(តៃប៉ិ)៖ យោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃអង្គារ ទី៣១ ខែ ឧសភា ឆ្នាំ២០២២ គឺបានបញ្ជាក់ប្រាប់អោយដឹងថា ក្រសួងការពារជាតិតៃវ៉ាន់ បានឱ្យដឹងថាយន្ដ ហោះហ្វឹកហ្វឺនមួយគ្រឿងរបស់ខ្លួនបានធ្លាក់នៅថ្ងៃអង្គារនេះ ដោយបណ្ដាលឱ្យពីឡុត ម្នាក់បាត់បង់ ជីវិត ហើយនេះគឺជាសោកនាដកម្មលើកទី២ សម្រាប់កងទ័ពអាកាសតៃវ៉ាន់ក្នុងឆ្នាំ២០២២នេះ។
បើតាមក្រសួងការពារជាតិតៃវ៉ាន់ យន្ដហោះហ្វឹកហ្វឺនធុន AT-3 បានធ្លាក់កំលុងពេលចូលរួមក្នុង បេសកកម្មបណ្ដុះបណ្ដាលមួយ ហោះចេញពី មូលដ្ឋានទ័ពអាកាស កាងសាន់ (Gangshan) នៃ ទីក្រុងភាគខាងត្បូង កៅសឹង (Kaohsiung) ហើយសាកសពរបស់ពីឡុតក៏ត្រូវបានរកឃើញ ហើយ ដែរ។ ប៉ុន្តែមិនទាន់មានការបញ្ជាក់ពីមូលហេតុធ្លាក់នៅឡើយទេ។
គួរបញ្ជាក់ថា យន្ដហោះហ្វឹកហ្វឺនធុន AT-3 គឺជាប្រភេទយន្ដហោះផលិតនៅក្នុងស្រុកដែលប្រើ ប្រាស់សម្រាប់ការហ្វឹកហ្វឺន និងហោះហើរ ជាលើកដំបូងកាលពីឆ្នាំ១៩៨០ ហើយអាចបំពាក់អាវុធ បានទៀតផង។ កាលពីខែមីនាកន្លងទៅ យន្ដហោះចម្បាំង Mirage 2000 មួយគ្រឿង របស់យោធាតៃវ៉ាន់ ក៏បានធ្លាក់នៅតំបន់ឆ្នេរសមុទ្រភាគអាគ្នេយ៍កោះតៃវ៉ាន់ផងដែរ តែនៅកាល ណោះពីឡុតត្រូវបានជួយសង្រ្គោះទាន់ពេលវេលា៕
