលើកទីប្រាំពីរនៃគំនិតផ្តួចផ្តើមខ្សែក្រវាត់ និងផ្លូវ ដែលនឹងប្រព្រឹត្ត ទៅនៅថ្ងៃទី៣១ ខែសីហា ឆ្នាំ២០២២ នៅទីក្រុងហុងកុង និងបានជម្រាបជូនអំពីសកម្មភាពការងារ បទពិសោធន៍ និងការអនុវត្តល្អរបស់ខ្លួនទាក់ទងនឹងជំនាញ គ្រប់គ្រងកំពង់ផែលំដាប់ថ្នាក់ពិភព លោក និងសក្កានុពលសំខាន់ជាច្រើន និងបានបង្ហាញចំណាប់ អារម្មណ៍ចំពោះការផ្លាស់ប្តូរប្រកប ដោយភាពវិជ្ជមាន និងការរីកចម្រើនលើវិស័យហេដ្ឋារចនាសម្ព័ន្ធរបស់កម្ពុជាផងដែរ។
ជាមួយគ្នានោះ ឯកឧត្តម ទេសរដ្ឋមន្ត្រី ក៏បានលើកឡើងអំពីអត្ថប្រយោជន៍ដែលកម្ពុជាទទួលបាន ពីគំនិត ផ្ដួចផ្ដើមខ្សែក្រវាត់ និងផ្លូវ (Belt and Road Initiative) ដែលមានគម្រោងសាងសង់ហេដ្ឋារ ចនាសម្ព័ន្ធជាច្រើន ក្នុងនោះរួមមានការកសាងផ្លូវល្បឿនលឿនរាជធានីភ្នំពេញ-ក្រុងព្រះសីហនុ ដែលជាផ្លូវល្បឿនលឿនលើកដំបូងបង្អស់របស់កម្ពុជាផងដែរ។
ឯកឧត្តម ទេសរដ្ឋមន្ត្រី ក៏បានថ្លែងនូវការកោតសរសើរចំពោះគំនិតផ្ដួចផ្ដើមខ្សែក្រវាត់ និងផ្លូវរបស់ លោក ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន និងបានបង្ហាញជំនឿយ៉ាងមុតមាំថា គំនិតផ្ដួចផ្ដើម ខ្សែក្រវាត់ និងផ្លូវនេះនឹងនាំមកនូវការអភិវឌ្ឍសេដ្ឋកិច្ច និងលើកកម្ពស់កម្រិតជីវភាព រស់នៅរបស់ប្រជាជន ជាពិសេសជំរុញដល់ការអភិវឌ្ឍសេដ្ឋកិច្ចនៅក្នុងប្រទេសផងដែរ។
ជាមួយគ្នានោះ ឯកឧត្តម ទេសរដ្ឋមន្ត្រី ក៏បានធ្វើការប្រៀបធៀបអំពីដំណើរអភិវឌ្ឍហេដ្ឋារចនាសម្ព័ន្ធ របស់កម្ពុជាក្នុងឆ្នាំ ១៩៩៨ ដែលកាលនោះ កម្ពុជានៅមិនទាន់មានផ្លូវបេតុងកៅស៊ូធ្វើដំណើរឆ្ពោះ ទៅកាន់បណ្ដារាជធានី-ខេត្តក្នុងព្រះរាជាណាចក្រកម្ពុជានៅឡើយទេ ផ្លូវភាគច្រើនគឺជាផ្លូវដី ប៉ុន្តែ សព្វថ្ងៃនេះអាចធ្វើដំណើរពីរាជធានីភ្នំពេញទៅកាន់បណ្ដារាជធានី-ខេត្តនានានៅទូទាំងប្រទេស តាមរយៈបណ្ដាញផ្លូវដែលធ្វើអំពីបេតុងកៅស៊ូ និងកំពុងស្ថិតក្នុងដំណាក់កាលពង្រីក និងលើកម្រិត គុណភាពផ្លូវពីពីរគន្លងទៅបួនគន្លងនៅតាមបណ្ដាផ្លូវសំខាន់ៗមួយចំនួន ដែលជាឆ្អឹងខ្នងសម្រាប់ការ ទ្រទ្រង់សេដ្ឋកិច្ចដូចជា៖ ផ្លូវជាតិលេខ៥ តភ្ជាប់រាជធានីភ្នំពេញទៅកាន់ប្រទេសជិតខាងដូចជា ថៃ និងវៀតណាម និងជាផ្លូវអាស៊ានហាយវេលេខ១ ផ្លូវជាតិលេខ៣ពីភ្នំពេញទៅកាន់ទីរួមខេត្តកំពត និងបណ្តាញផ្លូវសំខាន់ជាច្រើនទៀត តាមរយៈការផ្តល់ ជំនួយគាំទ្រពីប្រទេសចិន ជប៉ុន កូរ៉េ ធនាគារ ពិភពលោក ធនាគារអភិវឌ្ឍន៍អាស៊ី និងដៃគូអភិវឌ្ឍន៍ជាច្រើនផ្សេងទៀតផងដែរ។
ឯកឧត្តម ទេសរដ្ឋមន្ត្រី ស៊ុន ចាន់ថុល ក៏បានជម្រាបជូនអំពីគម្រោងវិនិយោគសំខាន់ៗសម្រេច បានរបស់រាជរដ្ឋាភិបាលលើការអភិវឌ្ឍហេដ្ឋារចនាសម្ព័ន្ធរូបវន្តនានាដែលក្នុងនោះមាន៖ បណ្ដាញផ្លូវ ចំនួន៣៧ខ្សែដែលទើបបានកសាង និងបញ្ចប់ជាស្ថាពរនៅក្រុងព្រះសីហនុ គម្រោង សាងសង់ផ្លូវ៣៨ ខ្សែនៅក្រុងសៀមរាប ខេត្តសៀមរាបជាដើម និងការរៀបចំផែនការមេភស្តុភារ កម្មកម្ពុជា។
បន្ថែមពីនេះ ឯកឧត្តម ទេសរដ្ឋមន្ត្រី ក៏បានបង្ហាញក្តីសង្ឃឹមថាគណៈប្រតិភូការិយាល័យសេដ្ឋកិច្ច ពាណិជ្ជកម្មហុងកុង នឹងពិចារណាលើការអភិវឌ្ឍគម្រោងសំខាន់ៗប្រមាណ៣៣០គម្រោង ត្រូវការ ទុនវិនិយោគ ប្រមាណ៥០ពាន់លានដុល្លារក្នុងរយៈពេល១០ឆ្នាំ ដែលបានលើកឡើងនៅក្នុងផែន ការមេភស្តុភារកម្ម ដើម្បីចូលរួមចំណែកក្នុងការបង្កើនឧត្តមភាពប្រកួតប្រជែងវិស័យភស្តុភារកម្ម និងការដឹកជញ្ជូនរបស់កម្ពុជា។ បន្ថែមពីលើនេះលោកទេសរដ្ឋមន្ត្រី ក៏បានគូសបញ្ជាក់អំពីវឌ្ឍន ភាពនៃការរៀបចំផែនការមេភស្តុភារកម្ម ដែលនឹងត្រូវអនុម័តដោយរាជរដ្ឋាភិបាលនាពេលខាងមុខ នេះផងដែរ៕
